ರಾಮನಗರ: 68 ಮಾದರಿಗಳೂ ನೆಗೆಟಿವ್: ಜನರು ನಿರಾಳ

ರಾಮನಗರ ಜೈಲಿಗೆ ಸ್ಥಳಾಂತರಗೊಂಡಿದ್ದ ಪಾದರಾಯನಪುರ ಗಲಭೆ ಆರೋಪಿಗಳ ಪೈಕಿ ಐವರಲ್ಲಿ ಸೋಂಕು ಕಾಣಿಸಿಕೊಂಡ ಹಿನ್ನೆಲೆಯಲ್ಲಿ ಅವರನ್ನು ಮತ್ತೆ ಬೆಂಗಳೂರಿಗೆ ವರ್ಗಾಯಿಸಲಾಗಿತ್ತು. ಈ ಪ್ರಕ್ರಿಯೆಯಲ್ಲಿ ಭಾಗಿಯಾಗಿರುವ 80ಕ್ಕೂ ಹೆಚ್ಚು ಜನರು ಮತ್ತವರ ಕುಟುಂಬದವರನ್ನು ಕ್ವಾರಂಟೈನ್‌ಗೆ ಒಳಪಡಿಸಿದ್ದು, ಅವರಲ್ಲಿ ಹಲವರ ಗಂಟಲ ದ್ರವದ ಮಾದರಿಯನ್ನು ಪರೀಕ್ಷೆಗೆ ಕಳುಹಿಸಲಾಗಿತ್ತು. ಸೋಮವಾರ ಈ ಎಲ್ಲ ಮಾದರಿಗಳ ಪರೀಕ್ಷೆ ವರದಿ ಆರೋಗ್ಯಾಧಿಕಾರಿಗಳ ಕೈ ಸೇರಿದ್ದು, ಯಾರೊಬ್ಬರಲ್ಲೂ ಸೋಂಕು ಪತ್ತೆಯಾಗಿಲ್ಲ. ಈ ಮೂಲಕ ರಾಮನಗರ ಜಿಲ್ಲೆಯು ಕೊರೊನಾ ಹಸಿರು ವಲಯವಾಗಿಯೇ ಉಳಿದುಕೊಳ್ಳುವ ವಿಶ್ವಾಸ ಮೂಡಿದೆ. ವರದಿಗಳು ನೆಗೆಟಿವ್‌ ಆಗಿದ್ದರೂ ಜೈಲು ಸಿಬ್ಬಂದಿ ಹಾಗೂ ಸಂಬಂಧಿಸಿದವರ ಕ್ವಾರಂಟೈನ್‌ ಮುಂದುವರಿಯಲಿದೆ.

’ಕೈದಿಗಳ ಸ್ಥಳಾಂತರ ಸಂಬಂಧಿಸಿದಂತೆ ಸಂಗ್ರಹಿಸಲಾಗಿದ್ದ ಎಲ್ಲ ಸಿಬ್ಬಂದಿಯ ವರದಿಯೂ ನೆಗೆಟಿವ್‌ ಆಗಿರುವುದು ನೆಮ್ಮದಿ ತಂದಿದೆ. ಆದಾಗ್ಯೂ ಈ ಎಲ್ಲರ ಕ್ವಾರಂಟೈನ್‌ ಮುಂದುವರಿಯಲಿದ್ದು, ನಿರಂತರ ನಿಗಾ ವಹಿಸಲಾಗುವುದು. ಮತ್ತೆ 10-12 ದಿನಗಳ ಬಳಿಕ ಮತ್ತೆ ಅವರ ಗಂಟಲ ದ್ರವಗಳ ಮಾದರಿ ಪಡೆದು ಪರೀಕ್ಷೆಗೆ ಒಳಪಡಿಸಲಾಗುವುದು. ಆನಂತರವಷ್ಟೇ ಕೋವಿಡ್-19 ಸೋಂಕಿನ ಕುರಿತು ಖಾತ್ರಿ ಸಿಗಲಿದೆ’ ಎಂದು ಜಿಲ್ಲಾ ಕುಟುಂಬ ಕಲ್ಯಾಣ ಮತ್ತು ಆರೋಗ್ಯಾಧಿಕಾರಿ ನಿರಂಜನ್ ತಿಳಿಸಿದರು.

