ರಾಮನಗರಕ್ಕೆ ಸಿಗುವುದೇ ‘ಬೆಂಗಳೂರು’ ಸ್ಪರ್ಶ

ವೈಯಕ್ತಿಕ ಹಿತಾಸಕ್ತಿ ಅಡಗಿದೆ: ಡಿ.ಕೆ. ಶಿವಕುಮಾರ್ ಅವರ ಮಾತಿನಲ್ಲಿ ರಾಮನಗರ ಜಿಲ್ಲೆಯ ಹಿತಾಸಕ್ತಿಗಿಂತ ವೈಯಕ್ತಿಕ ಹಿತಾಸಕ್ತಿಯೇ ಎದ್ದು ಕಾಣುತ್ತಿದೆ. ಹೆಸರು ಬದಲಾವಣೆ ಮಾಡಿದರೆ ಅಥವಾ ಬೆಂಗಳೂರಿಗೆ ಸೇರಿಸುವುದರಿಂದ ಅವರಿಗೆ ವೈಯಕ್ತಿಕ ಅನುಕೂಲಗಳಿರಬಹುದೇ ಹೊರತು ಜಿಲ್ಲೆಗಲ್ಲ. ಅವರು ಎಲ್ಲವನ್ನೂ ವ್ಯವಹಾರಿಕವಾಗಿಯೇ ನೋಡುತ್ತಾರೆ. ಭೂಮಿಗೆ ಚಿನ್ನದ ಬೆಲೆ ಬಂದರೆ ಅಭಿವೃದ್ಧಿಯ ಹೊಳೆ ಹರಿಯುತ್ತದೆಯೇ? ಅದರ ಸಾಧಕ–ಬಾಧಕಗಳೇನು ಎಂಬುದರ ಅರಿವಿದೆಯೇ? ಹಳ್ಳಿ ಜನ ಬೆಂಗಳೂರಿಗೆ ಹೋಗುವುದನ್ನು ತಪ್ಪಿಸುವ ಹಾಗೂ ಆಡಳಿತಾತ್ಮಕ ದೃಷ್ಟಿಯಿಂದ ರಾಮನಗರವನ್ನು ಜಿಲ್ಲೆ ರಚನೆಯಾಗಿದೆ. ಇದರಿಂದ ಸಾಕಷ್ಟು ಅನುಕೂಲಗಳಾಗಿವೆ. ಒಕ್ಕಲಿಗರ ರಾಜಕಾರಣದ ಭಾಗವಾಗಿ ಅವರ ಹೇಳಿಕೆಯನ್ನು ಗ್ರಹಿಸಿದರೂ ಕೆಂಪೇಗೌಡರು ಕಟ್ಟಿದ ಬೆಂಗಳೂರಿನಲ್ಲಿ ಒಕ್ಕಲಿಗರೇ ರಾಜಕೀಯವಾಗಿ ಪ್ರಾಬಲ್ಯವಾಗಿದ್ದಾರೆ. ಕನಕಪುರ ಅಥವಾ ಇಡೀ ರಾಮನಗರ ಜಿಲ್ಲೆ ಅದಕ್ಕೆ ಸೇರಿಕೊಂಡರೂ ಅಂತಹ ಬದಲಾವಣೆ ನಿರೀಕ್ಷಿಸಲು ಸಾಧ್ಯವಿಲ್ಲ. ತಾವು ಬೆಂಗಳೂರಿಗೆ ಸೇರಿದವರು ಎನ್ನುವ ಶಿವಕುಮಾರ್ ಅವರು ಇದೀಗ ಬೆಂಗಳೂರು ಅಭಿವೃದ್ಧಿ ಉಸ್ತುವಾರಿ ವಹಿಸಿಕೊಂಡಿದ್ದಾರೆ. ಅಭಿವೃದ್ಧಿಯೇ ಅವರ ಉದ್ದೇಶವಾಗಿದ್ದರೆ ಕೈಯಲ್ಲಿರುವ ಅಧಿಕಾರ ಬಳಸಿಕೊಂಡು ಜಿಲ್ಲೆಯನ್ನು ಅಭಿವೃದ್ಧಿ ಮಾಡಲಿ. ಬರ ಸೇರಿದಂತೆ ರಾಜ್ಯ ಹಲವು ಸಮಸ್ಯೆಗಳನ್ನು ಎದುರಿಸುತ್ತಿದೆ. ಇಂತಹ ಸಂದರ್ಭದಲ್ಲಿ ಅನಗತ್ಯ ವಿಷಯಗಳ ಪ್ರಸ್ತಾಪವೇಕೆ?

