ರಾಮನಗರ: ಬಿಡದಿಯ ವಂಡರ್ಲಾ ಅಮ್ಯೂಸ್ಮೆಂಟ್ ಪಾರ್ಕ್ ಮಹಿಳಾ ದಿನಾಚರಣೆ ಅಂಗವಾಗಿ ಪಾರ್ಕ್ಗೆ ವಿಶೇಷ ಕೊಡುಗೆ ಘೋಷಿಸಿದ್ದು, ಇದನ್ನು ನೆಚ್ಚಿ ಬಂದ ಸಾವಿರಾರು ಮಹಿಳೆಯರು ಟಿಕೆಟ್ ಸಿಗದೆ ನಿರಾಸೆಯಿಂದ ವಾಪಸ್ ಆದರು.
ಮಹಿಳಾ ದಿನದ ಅಂಗವಾಗಿ ವಂಡರ್ಲಾ ಮಂಗಳವಾರ ಇಡೀ ಪಾರ್ಕ್ ಅನ್ನು ಸ್ತ್ರೀಯರಿಗಾಗಿ ಮೀಸಲಿಟ್ಟಿತ್ತು. ಅಂತೆಯೇ ಒಂದು ಟಿಕೆಟ್ ಕೊಂಡಲ್ಲಿ ಮತ್ತೊಬ್ಬ ಮಹಿಳೆಗೆ ಉಚಿತ ಪ್ರವೇಶದ ಕೊಡುಗೆ ನೀಡಿತ್ತು. ಸಾಕಷ್ಟು ಮುಂಚೆಯೇ ಆನ್ಲೈನ್ ಬುಕ್ಕಿಂಗ್ ಆರಂಭ ಆಗಿತ್ತು. ಬುಕ್ಕಿಂಗ್ ಹೆಚ್ಚಾದ ಹಿನ್ನೆಲೆಯಲ್ಲಿ ಮೂರು ದಿನದ ಹಿಂದೆಯೇ ಆನ್ಲೈನ್ ಬುಕ್ಕಿಂಗ್ ನಿಲ್ಲಿಸಲಾಗಿತ್ತು.
ಮುಂಜಾನೆ 6ರಿಂದಲೇ ಪಾರ್ಕಿನಲ್ಲಿ ಟಿಕೆಟ್ ಕೌಂಟರ್ಗಳು ತೆರೆದಿದ್ದು, 10 ಗಂಟೆ ವೇಳೆಗೆಲ್ಲ ಎಲ್ಲಾ ಟಿಕೆಟ್ಗಳು ಮಾರಾಟ ಆದವು. ಪಾರ್ಕ್ ಒಟ್ಟು 12 ಸಾವಿರ ಮಂದಿ ಪ್ರವೇಶ ಸಾಮರ್ಥ್ಯ ಹೊಂದಿದ್ದು, ಕೋವಿಡ್ ಮಾರ್ಗಸೂಚಿ ಕಾರಣಕ್ಕೆ 5–6 ಸಾವಿರ ಮಂದಿಗೆ ಪ್ರವೇಶ ಸೀಮಿತಗೊಳಿಸಲಾಯಿತು.
ಆದರೆ, ಇನ್ನೂ ಸಾವಿರಾರು ಸಂಖ್ಯೆಯಲ್ಲಿ ಮಹಿಳೆಯರು ಬಂದಿದ್ದು, ಟಿಕೆಟ್ ಸಿಗದ ಕಾರಣಕ್ಕೆ ನಿರಾಸೆ ಗೊಂಡರು. ಈ ಬಗ್ಗೆ ವಂಡರ್ಲಾ ಸಿಬ್ಬಂದಿ ಜೊತೆ ವಾಗ್ದಾದ ನಡೆಸಿದರು. ಕಡೆಗೆ ಪೊಲೀಸರು ಮಧ್ಯ ಪ್ರವೇಶಿಸಿ, ಅಲ್ಲಿಂದ ಕಳುಹಿಸಿದರು.