ಶಿವಮೊಗ್ಗ:ನಗರದಲ್ಲಿ ಭಾನುವಾರ ಮಹಾನಗರ ಪಾಲಿಕೆಯಿಂದ ದಸರಾ ಅಂಗವಾಗಿ ಆಯೋಜಿಸಿದ್ದ ಮಹಿಳಾ ಸಾಂಸ್ಕೃತಿಕ-ಕಲಾ ಸ್ಪರ್ಧೆಗಳಿಗೆ ಚಾಲನೆ ನೀಡಲಾಯಿತು.
ರಂಗೋಲಿ, ಹಸೆ, ಮೆಹಂದಿ, ಬ್ಯೂಟಿಷನ್, ಜಾನಪದ ಗೀತೆಗಳು, ಅಂತ್ಯಾಕ್ಷರಿ ಹೀಗೆ ಹಲವಾರು ಕಲಾ ಹಾಗೂ ಸಾಂಸ್ಕೃತಿಕ ಸ್ಪರ್ಧೆಗಳಲ್ಲಿ ಪಾಲಿಕೆಯ ಮಹಿಳಾ ಸದಸ್ಯರು ಭಾಗವಹಿಸಿದ್ದರು. ಶಿವಮೊಗ್ಗ ನಗರದ ವಿವಿಧ ಮಹಿಳಾ ಕ್ರೀಡಾಪಟುಗಳು ಈ ಸ್ಪರ್ಧೆಗಳಲ್ಲಿ ಉತ್ಸಾಹದಿಂದ ಪಾಲ್ಗೊಂಡಿದ್ದರು.
ಡಿವಿಎಸ್ ಸಂಸ್ಥೆಯ ರಿಜಿಸ್ಟ್ರಾರ್ ಹರೀಶ್ ಚಾಲನೆ ನೀಡಿದರು.
ಈ ಬಾರಿ ಮಹಿಳಾ ದಸರಾವನ್ನು ಅದ್ಧೂರಿಯಿಂದ ನಾಲ್ಕು ದಿನಗಳ ಕಾಲ ಆಚರಿಸಲಾಗುತ್ತಿದೆ. ಕ್ರೀಡಾಕೂಟದಲ್ಲಿ 20ರಿಂದ 40, 40ರಿಂದ 60 ಹಾಗೂ 60ವರ್ಷ ಮೇಲ್ಪಟ್ಟ ವಯೋಮಾನದ ವಿಭಾಗ ಮಾಡಲಾಗಿದೆ.
ಮಹಿಳಾ ದಸರಾ ಸಮಿತಿಯ ಅಧ್ಯಕ್ಷೆ ರೇಖಾ ರಂಗನಾಥ್ ಅಧ್ಯಕ್ಷತೆ ವಹಿಸಿದ್ದರು. ಪಾಲಿಕೆ ಸದಸ್ಯರಾದ ಆರತಿ ಅ.ಮ. ಪ್ರಕಾಶ್, ಸಂಗೀತಾ ನಾಗರಾಜ್, ಸುರೇಖಾ ಮುರಳೀಧರ್, ಮಂಜುಳಾ ಶಿವಣ್ಣ, ಅನ್ನಪೂರ್ಣ (ಅನಿತಾ) ಹಾಗೂ ದಸರಾ ಸಮಿತಿಯ ಅಧಿಕಾರಿಗಳು ಇದ್ದರು.