‘ಬೆಂಗಳೂರು ಸೇರಿದಾಕ್ಷಣ ಅಸ್ತಿತ್ವ ಅಳಿಯುವುದಿಲ್ಲ’ ರಾಮನಗರದ ಬಹುಸಂಖ್ಯಾತರಿಗೆ ಈಗಲೂ ತಾವು ಹಿಂದಿನಂತೆ ಬೆಂಗಳೂರು ಜಿಲ್ಲೆಯ ಭಾಗವಾಗಬೇಕೆಂಬ ಅಭಿಲಾಷೆ ಇದೆ. ರಾಮನಗರ ಜಿಲ್ಲೆ ರದ್ದಾಗಿ ವಿಶ್ವ ಭೂಪಟದಲ್ಲಿ ವಿಶೇಷ ಸ್ಥಾನ ಪಡೆದಿರುವ ಬೆಂಗಳೂರಿನ ಭಾಗವಾಗುವುದರಿಂದ ರಾಮನಗರ ಸಹ ಆ ಭೂಪಟದಲ್ಲಿ ರಾರಾಜಿಸುತ್ತದೆ. ಇದರಿಂದ ನಮ್ಮ ಅಸ್ತಿತ್ವ ಅಳಿಯುವುದಿಲ್ಲ. ಮಹತ್ವವೂ ಕಮ್ಮಿಯಾಗುವುದಿಲ್ಲ. ಸದ್ಯ ಡಿ.ಕೆ. ಶಿವಕುಮಾರ್ ಅವರು ಕೇವಲ ಕನಕಪುರವನ್ನು ಮಾತ್ರ ಬೆಂಗಳೂರಿಗೆ ಸೇರಿಸುತ್ತಾರೊ ಅಥವಾ ಇಡೀ ಜಿಲ್ಲೆಯನ್ನೇ ಸೇರಿಸುತ್ತಾರೊ ಎಂಬುದರ ಬಗ್ಗೆ ಸ್ಪಷ್ಟತೆ ಇಲ್ಲ. ಕನಕಪುರವನ್ನು ಮಾತ್ರ ಸೇರಿಸಿದರೆ ಉಳಿದ ತಾಲ್ಲೂಕಿನವರಿಗೆ ಅವರು ದ್ರೋಹ ಮಾಡಿದಂತಾಗುತ್ತದೆ. ಏಕೆಂದರೆ ಜಿಲ್ಲೆಯ ಕಾಂಗ್ರೆಸ್ಸಿಗರೆಲ್ಲರೂ ಅವರನ್ನು ನೆಚ್ಚಿಕೊಂಡೇ ರಾಜಕೀಯ ಮಾಡುತ್ತಾ ಬಂದಿದ್ದಾರೆ. ಅವರು ಹಾಗೆ ಮಾಡುವುದಿಲ್ಲ ಎಂಬ ವಿಶ್ವಾಸ ನನಗಿದೆ. ಶಿವಕುಮಾರ್ ಅವರ ಮಾತಿಗೆ ಎಚ್‌.ಡಿ. ಕುಮಾರಸ್ವಾಮಿ ಯಾಕೆ ವಿರೋಧ ವ್ಯಕ್ತಪಡಿಸುತ್ತಿದ್ದಾರೊ ಗೊತ್ತಿಲ್ಲ. ರಾಮನಗರವು ಬೆಂಗಳೂರು ಸೇರಿದರೂ ಎಚ್‌ಡಿಕೆ ಅವರ ಎರಡು ಕಣ್ಣುಗಳಾದ ರಾಮನಗರ ಮತ್ತು ಚನ್ನಪಟ್ಟಣ ವಿಧಾನಸಭಾ ಕ್ಷೇತ್ರಗಳು ಅಸ್ತಿತ್ವದಲ್ಲಿರಲಿವೆ. ಅವರ ಯಾವ ಕಣ್ಣಿಗೂ ಬಾಧೆಯಾಗುವುದಿಲ್ಲ.

