ಪಾವಗಡ: ತಾಲ್ಲೂಕಿನ ಕಾಮನದುರ್ಗ ಬೆಟ್ಟದ ರಾಮಲಿಂಗೇಶ್ವರ ದೇಗುಲದಲ್ಲಿ ಶುಕ್ರವಾರ ಶಿವರಾತ್ರಿ ಪ್ರಯುಕ್ತ ನಡೆದ ಪೂಜೆಯಲ್ಲಿ ಸಾವಿರಾರು ಸಂಖ್ಯೆಯಲ್ಲಿ ಭಕ್ತರು ಭಾಗವಹಿಸಿದ್ದರು.
ಗುರುವಾರ ಕಡಿದಾದ ಬೆಟ್ಟವನ್ನು ಏರಿ ರಾತ್ರಿ ದೇಗುಲದಲ್ಲಿಯೇ ಭಜನೆ, ಅಭಿಷೇಕ ಇತ್ಯಾದಿ ಪೂಜೆ ಸಲ್ಲಿಸಿದರು. ಶುಕ್ರವಾರ ಮಹಾ ಮಂಗಳಾರತಿ ನಂತರ ರಾಮಲಿಂಗೇಶ್ವರ ಸ್ವಾಮಿ ದೇಗುಲ ಸೇವಾ ಟ್ರಸ್ಟ್‌ನಿಂದ ಅನ್ನದಾನ ಮಾಡಲಾಯಿತು.
ಅಕ್ಕಮ್ಮರ ದೊಣೆಯಲ್ಲಿ ಮಹಿಳೆಯರು ಗಂಗಮ್ಮನ ಪೂಜೆ ಮಾಡಿದರು. ಬಾಣಂತಿ ಗುಂಡು ಬಳಿ ಹರಕೆ ಹೊತ್ತವರು ಕಲ್ಲನ್ನು ಇಟ್ಟರು. ಈ ರೀತಿ ಮಾಡುವುದರಿಂದ ಇಷ್ಟಾರ್ಥ ನೆರವೇರುತ್ತದೆ ಎಂಬ ನಂಬಿಕೆ ಈ ಭಾಗದ ಜನರಲ್ಲಿದೆ.
ಬೆಟ್ಟದ ಮೇಲಿನ ಸಿದ್ದರಗವಿಯಲ್ಲಿ ನುಸುಳಿ ಹೋಗಿ ಅಲ್ಲಿನ ನೀರನ್ನು ತೀರ್ಥವಾಗಿ ಸೇವಿಸಿದರು.