ವರದಿಗಳು ನೆಗೆಟಿವ್‌ ಆಗಿದ್ದಾಗ್ಯೂ ಇನ್ನೂ ಹಲವು ವಾರಗಳ ಕಾಲ ಜೈಲಿನ ಸುತ್ತಮುತ್ತ ಸೀಲ್‌ಡೌನ್‌ ಪ್ರಕ್ರಿಯೆ ಮುಂದುವರಿಯಲಿದೆ. ಸುತ್ತಲಿನ 100 ಮೀಟರ್‌ ಪ್ರದೇಶವನ್ನು ಕಂಟೈನ್‌ಝೋನ್‌ ಆಗಿ ಜಿಲ್ಲಾಡಳಿತ ಘೋಷಿಸಿದ್ದು, ಇಲ್ಲಿ ಎಲ್ಲ ತರಹದ ಚಟುವಟಿಕೆಗಳಿಗೆ ಸಂಪೂರ್ಣ ನಿಷೇಧ ಹೇರಿದೆ. ಜಿಲ್ಲಾಧಿಕಾರಿ ಕಚೇರಿ ಹೊರತುಪಡಿಸಿ ಉಳಿದೆಲ್ಲ ಕಚೇರಿ, ಮನೆಗಳ ಬಾಗಿಲು ಮುಚ್ಚಿವೆ. ಸುತ್ತಲಿನ 1 ಕಿ.ಮೀ. ಪ್ರದೇಶವನ್ನು ಸಿವಿಯರ್ ವಲಯ ಎಂತಲೂ, 5 ಕಿ.ಮೀ. ವ್ಯಾಪ್ತಿಯಲ್ಲಿನ ಪ್ರದೇಶವನ್ನು ಕೊರೊನಾ ಬಫರ್‍ ಝೋನ್‌ ಎಂತಲೂ ಗುರುತಿಸಲಾಗಿದೆ.

ಆತಂಕ ದೂರ: ವರದಿಗಳ ನೆಗೆಟಿವ್‌ ಸುದ್ದಿ ಕೇಳಿ ಜನರಲ್ಲಿನ ಆತಂಕವು ಕೊಂಚ ಮಟ್ಟಿಗೆ ದೂರವಾಗಿದೆ. ಹಸಿರು ವಲಯದಲ್ಲಿ ಮುಂದುವರಿದಿದ್ದ ರಾಮನಗರದಲ್ಲಿನ ಜೈಲಿಗೆ ಪಾದರಾಯನಪುರ ಆರೋಪಿಗಳನ್ನು ಇದೇ 21ರಂದು ರಾಜ್ಯ ಸರ್ಕಾರ ಏಕಾಏಕಿ ಸ್ಥಳಾಂತರ ಮಾಡಿತ್ತು. ಅದಾದ ಮರು ದಿನವೇ ಆರೋಪಿಗಳಲ್ಲಿ ಇಬ್ಬರಿಗೆ ಸೋಂಕು ಇರುವುದು ಪತ್ತೆಯಾಗಿತ್ತು. ನಂತರದಲ್ಲಿ ಸೋಂಕಿತರ ಸಂಖ್ಯೆ ಐದಕ್ಕೆ ಏರಿಕೆ ಆಗಿತ್ತು. ಇದರಿಂದ ಎಚ್ಚೆತ್ತ ಸರ್ಕಾರ ಕೂಡಲೇ ಎಲ್ಲ ಆರೋಪಿಗಳನ್ನು ಬೆಂಗಳೂರಿನ ಹಜ್‌ ಭವನಕ್ಕೆ ಸ್ಥಳಾಂತರ ಮಾಡಿತ್ತು.

ರಾಜ್ಯ ಸರ್ಕಾರದ ಈ ನಿರ್ಧಾರಕ್ಕೆ ರಾಜ್ಯದಾದ್ಯಂತ ತೀವ್ರ ವಿರೋಧ ವ್ಯಕ್ತವಾಗಿತ್ತು. ವಿರೋಧ ಪಕ್ಷಗಳ ಮುಖಂಡರಾದ ಎಚ್.ಡಿ. ಕುಮಾರಸ್ವಾಮಿ, ಡಿ.ಕೆ. ಶಿವಕುಮಾರ್‍ ಸೇರಿದಂತೆ ಹಲವರು ಈ ನಿರ್ಧಾರವನ್ನು ಖಂಡಿಸಿದ್ದರು. ಇದರಿಂದಾಗಿ ರಾಮನಗರದ ವರ್ಚಸ್ಸಿಗೆ ಧಕ್ಕೆ ಆಗಲಿದ್ದು, ಇಲ್ಲಿನ ಜನರಿಗೆ ಸೋಂಕು ಹರಡಿದರೆ ಅದಕ್ಕೆ ಸರ್ಕಾರವೇ ಹೊಣೆ ಎಂದು ಎಚ್ಚರಿಸಿದ್ದರು. ರೇಷ್ಮೆಗೂಡು ಮಾರುಕಟ್ಟೆ ಸೇರಿದಂತೆ ಸುತ್ತಲಿನ ಪ್ರದೇಶಗಳಿಗೆ ಜನರು ಬರಲು ಹಿಂದೇಟು ಹಾಕುವಂತಹ ಪರಿಸ್ಥಿತಿ ನಿರ್ಮಾಣ ಆಗಿತ್ತು.