‘ಜಿಲ್ಲೆ ಅಭಿವೃದ್ಧಿಗೆ ಸಂಕಲ್ಪ ಮಾಡಲಿ’ ಜಿಲ್ಲೆ ಅಚ್ಚುಕಟ್ಟಾಗಿ ನಡೆದುಕೊಂಡು ಹೋಗುತ್ತಿದೆ. ಕನಕಪುರವನ್ನು ಬೆಂಗಳೂರಿಗೆ ಸೇರಿಸುವುದು ಅಥವಾ ಬೆಂಗಳೂರನ್ನು ಕನಕಪುರಕ್ಕೆ ತರುವುದು ಬೇರೆ ವಿಚಾರ. ಆದರೆ ಜಿಲ್ಲೆಯ ನಾಯಕರಾಗಿ ಶಿವಕುಮಾರ್ ಅವರು ಇಲ್ಲಿಗೆ ಹೊಸ ಯೋಜನೆಗಳನ್ನು ತಂದು ಅಭಿವೃದ್ಧಿಗೆ ಹೊಸ ಸಂಕಲ್ಪ ಮಾಡಲಿ. ಆ ಶಕ್ತಿಯೂ ಅವರಿಗಿದೆ. ನವ ಬೆಂಗಳೂರು ನಿರ್ಮಾಣ ಚಿಂತನೆಯನ್ನು ಜಿಲ್ಲೆಯಲ್ಲಿ ಸಾಕಾರಗೊಳಿಸಲಿ. ಅದಕ್ಕೆ ಪೂರಕವಾದ ಸೌಕರ್ಯಗಳು ಇಲ್ಲಿವೆ. ಆದರೆ ಹೆಸರು ಬದಲಾವಣೆಯಿಂದ ಏನೂ ಆಗುವುದಿಲ್ಲ. ಈ ಕುರಿತು ಹದಿನಾರು ವರ್ಷಗಳಿಂದ ಚರ್ಚೆ ಮಾಡದವರು ಇಂದು ಯಾಕೆ ಈ ವಿಷಯ ಪ್ರಸ್ತಾಪ ಮಾಡುತ್ತಿದ್ದಾರೆ. ಅವರು ರಾಮನಗರವನ್ನು ಬ್ರ್ಯಾಂಡ್ ಬೆಂಗಳೂರು ಮಾಡುವುದಿಲ್ಲ. ಬದಲಿಗೆ ಅಲ್ಲಿನ ಕಸ ತಂದು ಹಾಕಲು ಮುಂದಾಗಿದ್ದಾರೆ.

ಜಿಲ್ಲೆಯ ಅಸ್ಮಿತೆ ಉಳಿಸಿಕೊಳ್ಳಲಿ: ಜನರಿಗೆ ಅನಾನುಕೂಲವಾಗುತ್ತಿದ್ದ ಕಾರಣಕ್ಕೆ ಎಲ್ಲಾ ರೀತಿಯಿಂದಲೂ ಚಿಂತನೆ ನಡೆಸಿ ಬೆಂಗಳೂರು ಗ್ರಾಮಾಂತರದಿಂದ ಬೇರ್ಪಡಿಸಿ ರಾಮನಗರ ಜಿಲ್ಲೆ ರಚಿಸಲಾಗಿತ್ತು. ಈಗ ಮತ್ತೆ ಅಲ್ಲಿಗೆ ಸೇರಿಕೊಂಡು ತೊಂದರೆ ಅನುಭವಿಸಬೇಕೇ. ರಾಮನಗರ ಜಿಲ್ಲೆಯಾದ ಬಳಿಕ ಜನರಿಗೆ ಎಲ್ಲಾ ರೀತಿಯಿಂದಲೂ ಅನುಕೂಲವಾಗಿದೆ. ರಾಜಕಾರಣಿಗಳು ಬಾಯಿ ಚಪಲಕ್ಕೆ ಮಾತನಾಡುವುದು ಸರಿಯಲ್ಲ. ಅಭಿವೃದ್ಧಿಯೇ ಅವರ ಆದ್ಯತೆಯಾಗಿದ್ದರೆ ನಮ್ಮ ಜಿಲ್ಲೆಯ ಅಸ್ಮಿತೆಗೆ ಧಕ್ಕೆಯಾಗದಂತೆ ಅಭಿವೃದ್ಧಿ ಮಾಡಲಿ.

