ಊಟ ಇಲ್ಲೇ ನಿದ್ದೆ ಇಲ್ಲೇ...

7
ಅಲೆಮಾರಿಗಳ ಬದುಕು ಬವಣೆ

ಊಟ ಇಲ್ಲೇ ನಿದ್ದೆ ಇಲ್ಲೇ...

Published:
Updated:

ತುಮಕೂರು: ‘ಬೈಯ್ಯಾ ನಾನೇನು ಜಾಸ್ತಿ ಕೇಳುತ್ತಿಲ್ಲ ನಮ್ಮ ಶ್ರಮಕ್ಕೆ ಬರೇ ಪಚಾಸ್‌ ರೂಪಾಯಿ ಅಷ್ಟೇ ಕೇಳುತ್ತಿರೋದು, ಅದಕ್ಕಿಂತ ಕಮ್‌ ಮಾಡಿಕೊಡಲು ಆಗೋದಿಲ್ಲ. ಅಲ್ಲಾಕೇ ಲಿಯೇ ಹೆಚ್ಚು ಕಾಡಬೇಡಿ’ ಎಂದು ಮಹಿಳೆಯೊಬ್ಬಳು ಹಿಂದಿ–ಮರಾಠಿ ಮಿಶ್ರಿತ ಕನ್ನಡದಲ್ಲಿ ದಯನೀಯ ರೀತಿಯಲ್ಲಿ ಬೇಡಿಕೊಳ್ಳುತ್ತಿದ್ದಳು.

ಇದು ತುಮಕೂರು ನಗರದಿಂದ ಕೂಗಳತೆ ದೂರದಲ್ಲಿರುವ ಹೊನ್ನುಡಿಕೆ ಹ್ಯಾಂಡ್ ಪೋಸ್ಟ್ ರಸ್ತೆ ಬದಿ ಟೆಂಟ್‌ ಹಾಕಿ ಕುಲುಮೆ ಕೆಲಸ ಮಾಡುತ್ತಿದ್ದ ಅಲೆಮಾರಿ ಮಹಿಳೆಯ ವ್ಯಾಪಾರದ ಪರಿ.

ಕುಲುಮೆಯಲ್ಲಿ ಕಾದ ಕಬ್ಬಿಣವನ್ನು ದೊಡ್ಡ ಸುತ್ತಿಗೆಯಿಂದ ಬಡಿಯುವಲ್ಲಿ ಮಗ್ನಳಾಗಿದ್ದ ಮಹಿಳೆಗೆ ಕುಡುಗೋಲು ಖರೀದಿಗೆ ಬಂದಿದ್ದ ಗ್ರಾಹಕರೊಬ್ಬರು ಇನ್ನೂ ಕಡಿಮೆ ಬೆಲೆಗೆ ಕುಡುಗೋಲು ನೀಡುವಂತೆ ಒತ್ತಾಯ ಮಾಡುತ್ತಿದ್ದಾಗ ಅವಳು ಆಗೋದಿಲ್ಲ ಎಂದು ಕಡಾಖಂಡಿತವಾಗಿ ಹೇಳಿದ್ದರಿಂದ. ₹ 50 ಕೊಟ್ಟು ಖರೀದಿ ಮಾಡಲೇ ಬೇಕಾಯಿತು. 

ಇದ್ದಿಲು ಒಲೆಯಲ್ಲಿ ಕಬ್ಬಿಣ ಕಾಯಿಸಿ ಕೊಡಲಿ, ಮಚ್ಚು, ಕುಡುಗೋಲು, ಪಿಕಾಸಿ, ಮಾಂಸ ಕತ್ತರಿಸುವ ಸಾಧನ, ಚೂರಿ ಮುಂತಾದ ವಸ್ತುಗಳನ್ನು ಸ್ಥಳದಲ್ಲಿಯೇ ತಯಾರಿಸಿ ಮಾರಾಟ ಮಾಡುವ ಇರುವ ಮಹಾರಾಷ್ಟ್ರ ರಾಜ್ಯದ ಪಂಡರಾಪುರದವರು. ತುಮಕೂರು ಜಿಲ್ಲೆಗೆ 50 ಕುಟುಂಬಗಳು ಲಗೇಜ್‌ ಆಟೊಗಳಲ್ಲಿ ಬಂದಿದ್ದು, ಒಂದೊಂದು ಕುಟುಂಬ ಒಂದೊಂದು ಗ್ರಾಮವನ್ನು ಆಯ್ಕೆ ಮಾಡಿಕೊಂಡು ಆ ಗ್ರಾಮದಲ್ಲಿ ಮೂರು ಅಥವಾ ವಾರ ವಾಸಿಸುತ್ತಾರೆ. ಸೀಜನ್‌ ಮುಗಿದ ತಕ್ಷಣ ಮತ್ತೆ ಮನೆಗೆ ಮರಳುತ್ತಾರೆ.

ಇಲ್ಲಿ ದುಡಿದರೆ ಅಲ್ಲಿ ಊಟ:  ಕಾಮನ ಹಬ್ಬ ಮುಗಿದ ನಂತರ ಊರಿನಿಂದ ಹೊರಡುವ ನಾವು ಸುಮಾರು ಹತ್ತು ತಿಂಗಳು ಬೇರೆ ರಾಜ್ಯಗಳಲ್ಲೇ ಕಾಲ ಕಳೆಯುತ್ತೇವೆ. ಊರಿನಲ್ಲಿ ವಯಸ್ಸಾದವರು ಮಾತ್ರ ಇರುತ್ತಾರೆ. ಇಲ್ಲಿ ನಾವು ಕಷ್ಟಪಟ್ಟು ದುಡಿದು ಕೂಡಿಟ್ಟು ಹೊಯ್ಯುವ ಹಣವನ್ನು ಅಲ್ಲಿ ಖರ್ಚು ಮಾಡುತ್ತೇವೆ. ಆರ್ಥಿಕವಾಗಿ ಅಬಲರಿದ್ದಿದ್ದರೆ ನಾವು ಎಲ್ಲರಂತೆ ಮಕ್ಕಳಿಗೆ ಉತ್ತಮ ಶಿಕ್ಷಣ, ಬುದುಕು ಕೊಡುತ್ತಿದ್ದೇವೆ. ಮಕ್ಕಳು ನಮ್ಮೊಂದಿಗೆ ಕೈ ಜೋಡಿಸುವುದರಿಂದ ಕೆಲಸ ಸುಲಭವಾಗುತ್ತದೆ ಹಾಗೂ ನಮ್ಮ ಹೊಟ್ಟೆ ತುಂಬುತ್ತದೆ ಎನ್ನುತ್ತಾರೆ ಅಲೆಮಾರಿ ಕುಟುಂಬದ ಯಜಮಾನ ಸುನೀಲ್‌.

‘ಒಂದು ದಿನಕ್ಕೆ ₹ 1 ಸಾವಿರದಿಂದ ₹ 1,500 ವ್ಯಾಪಾರ ಆಗುತ್ತೆ. ಖರ್ಚು ಕೂಲಿ ಕಳೆದು ₹ 300 ರಿಂದ ₹ 500 ಉಳಿಯುತ್ತದೆ. ಕೆಲವರು ಕಬ್ಬಿಣ ತಂದುಕೊಟ್ಟು ಬಾಯಿ ಮಾಡಿಸಿಕೊಂಡು ಹೋದರೆ, ಇನ್ನೂ ಕೆಲವರು ತಯಾರಾದ ವಸ್ತುಗಳನ್ನು ಖರೀದಿಸುತ್ತಾರೆ. ದೊಡ್ಡ ದೊಡ್ಡ ಶಹರ್‌ಗಳಿಗಿಂತ ನಮಗೆ ಹಳ್ಳಿಗಳಲ್ಲೇ ಉತ್ತಮ ವ್ಯಾಪಾರವಾಗುತ್ತದೆ.
ಕಬ್ಬಿಣದ ಕೆಲಸದ ನಂತರ ಇರುವ ಕೆಂಡದಲ್ಲೇ ಅಡುಗೆ ಮಾಡುತ್ತೇವೆ. ಇಲ್ಲೇ ಊಟ ಇಲ್ಲೇ ನಿದ್ದೆ. ಹೆಂಗಸರು ಮಕ್ಕಳು ಟೆಂಟ್‌ಯೊಳಗೆ, ಗಂಡಸರು ಹೊರಗೆ ಒರಸುಗಳ (ಹಗ್ಗದಿಂದ ಹೆಣದ ಮಂಚ) ಮೇಲೆ ಮಲುಗುತ್ತಾರೆ. ಬೆಳಗಾಗುವ ಮೊದಲೇ ಹೆಂಗಸರೆಲ್ಲರೂ ಇಲ್ಲೇ ಸ್ನಾನ ಮಾಡಿಕೊಂಡು ಬಿಡುತ್ತೇವೆ’ ಎನ್ನುತ್ತಾರೆ ಸುನೀಲ್‌ ಅವರ ಪತ್ನಿ ಸಂಗೀತ.

