ನಗರದ ರೈಲು ನಿಲ್ದಾಣ ಬಳಿ ಇರುವ ಲೂರ್ದ್‌ ಮಾತೆಯ ಚರ್ಚಿನಲ್ಲಿ ಮಂಗಳವಾರ ಮಧ್ಯರಾತ್ರಿಯಿಂದಲೇ ಹಬ್ಬದ ಆಚರಣೆಗಳು ಆರಂಭಗೊಂಡಿದ್ದವು. ಫಾದರ್ ಡೇನಿಯಲ್‌ ಅಲೆಗ್ಸಾಂಡರ್‌ ನೇತೃತ್ವದಲ್ಲಿ ರಾತ್ರಿ 11.30ಕ್ಕೆ ಕ್ರಿಸ್‌ಮಸ್ ಗೀತೆಗಳನ್ನು ಹಾಡುವ ಮೂಲಕ ಚಾಲನೆ ದೊರೆಯಿತು. ರಾತ್ರಿ 12ಕ್ಕೆ ಬಾಲ ಏಸುವಿನ ಸ್ವರೂಪವನ್ನು ಸಾರುವ ಗೋಂದಲಿಯನ್ನು ಅನಾವರಣಗೊಳಿಸಲಾಯಿತು. ಬಳಿಕ ಏಸುವಿಗೆ ಪೂಜೆ ಸಲ್ಲಸಲಾಯಿತು. ‘ಜಗದಲ್ಲಿ ಶಾಂತಿ ನೆಲೆಸಲಿ. ಎಲ್ಲ ದುಃಖಿತರ ದುಃಖಗಳು ದೂರವಾಗಿ ಸುಖ–ನೆಮ್ಮದಿ’ ದೊರಕಲಿ ಎಂದು ಕೋರಿ ರಾತ್ರಿ 2 ಗಂಟೆಯವರೆಗೆ ಪ್ರಾರ್ಥನೆ ನಡೆಯಿತು. ನಂತರದಲ್ಲಿ ಕೇಕ್ ಕತ್ತರಿಸಿ ಎಲ್ಲರಿಗೂ ಹಂಚಲಾಯಿತು.
