ಚುನಾವಣೆಗೆ ಸಿದ್ಧತೆ ಚುರುಕು; ಸಮರ್ಥ ಅಭ್ಯರ್ಥಿ ಹುಡುಕಾಟ ಶುರು

7
ಮೇಯರ್, ಉಪಮೇಯರ್ ಕಾರ್, ಕೊಠಡಿ ಸುಪರ್ದಿಗೆ ಪಡೆದ ಚುನಾವಣಾ ಆಯೋಗ

ಚುನಾವಣೆಗೆ ಸಿದ್ಧತೆ ಚುರುಕು; ಸಮರ್ಥ ಅಭ್ಯರ್ಥಿ ಹುಡುಕಾಟ ಶುರು

Published:
Updated:
Deccan Herald

ತುಮಕೂರು: ಮಹಾನಗರ ಪಾಲಿಕೆ ಚುನಾವಣೆ ದಿನಾಂಕ ಘೋಷಣೆಗೊಂಡು ನೀತಿ ಸಂಹಿತೆ ಜಾರಿಯಾಗುತ್ತಿದ್ದಂತೆಯೇ ಚುನಾವಣೆ ಸಿದ್ಧತೆ ಪ್ರಕ್ರಿಯೆಗಳು ಆರಂಭಗೊಂಡಿವೆ.

ಮಹಾನಗರ ಪಾಲಿಕೆಯ ಮೇಯರ್, ಉಪಮೇಯರ್, ಸ್ಥಾಯಿ ಸಮಿತಿ ಅಧ್ಯಕ್ಷರ ಕೊಠಡಿಗಳು ಸೇರಿದಂತೆ 7 ಕೊಠಡಿಗಳನ್ನು ಚುನಾವಣಾಧಿಕಾರಿಗಳು ಸುಪರ್ದಿಗೆ ಪಡೆದಿದ್ದಾರೆ.

ಶುಕ್ರವಾರ ಬೆಳಿಗ್ಗೆ ಈ ಕೊಠಡಿಗಳು ಚುನಾವಣಾಧಿಕಾರಿ, ಸಹಾಯಕ ಚುನಾವಣಾಧಿಕಾರಿ ಕಚೇರಿಗಳಾಗಿ ಪರಿವರ್ತನೆಯಾಗಿವೆ. ನಾಮಪತ್ರ ಸಲ್ಲಿಕೆ ಪ್ರಕ್ರಿಯೆ ಸಲ್ಲಿಕೆಗೆ ಅನುಕೂಲ ಮಾಡಿಕೊಡುವ ಉದ್ದೇಶದಿಂದ ಕೊಠಡಿಗಳನ್ನು 35 ವಾರ್ಡ್‌ಗಳನ್ನಾಗಿ ವಿಂಗಡಿಸಲಾಗಿದೆ. ಇದರಿಂದ ಆಯಾ ವಾರ್ಡ್‌ಗೆ ನಾಮಪತ್ರ ಸಲ್ಲಿಕೆಗೆ ಬರುವವರು ಸಂಬಂಧಪಟ್ಟ ಕೊಠಡಿಗೆ ನೇರವಾಗಿ ಸಲ್ಲಿಸಬಹುದು, ಹಿಂದಕ್ಕೆ ಪಡೆಯಬಹುದಾಗಿದೆ.

ಚುನಾವಣಾ ಆಯೋಗದ ನಿರ್ದೇಶದನ್ವಯ ಮೇಯರ್ ಮತ್ತು ಉಪಮೇಯರ್ ಅವರ ಕಾರುಗಳನ್ನು ಗುರುವಾರ ಸಂಜೆಯೇ ಪಾಲಿಕೆ ಆಯುಕ್ತರು ಹಿಂದಕ್ಕೆ ಪಡೆದಿದ್ದಾರೆ. ಈ ಎಲ್ಲ ಪ್ರಕ್ರಿಯೆಗಳಿಂದ ಸದಾ ಜನಪ್ರತಿನಿಧಿಗಳು, ಅವರ ಬೆಂಬಲಿಗರಿಂದ ಗಿಜಿಗಿಡುತ್ತಿದ್ದ ಮಹಾನಗರ ಪಾಲಿಕೆ ಆಡಳಿತ ಕಚೇರಿ, ಪ್ರಾಂಗಣದ ಸ್ವರೂಪವೇ ಬದಲಾಗಿತ್ತು.

ಬೈಕ್‌ನಲ್ಲಿ ಬಂದ ಮೇಯರ್: ತಮಗೆ ಕೊಟ್ಟಿದ್ದ ಕಾರನ್ನು ಗುರುವಾರ ರಾತ್ರಿಯೇ ಹಿಂದಕ್ಕೆ ಪಡೆದಿದ್ದರಿಂದ ಮೇಯರ್ ಸುಧೀಶ್ವರ್ ಅವರು ಶುಕ್ರವಾರ ಮಧ್ಯಾಹ್ನ ತಮ್ಮ ