ಮಧುಗಿರಿ: ಪಟ್ಟಣದ ಎಆರ್ಟಿಒ ಕಚೇರಿಯ ಚಾವಣಿ ಗೋಡೆ ಕುಸಿದು ಇಬ್ಬರು ನೌಕರರಿಗೆ ಗಾಯಗಳಾಗಿರುವ ಘಟನೆ ಸೋಮವಾರ ನಡೆದಿದೆ.
ಕಚೇರಿಯ ಡಿ ಗ್ರೂಪ್ ನೌಕರರಾಗಿರುವ ಅಂಜಿನಪ್ಪ (50) ಹಾಗೂ ಅಂಜಿನಪ್ಪ (55) ಗಾಯಗೊಂಡವರು.
ಸೋಮವಾರ ಕಚೇರಿಯಲ್ಲಿ ಕೆಲಸ ಮಾಡುತ್ತಿದ್ದಾಗ ಚಾವಣಿ ಗೋಡೆ ಕುಸಿದ ರಭಸಕ್ಕೆ ಇಬ್ಬರಿಗೂ ತಲೆಯ ಭಾಗದಲ್ಲಿ ಗಾಯಗಳಾಗಿವೆ. ತಕ್ಷಣ ಅಧಿಕಾರಿಗಳು ಗಾಯಗೊಂಡವರನ್ನು ಮಧುಗಿರಿ ಸಾರ್ವಜನಿಕ ಆಸ್ಪತ್ರೆಗೆ ಕರೆದುಕೊಂಡು ಹೋಗಿ ಚಿಕಿತ್ಸೆ ಕೊಡಿಸಿದರು.
ಕಂಪ್ಯೂಟರ್ ಸಾಮಾಗ್ರಿಗಳು ಸಂಪೂರ್ಣ ಹಾಳಾಗಿವೆ. ಕಚೇರಿಯ ಕಟ್ಟಡ ಹಳೆದಾಗಿರುವುದರಿಂದ ಸರಿಪಡಿಸುವಂತೆ ಎಪಿಎಂಸಿ ಅಧ್ಯಕ್ಷ ಹಾಗೂ ಕಾರ್ಯದರ್ಶಿಗಳಿಗೆ ಹಲವು ಬಾರಿ ಮನವಿ ಮಾಡಿದರೂ ಯಾವುದೇ ಪ್ರಯೋಜನವಾಗಿಲ್ಲ ಎಂದು ಅಧಿಕಾರಿಗಳು ಆರೋಪಿಸಿದರು.