ಆರ್.ಆರ್ ಆಸ್ಪತ್ರೆಗೆ ಆಮ್ಲಜನಕ ಪೂರೈಕೆ

ಸೋಮವಾರ ಮಧ್ಯಾಹ್ನದ ವೇಳೆಗೆ ಆಸ್ಪತ್ರೆಯಲ್ಲಿ ಆಮ್ಲಜನಕ ಖಾಲಿಯಾಗಿದ್ದು, ಸ್ಥಳೀಯ ಆಡಳಿತ ಮಂಡಳಿ ಈ ವಿಷಯವನ್ನು ಹಲವರ ಗಮನಕ್ಕೆ ತಂದಿತ್ತು. ಸಂಸದ ಡಿ.ಕೆ. ಸುರೇಶ್‌ ಸಹ ಈ ಬಗ್ಗೆ ಸಾಮಾಜಿಕ ಜಾಲತಾಣಗಳಲ್ಲಿ ವಿಡಿಯೊ ಹರಿಬಿಟ್ಟು, ‘200 ರೋಗಿಗಳು ಸಾವು–ಬದುಕಿನ ನಡುವೆ ಹೋರಾಡುತ್ತಿದ್ದಾರೆ. ತುರ್ತುಕ್ರಮ ಕೈಗೊಳ್ಳದೇ ಹೋದರೆ ಇನ್ನೊಂದು ದುರಂತ ಸಂಭವಿಸಲಿದೆ’ ಎಂದು ಎಚ್ಚರಿಸಿದ್ದರು.

ನಂತರದಲ್ಲಿ ರೋಗಿಗಳ ಹಿತದೃಷ್ಟಿಯಿಂದ ತ್ವರಿತವಾಗಿ ಆಮ್ಲಜನಕ ಪೂರೈಕೆಗೆ ಒತ್ತಾಯಿಸಿ ಸಂಸದ ಸುರೇಶ್‌ ಮತ್ತಿತರರು ಅಧಿಕಾರಿಗಳ ಜೊತೆ ಸಭೆ ನಡೆಸಿದರು. ಜನಪ್ರತಿನಿಧಿಗಳು ಹಾಗೂ ಆಡಳಿತ ಮಂಡಳಿ ಮನವಿ ಬಳಿಕ ಸರ್ಕಾರ ಸಣ್ಣ ಸಿಲೆಂಡರ್‌ಗಳನ್ನು ನೀಡಿದ್ದು, ‘ಬಳ್ಳಾರಿಯಿಂದ ಸಿಲಿಂಡರ್ ಪೂರೈಕೆಗೆ 16 ಗಂಟೆ ಬೇಕು. ಹೀಗಾಗಿ ಪಾಲಕ್ಕಾಡ್‌ನಿಂದ ಸದ್ಯಕ್ಕೆ ಆಮ್ಲಜಕ ಪೂರೈಸಲಾಗುವುದು’ ಎಂದು ಸರ್ಕಾರದ ಮುಖ್ಯ ಕಾರ್ಯದರ್ಶಿ ಭರವಸೆ ನೀಡಿದರು.

ಕಡೆಗೂ ಆಸ್ಪತ್ರೆಗೆ ಆಮ್ಲಜನಕ ಸಿಲಿಂಡರ್‌ಗಳು ಪೂರೈಕೆ ಆಗಿದ್ದು, ಸಮಸ್ಯೆ ತಕ್ಕಮಟ್ಟಿಗೆ ಬಗೆಹರಿದಿದೆ. ರಾಜರಾಜೇಶ್ವರಿ ಆಸ್ಪತ್ರೆಯಲ್ಲಿ ರಾಮನಗರದ 200 ಸೇರಿದಂತೆ 500ಕ್ಕೂ ಹೆಚ್ಚು ಕೋವಿಡ್ ಸೋಂಕಿತರು ಚಿಕಿತ್ಸೆ ಪಡೆಯುತ್ತಿದ್ದಾರೆ.