ಲಿಂಗಸುಗೂರು: ‘ಕೋವಿಡ್‍ ಸಂದರ್ಭದಲ್ಲಿ ಪುರಸಭೆ ಸಿಬ್ಬಂದಿ ಜೀವದ ಹಂಗು ತೊರೆದು ಜನರ ಜೀವರಕ್ಷಣೆಯ ಕೆಲಸ ಮಾಡಿದ್ದರು. ಅವರನ್ನು ಗುರುತಿಸಿ ಪುರಸಭೆ ನಿಧಿಯಿಂದ ₹1.90 ಲಕ್ಷ ಪ್ರೋತ್ಸಾಹಧನ ನೀಡಲಾಗಿದೆ. ಅದನ್ನು ಸದ್ಬಳಕೆ ಮಾಡಿಕೊಳ್ಳಬೇಕು’ ಎಂದು ಪುರಸಭೆ ಅಧ್ಯಕ್ಷೆ ಸುನಿತಾ ಕೆಂಭಾವಿ ಸಲಹೆ ನೀಡಿದರು.
ಕಾರ್ಮಿಕರಿಗೆ ಬುಧವಾರ ಪ್ರೋತ್ಸಾಹಧನದ ಚೆಕ್‍ ವಿತರಿಸಿ ಮಾತನಾಡಿ,‘ನಾವು ನೀಡುವ ಹಣ ಯಾವುದಕ್ಕೂ ಸಾಲುವುದಿಲ್ಲ. ಬೆನ್ನು ತಟ್ಟುವ ಕೆಲಸ ಮಾಡಿದ್ದೇವೆ. ಪುರಸಭೆಯ 38 ಸಿಬ್ಬಂದಿಗೆ ಪ್ರೋತ್ಸಾಹಧನ ನೀಡಲಾಗಿದೆ. ಭವಿಷ್ಯದಲ್ಲಿ ಕೂಡ ಕಾರ್ಮಿಕರು ಸ್ವಚ್ಛತೆ ಮತ್ತು ಪಟ್ಟಣದ ಸೌಂದರ್ಯೀಕರಣಕ್ಕೆ ಮುಂದಾಗಬೇಕು’ ಎಂದು ಮನವಿ ಮಾಡಿದರು.
ಪುರಸಭೆ ಉಪಾಧ್ಯಕ್ಷ ಎಂ.ಡಿ ರಫಿ, ಸದಸ್ಯ ಬಾಬುರೆಡ್ಡಿ ಮುನ್ನೂರು, ಶೋಭಾ ಕಾಟವೆ, ಮುದಕಪ್ಪ ನಾಯಕ ಸೇರಿದಂತೆ ಇತರ ಸಿಬ್ಬಂದಿ ಇದ್ದರು.
