ಪಾವಗಡ: ತಾಲ್ಲೂಕಿನ ಕೆ.ಟಿ. ಹಳ್ಳಿ ಸಮೀಪ ಸಿದ್ಧಪ್ಪನಕಟ್ಟೆ ಬಳಿಯ ಸರ್ಕಾರಿ ಗುಡ್ಡವನ್ನು ಅಗೆದು ಗುಡ್ಡದ ಮೇಲ್ಭಾಗ ಅನಧಿಕೃತವಾಗಿ ಕಟ್ಟಡ ನಿರ್ಮಿಸಲಾಗಿದೆ ಎಂದು ಗ್ರಾಮಸ್ಥರು ಆರೋಪಿಸಿದ್ದಾರೆ.
ಐತಿಹಾಸಿಕ ನಿಡಗಲ್ ಬೆಟ್ಟ, ನೂರಾರು ವರ್ಷಗಳ ಇತಿಹಾಸ ಇರುವ ಸಿದ್ಧಪ್ಪನ ದೇಗುಲಕ್ಕೆ ಹೊಂದಿಕೊಂಡಿರುವ ಗುಡ್ಡವನ್ನು ಯಂತ್ರಗಳನ್ನು ಬಳಸಿ ಅಗೆಯಲಾಗಿದೆ. ಮಳೆ ಬಂದಾಗ ಗುಡ್ಡ ಕುಸಿದು ಸಿದ್ಧಪ್ಪನ ದೇಗುಲಕ್ಕೂ ಹಾನಿಯಾಗುವ ಸಂಭವವಿದೆ ಎಂದು ದೂರಿದ್ದಾರೆ.
ಗುಡ್ಡದ ಪಕ್ಕದ ರಸ್ತೆ ಮುಚ್ಚಿ ಹೋಗಿ ಜಮೀನುಗಳಿಗೆ, ವಿವಿಧ ಗ್ರಾಮಗಳಿಗೆ ಸಂಪರ್ಕ ಕಲ್ಪಿಸುವ ಮಾರ್ಗ ಮುಚ್ಚಿಹೋಗಲಿದೆ. ನಿಡಗಲ್ ದುರ್ಗದ ಮೊದಲನೇ ಗ್ರಾಮ ಎಂದು ಈ ಪ್ರದೇಶವನ್ನು ಕರೆಯಲಾಗುತ್ತದೆ. ಸುತ್ತಮುತ್ತಲ ಪ್ರದೇಶದಲ್ಲಿ ಐತಿಹಾಸಿಕ ಸ್ಮಾರಕಗಳು, ದೇಗುಲಗಳ ಪಳೆಯುಳಿಕೆಗಳಿವೆ. ಇದೇ ಸ್ಥಳದಲ್ಲಿ ಅರಣ್ಯ ಇಲಾಖೆ ಸಿಬ್ಬಂದಿ ಗಿಡಗಳನ್ನು ನೆಟ್ಟಿದ್ದಾರೆ. ಇವೆಲ್ಲವುಗಳನ್ನು ಹಾಳು ಮಾಡಿ ಕೆಲವರು ಕಟ್ಟಡ ನಿರ್ಮಿಸುತ್ತಿರುವುದು ಅನುಮಾನಗಳಿಗೆ ಎಡೆ ಮಾಡಿಕೊಡುತ್ತಿದೆ ಎಂದು ಸ್ಥಳೀಯರು ಆರೋಪಿಸಿದ್ದಾರೆ.
ಕಂದಾಯ, ಅರಣ್ಯ ಇಲಾಖೆ ಅಧಿಕಾರಿಗಳು ಸ್ಥಳ ಪರಿಶೀಲಿಸಿ ಗುಡ್ಡ ಬಗೆದು ಖಾಸಗಿ ಕಟ್ಟಡ ನಿರ್ಮಿಸಿರುವವರ ವಿರುದ್ಧ ಕ್ರಮ ಕೈಗೊಳ್ಳಬೇಕು. ಈ ಕೂಡಲೇ ಕಟ್ಟಡವನ್ನು ನೆಲಸಮಗೊಳಿಸಿ ಯಥಾಸ್ಥಿತಿ ಕಾಪಾಡಬೇಕು ಎಂದು ಗ್ರಾಮಸ್ಥರು ಒತ್ತಾಯಿಸಿದ್ದಾರೆ.