******
ಕಬ್ಬಿಣದ ಉಳಿ ಸುತ್ತಿಗೆಗಳೇ ನಮ್ಮ ವಿದ್ಯೆ ಹಾಗೂ ಆಟದ ಸಾಮಾನುಗಳು. ನಾವು ತಂಗಿ ತಮ್ಮ ಎಲ್ಲರೂ ಅಪ್ಪ–ಅಮ್ಮ ಹೋದೆಲ್ಲ ಹೋಗುತ್ತೇವೆ. ಅಪ್ಪ– ಅಮ್ಮ ಮಾಡುವ ಕೆಲಸಕ್ಕೆ ನವು ಸಹ ಕೈಜೋಡಿಸುತ್ತೇವೆ. ಇದರಿಂದ ಕುಲುಮೆ ಕೆಲಸ ಕಲಿತಂತಾಗುತ್ತದೆ ಮುಂದಿನ ಜೀವನಕ್ಕೂ ಉಪಯುಕ್ತ. ಬೇರೆ ರಾಜ್ಯಗಳಿಗೆ ಹೋಗುವುದರಿಂದ ಅಲ್ಲಿ ಸ್ಥಳೀಯವಾಗಿರುವ ಪ್ರವಾಸಿತಾಣಗಳನ್ನು ನೋಡುವ ಅವಕಾಶಗಳು ಸಿಗುತ್ತದೆ.
–ರೇಷ್ಮಾ, ಅಲೆಮಾರಿ

ಫಿನೀಷಿಂಗ್ ಇಲ್ಲದಿದ್ದರು ಕುಲುಮೆಗಳಿಗಿಂತ ಕಡಿಮೆ ಖರ್ಚಿನಲ್ಲಿ ಕೆಲಸ ಮಾಡಿಕೊಡುತ್ತಾರೆ. ಇದರಿಂದ ಅವರಿಗೂ ಉಪಯೋಗ ನಮಗೂ ಉಳಿತಾಯ.
–ವೇಣು, ಹೊನ್ನುಡಿಕೆ ಹ್ಯಾಂಡ್ ಪೋಸ್ಟ್

ನನಗೂ ಓದಬೇಕು. ಬೇರೆಯವರಂತೆ ವಿದ್ಯಾವಂತನಾಗಿ ಒಳ್ಳೆಯ ನೌಕರಿ ಮಾಡಬೇಕು ಎನ್ನುವ ಆಸೆ. ಆದರೆ ಮನೆಯಲ್ಲಿ ಕಿತ್ತು ತಿನ್ನುವ ಬಡತನ ಓದಿಗೆ ಅಡಿಯಾಗಿದೆ.
ಶಂಸು, ಅಲೆಮಾರಿ ಬಾಲಕ

Tags: 

ಬರಹ ಇಷ್ಟವಾಯಿತೆ?

  • 1

    Happy
  • 0

    Amused
  • 1

    Sad
  • 0

    Frustrated
  • 0

    Angry

Comments:

0 comments

Write the first review for this !