ನಡುಗಡ್ಡೆ ಜನರ ನೆರವಿಗೆ ಬಾರದ ಆಡಳಿತ: ತವದಗಡ್ಡಿ ಸಂತ್ರಸ್ತರ ಸ್ಥಿತಿ ಶೋಚನೀಯ

ಶೀಲಹಳ್ಳಿ ಸೇತುವೆ ಕೆಳಭಾಗದ ಅನತಿ ದೂರದಲ್ಲಿ ಕೃಷ್ಣಾ ನದಿ ಟಿಸಿಲೊಡೆದು ಹರಿದು ಪುನಃ ಮುಂದೆ ಕೃಷ್ಣಾ ನದಿಗೆ ಒಂದಾಗಿ ಹರಿಯುತ್ತಿದೆ. ಈ ಮಧ್ಯದ ಪ್ರದೇಶ ನಡುಗಡ್ಡೆಯಾಗಿ ಪರಿವರ್ತಿತಗೊಂಡಿದೆ. ಈ ಪ್ರದೇಶವನ್ನು ತವದಗಡ್ಡಿ ಎಂದು ಕರೆಯಲಾಗುತ್ತಿದೆ. ಇಲ್ಲಿ 15ಕ್ಕೂ ಹೆಚ್ಚು ಪರಿಶಿಷ್ಟ ಜಾತಿ (ಮಾದಿಗ) ಕುಟುಂಬದವರು ಜಮೀನು ಹೊಂದಿದ್ದಾರೆ. ಬಹುತೇಕ ಕುಟುಂಬಸ್ಥರು ಸಮೀಪದ ಶೀಲಹಳ್ಳಿ ಗ್ರಾಮದಲ್ಲಿ ಮನೆ ಮಾಡಿಕೊಂಡಿದ್ದಾರೆ.

‘ಶೀಲಹಳ್ಳಿ ಗೋನವಾಟ್ಲ ಸಂಪರ್ಕಿಸುವ ರಸ್ತೆ ನಡುಗಡ್ಡೆಗೆ ಅನುಕೂಲಕರವಾಗಿದೆ. ಕೃಷಿ ಚಟುವಟಿಕೆ ನಡೆಸಲು ಈ ರಸ್ತೆ ಬಳಕೆ ಅನಿವಾರ್ಯ. ಪ್ರವಾಹ ಬಂದಾಗ ಮಾತ್ರ ಭಾರಿ ಸಂಕಷ್ಟ ಎದುರಿಸಬೇಕಾಗುತ್ತದೆ. 1.50 ಲಕ್ಷ ಕ್ಯುಸೆಕ್‌ಗಿಂತ ಹೆಚ್ಚು ನೀರು ಹರಿಸಿದಾಗ ಪ್ರವಾಹ ಬಂದರೆ ಜಮೀನುಗಳು ಜಲಾವೃತಗೊಳ್ಳುತ್ತವೆ. ಪ್ರತಿ ವರ್ಷ ಬೆಳೆದ ಫಸಲು ಕೈಗೆ ಸೇರದೆ, ಪರಿಹಾರವೂ ಸಿಗದೆ ಭಾರಿ ಸಂಕಷ್ಟ ಎದುರಿಸುತ್ತಿದ್ದೇವೆ’ ಎಂದು ಚಂದಪ್ಪ ಹರಿಜನ ಅಳಲು ತೋಡಿಕೊಂಡರು.

ಪ್ರತಿ ವರ್ಷ ನಾಲ್ಕಾರು ದಿನ ಹೆಚ್ಚಿನ ನೀರು ಕೃಷ್ಣಾ ನದಿಗೆ ಹರಿದು ನಂತರ ಪ್ರವಾಹ ಕಡಿಮೆ ಆಗುತ್ತಿತ್ತು. ಆಗ ಕೃಷಿ ಚಟುವಟಿಕೆ ನಡೆಸುತ್ತಿದ್ದೆವು. ಈ ವರ್ಷ ಹದಿನೈದು ದಿನಗಳಿಂದ ನಿರಂತರವಾಗಿ ಹೆಚ್ಚಿನ ಪ್ರಮಾಣದಲ್ಲಿ ನೀರು ಹರಿಸುತ್ತಿರುವುದರಿಂದ ನಡುಗಡ್ಡೆ ಸಂಪರ್ಕ ಸಾಧ್ಯವಾಗುತ್ತಿಲ್ಲ. ಬೆಳೆ ಜಲಾವೃತಗೊಂಡು ಹಾಳಾಗುತ್ತಿದೆ. ಇನ್ನೊಂದೆಡೆ ಕಸ ಬೆಳೆದು ಬೆಳೆ ರೋಗಕ್ಕೆ ತುತ್ತಾಗುತ್ತಿದೆ. ಹೀಗಿದ್ದರೂ ಆಡಳಿತ ಬಿಡಿಗಾಸು ನೆರವು ನೀಡುತ್ತಿಲ್ಲ ಎಂದು ರೈತರು ದೂರುತ್ತಾರೆ.