‘ಸಾಂಸ್ಕೃತಿಕ ಬದುಕಿನ ಮೇಲೆ ಪರಿಣಾಮ’ ಅನೇಕ ಕನಸುಗಳೊಂದಿಗೆ ಜಿಲ್ಲೆ ರಚನೆಯಾಗಿದೆ. ಹದಿನಾರರ ಹರೆಯದ ಜಿಲ್ಲೆಯ ಸಮಗ್ರ ಅಭಿವೃದ್ಧಿಗೆ ಒತ್ತು ಕೊಡದೆ ಏಕಾಏಕಿ ಬೆಂಗಳೂರಿಗೆ ಸೇರಿಸುವುದರಿಂದ ಯಾವುದೇ ಪ್ರಯೋಜನವಿಲ್ಲ. ಜಿಲ್ಲೆಗೆ ತನ್ನದೇ ಆದ ಸಾಂಸ್ಕೃತಿಕ ಹಿನ್ನೆಲೆ ಇದೆ. ಬೆಂಗಳೂರಿಗೆ ಜಿಲ್ಲೆ ಸೇರ್ಪಡೆಯಾದರೆ ಅತ್ತ ನಗರತನವನ್ನು ಇತ್ತ ಗ್ರಾಮೀಣತನವನ್ನು ಉಳಿಸಿಕೊಳ್ಳಲಾಗದ ಸ್ಥಿತಿಗೆ ತಲುಪಲಿದೆ. ಸಾಂಸ್ಕೃತಿಕ ಬದುಕಿನ ಮೇಲೆ ಗಂಭೀರ ಪರಿಣಾಮ ಬೀರಲಿದೆ. ಭೂಮಿ ಬೆಲೆ ಹೆಚ್ಚಾದರೆ ಅಥವಾ ಕೈಗಾರಿಕೋದ್ಯಮ ಇತ್ತ ಬಂದರೆ ಕೆಲವರಷ್ಟೇ ಅಭಿವೃದ್ಧಿಯಾಗಬಹುದು. ಅಭಿವೃದ್ಧಿಗಾಗಿ ಜಿಲ್ಲೆ ಬೆಂಗಳೂರು ಸೇರಬೇಕಿಲ್ಲ. ರಾಜಕಾರಣಿಗಳು ತಮ್ಮ ಅಧಿಕಾರ ಬಳಸಿ ಬೆಂಗಳೂರು ನಾಚುವಂತೆ ಜಿಲ್ಲೆಯನ್ನು ಅಭಿವೃದ್ಧಿಪಡಿಸಲಿ. ಅದಕ್ಕೆ ಮುನ್ನುಡಿ ಬರೆಯಲು ಇದು ಸಕಾಲ.

