ಸಾಲ ಪಾವತಿಗೆ ಸಮಯ ನೀಡಲು ಒತ್ತಾಯ

ತಾಲ್ಲೂಕಿನ ಹಾರೋಹಳ್ಳಿ ಹೋಬಳಿ ಕೊಳ್ಳಿಗನಹಳ್ಳಿ ಗ್ರಾಮದಲ್ಲಿರುವ ಕರ್ನಾಟಕ ಬ್ಯಾಂಕ್‌ ಸಾಲ ಪಡೆದಿರುವ ಸುತ್ತಮುತ್ತಲ ಗ್ರಾಮಗಳ ರೈತರಿಗೆ ಅಸಲು ಮತ್ತು ಬಡ್ಡಿಯ ಪೂರ್ಣ ಹಣವನ್ನು ಕಟ್ಟುವಂತೆ ಸೂಚಿಸಿದೆ. ಇದನ್ನು ವಿರೋಧಿಸಿ ನೂರಾರು ರೈತರು ಬ್ಯಾಂಕ್‌ ಮುಂದೆ ಜಮಾವಣೆಗೊಂಡು ಪ್ರತಿಭಟನೆ ನಡೆಸಿದರು.

ರೈತ ಮುಖಂಡರು ಮಾತನಾಡಿ, ‘ಎರಡು ವರ್ಷದಿಂದ ಕೊರೊನಾ ಸೋಂಕಿನಿಂದ ಎಲ್ಲರೂ ಕಷ್ಟಕ್ಕೆ ಸಿಲುಕಿ ಜೀವನ ನಡೆಸುವುದೇ ಕಷ್ಟವಾಗಿದೆ. ಇಂತಹ ಕಠಿಣ ಸಂದರ್ಭದಲ್ಲಿ ಬ್ಯಾಂಕ್‌ನವರು ಮಾನವೀಯತೆ ಮರೆತು ಸಾಲಮರುಪಾವತಿಸುವಂತೆ ಒತ್ತಾಯಿಸುತ್ತಿರುವುದು ಅಮಾನವೀಯ’ ಎಂದರು.

‘ಕೃಷಿಸಂಬಂಧಿತವಾಗಿ ರೈತರು ಸಾಲ ಪಡೆದಿದ್ದಾರೆ. ಆದರೆ ಈ ಬ್ಯಾಂಕಿನಲ್ಲಿ ಒಂದಕ್ಕೆ ಮೂರುಪಟ್ಟು, ನಾಲ್ಕು ಪಟ್ಟು ಆಗಿದೆ. ರೈತರಿಗೆ ಬಡ್ಡಿ ಚಕ್ರಬಡ್ಡಿ ವಿಧಿಸಿ ಬ್ಯಾಂಕ್‌ ತೊಂದರೆ ಕೊಡುತ್ತಿದ್ದು ಅದನ್ನು ಪರಿಶೀಲಿಸಿ ರೈತರಿಗೆ ವಿಧಿಸಿರುವ ಬಡ್ಡಿಯಲ್ಲಿ ರಿಯಾಯಿತಿ ನೀಡಿ ಉಳಿಕೆಯನ್ನು ಕಟ್ಟಿಸಿಕೊಳ್ಳಬೇಕು. ಬ್ಯಾಂಕಿನ ಹಿರಿಯ ಅಧಿಕಾರಿಗಳು ಇಲ್ಲಿಗೆ ಬಂದು ರೈತರೊಂದಿಗೆ ಮಾತನಾಡಬೇಕು’ ಎಂದು ಆಗ್ರಹಿಸಿದರು.

‘ಬ್ಯಾಂಕ್‌ ನಮ್ಮದು, ನಾವು ಪಡೆದಿರುವ ಸಾಲವನ್ನು ಕಟ್ಟುವುದಿಲ್ಲವೆಂದು ಹೇಳುವುದಿಲ್ಲ. ಈ ಭಾಗದಲ್ಲಿ ನಾಲೆಯಲ್ಲಿ ನೀರನ್ನು 6 ತಿಂಗಳಿನಿಂದ ನಿಲ್ಲಿಸಿದ್ದಾರೆ. ಡ್ಯಾಂ ಕೆಲಸ ಮುಗಿದ ಮೇಲೆ ನೀರು ಕೊಡುವುದು. ಅಲ್ಲಿಯ ತನಕ ವ್ಯವಸಾಯ ಮಾಡುವುದು ಕಷ್ಟವಾಗಿದೆ. ಸಾಲದ ಜತೆಗೆ ಸ್ವಲ್ಪ ಬಡ್ಡಿಯನ್ನು ಸೇರಿಸಿ ಕಟ್ಟುತ್ತೇವೆ’ ಎಂದರು. ಅಧಿಕಾರಿಗಳೊಂದಿಗೆ ಮಾತನಾಡಿ ರೈತರು ಮನೆಗಳಿಗೆ ವಾಪಸ್ಸಾದರು.

ರೈತ ಮುಖಂಡರಾದ ಬಾಲಾಜಿಸಿಂಗ್‌, ಸೊಂಟೇನಹಳ್ಳಿ ದಿನೇಶ್‌, ಸ್ವಾಮಿ, ನಾಗೇಶ್‌, ಯೋಗೇಶ್ವರರಾವ್‌, ಕರಿಯಪ್ಪ, ಅಂಕಮ್ಮ, ಕಾಳೇಗೌಡ, ನಂಜುಂಡಪ್ಪ, ಶಾಂತಮ್ಮ, ಗುರುವಯ್ಯ, ನಾಗರಾಜು ಉಪಸ್ಥಿತರಿದ್ದರು.