ಹೊಸನಗರದಲ್ಲಿ ಮಳೆ ಚುರುಕು: ರೈತರ ಸಂತಸ

ತಾಲ್ಲೂಕಿನ ನಗರ ಹೋಬಳಿ ವ್ಯಾಪ್ತಿಯಲ್ಲಿ ಮಳೆ ಬಿರುಸಾಗಿದೆ. ಹುಂಚಾ, ಕಸಬಾ ಹೋಬಳಿಯಲ್ಲಿ ಸಾಧಾರಣ ವರ್ಷಧಾರೆಯಾಗಿದೆ. ಕೆರೆಹಳ್ಳಿ ಹೋಬಳಿ ಪ್ರದೇಶದಲ್ಲಿ ತುಂತುರು ಮಳೆಯಾಗಿದೆ.

ನಗರ ಹೋಬಳಿಯ ಜಲಾನಯನ ಪ್ರದೇಶದಲ್ಲಿ ಮಳೆ ವ್ಯಾಪಕವಾಗಿದೆ. ಮಂಜುಗಟ್ಟಿದ ವಾತಾವರಣ ಇದ್ದು, ಶೀತಗಾಳಿ ಬೀಸುತ್ತಿದೆ.

ತಾಲ್ಲೂಕಿನ ಜಲಾಶಯ ಪ್ರದೇಶದಲ್ಲಿ ಉತ್ತಮ ಮಳೆ ಆಗುತ್ತಿದೆ. ಸಾವೇಹಕ್ಕಲು 14.4 ಸೆಂ.ಮೀ., ಚಕ್ರಾ 10.4 ಸೆಂ.ಮೀ., ಮಾಸ್ತಿಕಟ್ಟೆ 11 ಸೆಂ.ಮೀ., ಹುಲಿಕಲ್ 12.1 ಸೆಂ.ಮೀ., ಯಡೂರು 7 ಸೆಂ.ಮೀ, ಮಾಣಿ 7 ಸೆಂ.ಮೀ ಮಳೆ ಆಗಿದೆ.

ಮೂರು ದಿನಗಳಿಂದ ಮಳೆ ಸುರಿಯುತ್ತಿರುವುದರಿಂದ ರೈತರು ಸಂತಸಗೊಂಡಿದ್ದಾರೆ.