‘ಗಿಡ ಕಿತ್ತು ಬೇರೆ ಕಡೆ ನೆಡುವ ಪ್ರಯತ್ನ ಬೇಡ’ ಒಂದು ಗಿಡ ಪ್ರತ್ಯೇಕವಾಗಿದ್ದರೆ ಅದನ್ನು ಸಮೃದ್ಧವಾಗಿ ಬೆಳೆಸಬಹುದು. ಬದಲಿಗೆ ಅದನ್ನ ಕಿತ್ತುಕೊಂಡು ಹೋಗಿ ನಗರದಲ್ಲಿಟ್ಟುಕೊಂಡರೆ ಅದು ನಾಮಕಾವಸ್ಥೆಯಾಗಲಿದೆ. ಇದರಿಂದ ಅದು ಅವನತಿ ಸಹ ಹೊಂದಬಹುದು. ರಾಮನಗರವು ಬೆಂಗಳೂರಾದರೆ ಮೆಟ್ರೊ ಬರಬಹುದು ಸೂಟು ಬೂಟಿನವರು ಬಂಡವಾಳ ಹೂಡಬಹುದು. ಇದರ ಜೊತೆಗೆ ಕಸದ ಗುಡ್ಡೆ ಬೆಳೆದು ಹಲವು ಸಮಸ್ಯೆಗಳು ಉದ್ಭವಿಸಲಿವೆ. ಬೆಂಗಳೂರಿಗೆ ಜಿಲ್ಲೆಯನ್ನು ಸೇರಿಸುವುದು ತರವಲ್ಲ. ಹಳ್ಳಿಗಳ ಭವಿಷ್ಯದ ಬಗ್ಗೆಯೂ ಯೋಚಿಸಬೇಕು. ನಾವು ವರ್ತಮಾನಕ್ಕೆ ಕುಣಿಯದೆ ಭವಿಷ್ಯದ ಬಗ್ಗೆಯೂ ಚಿಂತಿಸಬೇಕು.

‘ವೈಯಕ್ತಿಕ ಹಿತಾಸಕ್ತಿ ತರಬಾರದು’ ಡಿ.ಕೆ. ಶಿವಕುಮಾರ್ ಅವರ ಹೇಳಿಕೆ ಅಭಿವೃದ್ಧಿ ಕಾರಣಕ್ಕೊ ಅಥವಾ ವೈಯಕ್ತಿಕ ಅಜೆಂಡಾ ಅಡಗಿದೆಯೊ ಎಂಬುದು ಗೊತ್ತಾಗಿಲ್ಲ. ಇಂತಹ ವಿಷಯದಲ್ಲಿ ವೈಯಕ್ತಿಕ ಹಿತಾಸಕ್ತಿ ತರಬಾರದು. ನಾವೆಲ್ಲರೂ ಜಿಲ್ಲೆಯ ಅಭಿವೃದ್ಧಿಯನ್ನು ಗಮನದಲ್ಲಿಟ್ಟುಕೊಂಡು ರಾಜಕಾರಣ ಮಾಡಬೇಕಾಗುತ್ತದೆ. ಅವರ ಬೆಂಗಳೂರು ಕೇಂದ್ರಿತ ರಾಜಕೀಯ ಕಾರಣಕ್ಕಾಗಿ ರಾಮನಗರ ಜಿಲ್ಲೆಯ ಸ್ವರೂಪ ಬದಲಾವಣೆಗೆ ಮುಂದಾಗಿರುವುದು ಸರಿಯಲ್ಲ. ಜಿಲ್ಲೆ ರಚನೆ ಹಿಂದೆ ಒಳ್ಳೆಯ ಉದ್ದೇಶವಿತ್ತೇ ವಿನಾ ಬೇರಾವುದೇ ಅಜೆಂಡಾವಿರಲಿಲ್ಲ. ಅದರಿಂದ ಜನರಿಗೆ ಅನುಕೂಲವಾಗಿರುವುದೇ ಸಾಕ್ಷಿ. ಜಿಲ್ಲೆಯವರಾದ ಡಿ.ಕೆ. ಶಿವಕುಮಾರ್ ಅವರು ಮುಖ್ಯಮಂತ್ರಿಯಾಗುತ್ತಾರೆಂಬ ನಿರೀಕ್ಷೆ ಇಟ್ಟುಕೊಂಡು ಜನ ಅವರಿಗೆ ಅಧಿಕಾರ ಕೊಟ್ಟಿದ್ದಾರೆ. ಅದನ್ನು ಜಿಲ್ಲೆಯ ಅಭಿವೃದ್ಧಿಗೆ ಬಳಸಲಿ.

