ಲಿಂಗಸುಗೂರು: 24 ಗಂಟೆಯೊಳಗೆ ಅಪಹೃತ ಯುವಕನ ಪತ್ತೆ

ಲಿಂಗಸುಗೂರು ತಾಲ್ಲೂಕು ಮಾರಲದಿನ್ನಿ ತಾಂಡಾದ ಯುವಕ ಶರಣ ಕುಮಾರ್ ಅಪಹರಣವಾಗಿದ್ದ. ಅಪಹರಣಕಾರರು ವಿಜಯಪುರ ಜಿಲ್ಲೆ ಚಂದಕವಟೆ ಗ್ರಾಮದವರು. ಚಾಂದಸಾಬ ಇಸ್ಮಾಯಿಲ್ ಮುಲ್ಲಾ, ರಮೇಶ ಶಿವಣ್ಣ, ಮಿರಾಜ್ ಬಾಬಸಾಬ್, ಸಂತೋಷ ಭೀಮಣ್ಣ ಹಾಗೂ ಶಬ್ಬೀರ್ ಇಸ್ಮಾಯಿಲ್ ಸಾಬ್ ಬಂಧಿತ ಆರೋಪಿಗಳು.

ಬಂಧಿತರಿಂದ ಕಾರು, ಮೊಬೈಲ್, ಪಿಸ್ತೂಲ್ ಹಾಗೂ ಕಬ್ಬಿಣದ ರಾಡು ಜಪ್ತಿ ಮಾಡಿಕೊಳ್ಳಲಾಗಿದೆ. ಶರಣಕುಮಾರ್ ಸಹೋದರ ಕೃಷ್ಣಪ್ಪ ಅವರು ಆರೋಪಿಗಳಿಂದ ಕಬ್ಬು ಕಟಾವು ಮಾಡಿಕೊಡುವ ವಾಗ್ದಾನ ನೀಡಿ ಮುಂಗಡ ಪಡೆದಿದ್ದ. ಆದರೆ, ಕಟಾವು ಕಾರ್ಯಕ್ಕೆ ಹೋಗದೆ ಕೈ ಕೊಟ್ಟಿದ್ದರಿಂದ ಆರೋಪಿಗಳು ಗುಂಪು ಮಾಡಿಕೊಂಡು ಬಂದು ಅಪಹರಣ ಮಾಡಿದ್ದರು ಎಂದು ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಡಾ.ಸಿ.ಬಿ. ವೇದಮೂರ್ತಿ ಅವರು ಪತ್ರಿಕಾಗೋಷ್ಠಿಯಲ್ಲಿ ತಿಳಿಸಿದರು.