ತುಮಕೂರು: ಜಿಲ್ಲೆಯ ಅಲ್ಲಲ್ಲಿ ಸೋಮವಾರ ಸೋನೆ ಮಳೆ ಸುರಿದಿದೆ. ಭಾನುವಾರ ರಾತ್ರಿ ತುಮಕೂರು ನಗರದಲ್ಲಿ ಹದವಾದ ಮಳೆ ಸುರಿದಿತ್ತು. ತಿಪಟೂರು ತಾಲ್ಲೂಕು ವ್ಯಾಪ್ತಿಯಲ್ಲಿಯೂ ಹದ ಮಳೆ ಬಿದ್ದಿತ್ತು. ಉಳಿದ ಕಡೆಗಳಲ್ಲಿ ಮೋಡ ಕಟ್ಟಿದ್ದರೂ ಮಳೆ ಆಗಿರಲಿಲ್ಲ.
ಜಿಲ್ಲೆಯ ಬಹುತೇಕ ಭಾಗಗಳಲ್ಲಿ ಸೋಮವಾರ ಸಂಜೆ ಮೋಡ ಕವಿದ ವಾತಾವರಣವಿತ್ತು. ತುಮಕೂರು ತಾಲ್ಲೂಕಿನ ಕೋರ ಹೋಬಳಿ, ಚಿಕ್ಕನಾಯಕನಹಳ್ಳಿ ತಾಲ್ಲೂಕು ಹುಳಿಯಾರು ಹೋಬಳಿ ಹಾಗೂ ಗುಬ್ಬಿ ತಾಲ್ಲೂಕಿನ ಕೆಲವು ಕಡೆಗಳಲ್ಲಿಯೂ ತುಂತುರು ಮಳೆಯಾಯಿತು.
ಮೋಡ ಕವಿದ ವಾತಾವರಣವಿದ್ದ ಕಾರಣ ಬಹುತೇಕ ಮಂದಿ ಈಗ ಮಳೆ ಬರುತ್ತದೆ ಆಗ ಮಳೆ ಬರುತ್ತದೆ ಎಂದು ಆಗಸ ದಿಟ್ಟಿಸಿದ್ದರು.
