ರಾಯಚೂರು: ಭಾರತೀಯ ಜೈನ್ ಸಂಘಟನೆ ರಾಯಚೂರು ಘಟಕವು ಆಮ್ಲಜನಕ ಉತ್ಪತ್ತಿ (ಆಕ್ಸಿಜನ್‌ ಕಾನ್ಸ್‌ಟ್ರೆಂಟರ್‌) ಮಾಡುವ 50 ಯಂತ್ರಗಳನ್ನು ಸಿಂಗಾಪುರದಿಂದ ಖರೀದಿಸಿದ್ದು, ಶಾಸಕ ಡಾ.ಶಿವರಾಜ ಪಾಟೀಲ ಅವರು ಭಾನುವಾರ ಉದ್ಘಾಟಿಸಿದರು.
ಸಂತೋಷ ಹಬ್‌ನಲ್ಲಿ ಏರ್ಪಡಿಸಿದ್ದ ಸರಳ ಸಮಾರಂಭದಲ್ಲಿ ಮಾತನಾಡಿದ ಡಾ.ಶಿವರಾಜ ಪಾಟೀಲ ಅವರು, ಕೊರೊನಾ ಸಂಕಷ್ಟದ ಸಂದರ್ಭದಲ್ಲಿ ಜನರಿಗೆ ಪ್ರಾಣವಾಯು ಒದಗಿಸುವ ಉದ್ದೇಶಕ್ಕಾಗಿ ಜೈನ್ ಸಂಘಟನೆಯು ಈ ಯಂತ್ರಗಳನ್ನು ಖರೀದಿ ಮಾಡಿರುವುದು ಮಾದರಿಯಾಗಿದೆ ಎಂದರು.
ಸಮಾಜದ ದಾನಿಗಳಿಂದ ದೇಣಿಗೆ ಸಂಗ್ರಹಿಸಿ ಯಂತ್ರಗಳನ್ನು ಖರೀದಿಸಿದ್ದಾರೆ. ಜನರಿಗೆ ಆಮ್ಲಜನಕ ಒದಗಿಸುವ ಮೂಲಕ ಜೀವನ ಸಾರ್ಥಕ ಮಾಡಿಕೊಳ್ಳುತ್ತಿದ್ದಾರೆ. ಸರ್ಕಾರದಿಂದ ಅಗತ್ಯ ನೆರವು ಒದಗಿಸಲಾಗುವುದು ಎಂದು ತಿಳಿಸಿದರು.
ಶಿಲ್ಪಾ ಮೆಡಿಕೇರ್‌ ಲಿಮಿಟೆಡ್ ವ್ಯವಸ್ಥಾಪಕ ನಿರ್ದೇಶಕ ವಿಷ್ಣುಕಾಂತ್ ಜಿ.ಬೂತಡಾ ಮಾತನಾಡಿ, ರಾಯಚೂರು ಜನತೆಯ ಜೀವನ ರಕ್ಷಣೆಗಾಗಿ ತಮ್ಮ ಕಂಪನಿ ಪರವಾಗಿ ಎಲ್ಲಾ ರೀತಿಯ ಸಹಕಾರ ನೀಡಲಾಗುವುದು ಎಂದು ಹೇಳಿದರು.
ಪ್ರತಿದಿನ 5 ಲೀಟರ್‌ ಆಮ್ಲಜನಕ ಪೂರೈಸುವ ಸಾಮರ್ಥ್ಯವನ್ನು ಈ ಯಂತ್ರಗಳು ಹೊಂದಿವೆ. ಅತ್ಯಾಧುನಿಕ ನೆಬುಲೈಜರ್‌ ತಂತ್ರಜ್ಞಾನವಿದೆ ಎಂದು ಜೈನ್ ಸಂಘಟನೆ ಜಿಲ್ಲಾಧ್ಯಕ್ಷ ಎಸ್. ಕಮಲಕುಮಾರ್ ಜೈನ್ ಹೇಳಿದರು.
ಜಿಲ್ಲಾ ಲಯನ್ಸ್ ಅಧ್ಯಕ್ಷ ಡಾ.ವೆಂಕಟೇಶ ನಾಯಕ, ಜೈನ್ ಸಂಘಟನೆ ಉಪಾಧ್ಯಕ್ಷ ಅಜೀತ್ ಸಂಚೇಟಿ, ಸಂಘಟನಾ ಅಧ್ಯಕ್ಷ ದಿನೇಶ ದರತಾರಿ, ಖಜಾಂಚಿ ನರೇಶ್ ಬೊಹರಾ, ಕಾರ್ಯದರ್ಶಿ ಮಹೇಂದ್ರ ಭಂಡಾರಿ, ಬಾಬುರಾವ್ ಎಂ. ಶೇಗುಣಿಸಿ, ಬಸವರಾಜ ಎಂ, ಚೇತನ್, ಆಕಾಶ ಮತ್ತು ವೆಂಕಟ್ ಇದ್ದರು.
