ತಿಪಟೂರು: ನಕಲಿ ಸಹಿ ಮಾಡಿ ಬ್ಯಾಂಕ್‌ನಿಂದ ಸಾಲ ಪಡೆದು ವಂಚಿಸಿದ್ದ ಅಪರಾಧಿಗೆ 12 ತಿಂಗಳು ಸಜೆ ಮತ್ತು ₹20 ಸಾವಿರ ದಂಡ ವಿಧಿಸಲಾಗಿದೆ.
ತಾಲ್ಲೂಕಿನ ಹುಣಸೇಘಟ್ಟ ಗ್ರಾಮದ ಕಾವೇರಿ ಗ್ರಾಮೀಣ ಬ್ಯಾಂಕಿನಲ್ಲಿ ನೊಣವಿನಕೆರೆ ಹೋಬಳಿ ಬಿದರೆಕೆರೆ ಗ್ರಾಮದ ಜಮೀನನ್ನು ಆಧಾರ ಮಾಡಿ ಸಾಲ ಪಡೆಯಲು ಜಯಮ್ಮ ಅವರ ಸಹಿಯನ್ನು ವರಲಕ್ಷ್ಮಿ ಅವರು ನಕಲು ಮಾಡಿದ್ದರು. ₹40 ಸಾವಿರ ಸಾಲ ಪಡೆದು ಜಯಮ್ಮ ಹಾಗೂ ಬ್ಯಾಂಕ್‌ಗೆ ವಂಚಿಸಿದ್ದರು.
ನೊಣವಿನಕೆರೆ ಪೊಲೀಸ್ ತನಿಖಾಧಿಕಾರಿ ಜಿ. ಕೃಷ್ಣರಾಜು ನ್ಯಾಯಾಲಯಕ್ಕೆ ಸಲ್ಲಿಸಿದ್ದ ದೋಷಾರೋಪ ಸಾಬೀತಾಗಿದ್ದು, ನ್ಯಾಯಧೀಶೆ ಜಿ.ಎಸ್. ಮಧುಶ್ರೀ ಪ್ರಕರಣದ ಆರೋಪಿಗಳಾದ ಟಿ.ಪಿ ಜಯರಾಮ್ ಮತ್ತು ವರಲಕ್ಷ್ಮಿ ಜಯರಾಮ್ ಅವರಿಗೆ ತಲಾ 12 ತಿಂಗಳು ಜೈಲು ₹20 ಸಾವಿರ ದಂಡ ವಿಧಿಸಿ ತೀರ್ಪು ನೀಡಿದೆ. ಸರ್ಕಾರದ ಪರವಾಗಿ ವಕೀಲೆ ಚೇತನ ವಾದ ಮಂಡಿಸಿದ್ದರು.
