ವಾಹನ ದಟ್ಟಣೆ .. ಜನಸಂಚಾರಕ್ಕೆ ಅಡಚಣೆ...

ಇಲ್ಲಿನ ಡಾ.ರಾಜಕುಮಾರ್ ರಸ್ತೆ, ಚನ್ನಗಿರಿ ರಸ್ತೆ, ಬಸವೇಶ್ವರ ವೃತ್ತ, ರಂಗಪ್ಪ ವೃತ್ತ, ಡಬಲ್ ಟಾಕೀಸ್ ರಸ್ತೆಗಳು ನಿತ್ಯ ಜನದಟ್ಟಣೆಯಿಂದ ಕೂಡಿರುತ್ತವೆ. ಶಾಲೆ– ಕಾಲೇಜುಗಳಿಗೆ ಬರುವ ವಿದ್ಯಾರ್ಥಿಗಳು, ಸರ್ಕಾರಿ ಕಚೇರಿಗಳಿಗೆ, ಮಾರುಕಟ್ಟೆಗೆ ಬರುವ ಗ್ರಾಮಸ್ಥರು ಈ ಪ್ರದೇಶಗಳಲ್ಲಿ ಹೆಚ್ಚು ತಿರುಗಾಡುತ್ತಾರೆ.

ಡಾ. ರಾಜಕುಮಾರ್ ರಸ್ತೆಯಲ್ಲಿ ಬೀದಿಬದಿಯ ವ್ಯಾಪಾರಿಗಳು ನಿಗದಿಪಡಿಸಿದ ಸ್ಥಳದಿಂದ ಮುಂದೆ ಬಂದು ರಸ್ತೆಯನ್ನು ಒತ್ತುವರಿ ಮಾಡಿಕೊಂಡಿದ್ದಾರೆ. ಮಳಿಗೆ ನಿರ್ಮಿಸಿ ಸ್ಥಳ ನಿಗದಿಪಡಿಸಿದ್ದರೂ ವ್ಯಾಪಾರಸ್ಥರು ಬೀದಿ ಬದಿಯಲ್ಲಿಯೇ ಮಾರಾಟ ನಡೆಸುತ್ತಿದ್ದಾರೆ. ಇದರಿಂದ ರಸ್ತೆಯಲ್ಲಿ ಸ್ಥಳವಿಲ್ಲದೆ ಪಾದಚಾರಿಗಳು, ವಾಹನ ಸವಾರರು ಪರದಾಡುವಂತಾಗಿದೆ. ಸದಾ ವಾಹನ ದಟ್ಟಣೆ ಸಾಮಾನ್ಯವಾಗಿದೆ.

ಇದೇ ರಸ್ತೆಯ ಬಸವೇಶ್ವರ ವೃತ್ತದಲ್ಲಿ ಸಂಜೆ ಆಗುತ್ತಿದ್ದಂತೆಯೇ ತಿಂಡಿ ಅಂಗಡಿಗಳು ತೆರೆದುಕೊಳ್ಳುತ್ತವೆ. ಆಹಾರ ಪದಾರ್ಥಗಳನ್ನು ತೆಗೆದುಕೊಳ್ಳಲು ಕಾರುಗಳಲ್ಲಿ, ದ್ವಿಚಕ್ರ ವಾಹನಗಳಲ್ಲಿ ಅಧಿಕ ಸಂಖ್ಯೆಯ ಜನರು ಬರುವುದರಿಂದ ಎಲ್ಲೆಂದರಲ್ಲಿ ವಾಹನ ನಿಲುಗಡೆ ಮಾಡಲಾಗುತ್ತಿದೆ. ವ್ಯವಸ್ಥಿತವಾದ ವಾಹನ ನಿಲುಗಡೆ ಇಲ್ಲದಿರುವುದು ಈ ಸ್ಥಳದಲ್ಲಿ ಹೆಚ್ಚಿನ ಸಮಸ್ಯೆ ತಂದೊಡ್ಡಿದೆ. ಈ ರಸ್ತೆಯಲ್ಲಿ ಶಾಲೆ– ಕಾಲೇಜು, ಕನಕ ಮಂಟಪದ ಆಟದ ಮೈದಾನ, ಕಲ್ಯಾಣ ಮಂಟಪ, ಚಿತ್ರಮಂದಿರ, ಹೋಟೆಲ್‌ಗಳು ಇರುವುದರಿಂದ ಪಾರ್ಕಿಂಗ್‌ಗೆ ಸಮಸ್ಯೆಯಾಗಿ ಮಾರ್ಪಟ್ಟಿದೆ ಎಂದು ಶಿಕ್ಷಕ ಸಂತೋಷ್ ವಿವರಿಸಿದರು.

ಮಂದಗತಿಯಲ್ಲಿ ಕಮಾನು ಕಾಮಗಾರಿ: ನಗರದ ರಂಗಪ್ಪ ವೃತ್ತದಲ್ಲಿ ಹೊಸಮನೆ ರಸ್ತೆಗೆ ಕಮಾನು (ದ್ವಾರ ಬಾಗಿಲು) ನಿರ್ಮಿಸಲಾಗುತ್ತಿದೆ. ರಸ್ತೆಯ ಮಧ್ಯ ಭಾಗದಲ್ಲಿ ಬೃಹತ್ ಕಂಬಗಳನ್ನು ಕಟ್ಟಲಾಗಿದೆ. ಎತ್ತರದಲ್ಲಿಯೂ ವ್ಯತ್ಯಯ ಕಂಡುಬರುತ್ತಿದೆ. ಇದರಲ್ಲಿ ಭಾರಿ ವಾಹನಗಳು, ಸರಕು ಸಾಗಣೆ ಲಾರಿಗಳು ಒಳ ಬಂದರೆ ಸಮಸ್ಯೆ ಎದುರಾಗುತ್ತಿದೆ.

ಚನ್ನಗಿರಿ ರಸ್ತೆ ಮಾರ್ಗ ಪ್ರತಿದಿನವೂ ಸಂಚಾರ ದಟ್ಟಣೆಯಿಂದ ತುಂಬಿರುತ್ತದೆ. ಅಲ್ಲದೆ, ರಸ್ತೆ ಬದಿಯಲ್ಲಿ ದ್ವಿಚಕ್ರ ವಾಹನಗಳಿಗೆ ಪಾರ್ಕಿಂಗ್ ವ್ಯವಸ್ಥೆ ಕಲ್ಪಿಸಲಾಗಿದೆ. ಇದೆಲ್ಲದರ ಪರಿಣಾಮ ರಸ್ತೆ ಅತ್ಯಂತ ಕಿರಿದಾಗಿ ಮಾರ್ಪಟ್ಟಿದೆ ಎಂಬುದು ಸಾರ್ವಜನಿಕರ ದೂರು.