‘ಜನರ ದಿಕ್ಕು ತಪ್ಪಿಸುವ ಕೆಲಸ’ ಬರದ ಹೊತ್ತಿನಲ್ಲಿ ಜಿಲ್ಲೆಯ ಹೆಸರು ಬದಲಾವಣೆ ಅಥವಾ ಬೆಂಗಳೂರಿಗೆ ಸೇರಿಸುವ ಇಂಗಿತ ವ್ಯಕ್ತಪಡಿಸಿರುವ ಡಿ.ಕೆ. ಶಿವಕುಮಾರ್ ಅವರು ಜನರ ದಿಕ್ಕು ತಪ್ಪಿಸುವ ಕೆಲಸ ಮಾಡುತ್ತಿದ್ದಾರೆ. ತಮ್ಮ ರಾಜಕೀಯ ಬೇಳೆ ಬೇಯಿಸಿಕೊಳ್ಳಲು ಮನಸ್ಸಿಗೆ ಬಂದಿದ್ದನ್ನು ಹೇಳುತ್ತಿದ್ದಾರೆ. ಬೆಂಗಳೂರು ಗ್ರಾಮಾಂತರದಿಂದ ಜಿಲ್ಲೆ ವಿಭಜನೆಗೊಂಡ ನಂತರ ನಿಟ್ಟುಸಿರು ಬಿಟ್ಟಿರುವ ಜನ ಮತ್ತೆ ರಾಜಧಾನಿಗೆ ಅಲೆಯಬೇಕೇ? ಇಂತಹ ಕೆಲಸಕ್ಕೆ ಬಾರದ ವಿಷಯಗಳ ಬದಲು ಅಭಿವೃದ್ಧಿ ಕೆಲಸಗಳ ಕಡೆಗೆ ಗಮನ ಹರಿಸಲಿ.

‘ರಾಜಕೀಯ ಮೇಲಾಟದ ಮಾತು ಬಿಡಿ’ ಬೆಂಗಳೂರಿಗೆ ಸೇರ್ಪಡೆಯಾದರೆ ರಾಮನಗರಕ್ಕೆ ಎರಡು ಕೋಡು ಬರುವುದಿಲ್ಲ. ಇದರಿಂದ ಯಾವ ಪ್ರಯೋಜನವೂ ಆಗುವುದಿಲ್ಲ. ಶಿವಕುಮಾರ್ ಅವರು ಇಂತಹ ರಾಜಕೀಯ ಮೇಲಾಟದ ಮಾತುಗಳನ್ನಾಡುವುದ್ನು ಬಿಡಬೇಕು. ಅವರ ಉದ್ದೇಶವೇನು ಎಂಬುದನ್ನು ಸ್ಪಷ್ಟಪಡಿಸಬೇಕು. ಅವರ ಹೇಳಿಕೆ ಹಿಂದೆ ರಿಯಲ್ ಎಸ್ಟೇಟ್ ದಂಧೆ ನಡೆಸುವ ಅನುಮಾನವಿದೆ. ಇದರಿಂದ ಬೆಂಗಳೂರು ಸೇರಿದಂತೆ ನಮ್ಮ ರೈತರ ಜಮೀನುಗಳು ಬೇರೆ ದೇಶಗಳ ರಾಜ್ಯಗಳ ಬಂಡವಾಳಶಾಹಿಗಳ ಪಾಲಾಗಲಿದೆ. ಒಕ್ಕಲುತನ ಮಾಯವಾಗಲಿದೆ. ಹಾಗಾಗಿ  ಇಂತಹ ಪ್ರಯತ್ನಗಳನ್ನು ಬಿಡಿ. ಏನೇ ಮಾಡುವುದಿದ್ದರೂ ಜನಾಭಿಪ್ರಾಯ ಸಂಗ್ರಹಿಸಬೇಕು.