ಸಿನಿಮಾದಿಂದ ಪ್ರೇರಿತನಾಗಿ ಕೃತ್ಯ: ಪತ್ನಿ ಕೊಲೆಗೈದು ನಾಪತ್ತೆ ಕತೆ ಕಟ್ಟಿದ್ದ ಪತಿ

ತಾಲ್ಲೂಕಿನ ಹೂಜಗಲ್ ಗ್ರಾಮದ ಕಿರಣ್ (37) ಬಂಧಿತ ಆರೋಪಿ. ಪೂಜಾ (28) ಕೊಲೆಯಾದವರು. ಹದಿನೈದು ದಿನಗಳ ಹಿಂದೆ ಗ್ರಾಮದ ಹೊರವಲಯದ ಚೀಳೂರು ಬೆಟ್ಟದಲ್ಲಿ ಉಮೇಶ್ ಎಂಬಾತ, ತನ್ನ ಪತ್ನಿ ದಿವ್ಯ ಎಂಬುವರನ್ನು ಆಗಸ್ಟ್‌ 12ರಂದು ಕೊಲೆ ಮಾಡಿದ್ದ. ಅದಕ್ಕೆ ಸ್ನೇಹಿತ ಕಿರಣ್ ಸಾಥ್ ಕೊಟ್ಟಿದ್ದ. ಆತನನ್ನು ಮಾಗಡಿ ಪೊಲೀಸರು ಬಂಧಿಸಿ ವಿಚಾರಣೆಗೆ ಒಳಪಡಿಸಿದಾಗ, ಹಿಂದಿನ ಕೃತ್ಯ ಬೆಳಕಿಗೆ ಬಂದಿದೆ.

ಶಂಕಾಸ್ಪದ ಹೇಳಿಕೆ: ದಿವ್ಯ ಪ್ರಕರಣಕ್ಕೆ ಸಂಬಂಧಿಸಿದಂತೆ ಕಿರಣ್‌ನನ್ನು ವಿಚಾರಣೆ ನಡೆಸುವಾಗ, ‘ನಿನಗೆ ಮದುವೆಯಾಗಿದೆಯೇ’ ಎಂದು ಪ್ರಶ್ನಿಸಲಾಯಿತು. ಅದಕ್ಕೆ ಆತ, ‘ಮದುವೆಯಾಗಿದ್ದು ಸದ್ಯ 5 ವರ್ಷದ ಮಗಳಿದ್ದಾಳೆ. ಆದರೆ, ಹತ್ತು ವರ್ಷದ ಹಿಂದೆ ಪತ್ನಿ ಬೇರೊಬ್ಬನ ಜತೆ ಓಡಿ ಹೋಗಿದ್ದಾಳೆ. ಇದುವರೆಗೆ ಸಿಕ್ಕಿಲ್ಲ. ಕಾಣೆಯಾಗಿರುವ ಕುರಿತು ದೂರು ಕೊಟ್ಟಿದ್ದೇನೆ’ ಎಂದು ಹೇಳಿಕೆ ನೀಡಿದ್ದ ಎಂದು ಪೊಲೀಸರು ಹೇಳಿದರು.

ಆತನ ಹೇಳಿಕೆ ಮೇರೆಗೆ ಠಾಣೆಯಲ್ಲಿ ಪರಿಶೀಲಿಸಿದಾಗ ದೂರು ಬಂದಿಲ್ಲದಿರುವುದು ಗೊತ್ತಾಯಿತು. ಮತ್ತೆ ವಿಚಾರಿಸಿದಾಗ, ‘ಐದು ವರ್ಷದ ಹಿಂದೆ ಇಬ್ಬರು ಸ್ನೇಹಿತರೊಂದಿಗೆ ಬಂದು ದೂರು ಕೊಟ್ಟಿದ್ದೇನೆ’ ಎಂದಿದ್ದ. ‘ಸ್ನೇಹಿತರನ್ನು ವಿಚಾರಿಸಿದಾಗ, ನಾವ್ಯಾರೂ ಬಂದೇ ಇಲ್ಲ. ಕಿರಣ್ ಸುಳ್ಳು ಹೇಳುತ್ತಿದ್ದಾನೆ’ ಎಂದಿದ್ದರು.

ಅನುಮಾನದ ಮೇರೆಗೆ ಪೂಜಾ ಅವರ ತಾಯಿ ಗೌರಮ್ಮ ಅವರನ್ನು ವಿಚಾರಿಸಿದಾಗ, ‘ಐದು ವರ್ಷದಿಂದ ಮಗಳು ಕಾಣುತ್ತಿಲ್ಲ. ಇವನು ಅದೇನು ಮಾಡಿದ್ದಾನೊ ಗೊತ್ತಿಲ್ಲ’ ಎಂದು ಹೇಳಿದರು. ಕಿರಣ್ ಮತ್ತು ಇತರರ ಹೇಳಿಕೆ  ತಾಳೆಯಾಗದಿದ್ದಾಗ, ಮತ್ತೆ ಆತನನ್ನು ವಿಚಾರಣೆ ನಡೆಸಿದಾಗ ಕೃತ್ಯ ಬಾಯಿಟ್ಟ ಎಂದು ಪೊಲೀಸರು ಹೇಳಿದರು.