‘ಪ್ರವಾಹ ಎಂದಾಕ್ಷಣ ತಾಲ್ಲೂಕು, ಜಿಲ್ಲಾ ಆಡಳಿತ ಮ್ಯಾದರಗಡ್ಡಿ, ಕರಡಕಲಗಡ್ಡಿ, ವಂಕಮ್ಮನಗಡ್ಡಿ ಪ್ರದೇಶಕ್ಕೆ ತೆರಳುತ್ತಾರೆ. ಶೀಲಹಳ್ಳಿ ಮಾರ್ಗದಲ್ಲಿ ತೆರಳುವ ಅಧಿಕಾರಿಗಳು ಸೌಜನ್ಯತೆಗೂ ತವದಗಡ್ಡಿ ರೈತರನ್ನು ಸಂಪರ್ಕ ಮಾಡುತ್ತಿಲ್ಲ. ಮಾದಿಗ ಸಮುದಾಯ ಆಗಿದ್ದರಿಂದ ಅಧಿಕಾರಿಗಳು ಕಡೆಗಣಿಸಿದ್ದಾರೆ. ಉಳಿದ ಗಟ್ಟಿಗಳಲ್ಲಿ ಇತರೆ ಪರಿಶಿಷ್ಟ ವರ್ಗದವರು ಇದ್ದುದರಿಂದ ಹೆಚ್ಚಿನ ಪ್ರಾತಿನಿಧ್ಯ ನೀಡಲಾಗುತ್ತಿದೆ’ ಎಂದು ಆರೋಪಿಸಿದ್ದಾರೆ.

‘ಕೃಷ್ಣಾ ನಡುಗಡ್ಡೆ ಪ್ರದೇಶಗಳಂತೆ ನಮ್ಮ ಬೇಡಿಕೆಗಳಿಲ್ಲ. ಪ್ರವಾಹ ಸಂದರ್ಭದಲ್ಲಿ ನಡುಗಡ್ಡೆ ಸಂಪರ್ಕಿಸುವ ರಸ್ತೆ ಜಲಾವೃತಗೊಳ್ಳುತ್ತದೆ. ಪ್ರವಾಹ ಸಂದರ್ಭದಲ್ಲಿ ಜನ, ಜಾನುವಾರು ತಿರುಗಾಡಲು ಅನುಕೂಲ ಆಗುವಂತಹ ಸಣ್ಣ ಸೇತುವೆ ನಿರ್ಮಿಸಿಕೊಡಲು ಮನವಿ ಮಾಡುತ್ತ ಬಂದಿದ್ದೇವೆ. ದಲಿತರ ಹೆಸರಲ್ಲಿ ಆಡಳಿತ ನಡೆಸುವ ಯಾವೊಂದು ಸರ್ಕಾರವೂ ನಾಲ್ಕು ದಶಕಗಳಿಂದ ನಮ್ಮ ಬೇಡಿಕೆ ಈಡೇರಿಸಿಲ್ಲ’ ಎಂದು ಶಿವಪ್ಪ ದೊಡಮನಿ ಆಕ್ರೋಶ ವ್ಯಕ್ತಪಡಿಸಿದರು.

ತಹಶೀಲ್ದಾರ್ ಶಂಶಾಲಂ ನಾಗಡದಿನ್ನಿ ಅವರನ್ನು ಸಂಪರ್ಕಿಸಿದಾಗ, ‘ನಡುಗಡ್ಡೆಗಳ ಕುರಿತು ಈಗಾಗಲೇ ಹಲವು ಸುತ್ತಿನ ಮಾಹಿತಿಯನ್ನು ಹಿರಿಯ ಅಧಿಕಾರಿಗಳಿಗೆ ಸಲ್ಲಿಸುತ್ತ ಬಂದಿದ್ದೇವೆ. ತವದಗಡ್ಡಿ ಜನರ ಬೇಡಿಕೆ ಹಾಗೂ ಅಹವಾಲು ಕುರಿತು ಸ್ಪಷ್ಟ ಮಾಹಿತಿ ಇಲ್ಲ. ಪ್ರವಾಹ ಇಳಿದಾಕ್ಷಣ ಕೃಷಿ ಮತ್ತು ಕಂದಾಯ ಇಲಾಖೆ ಜಂಟಿ ಸಮೀಕ್ಷೆ ನಡೆಸಿ ಬೆಳೆ ನಷ್ಟ ಪರಿಹಾರಕ್ಕೆ ಕ್ರಮ ಕೈಗೊಳ್ಳಲಾಗುವುದು. ಸೇತುವೆ ನಿರ್ಮಾಣ ಕುರಿತು ಚರ್ಚಿಸಲಾಗುವುದು’ ಎಂದರು.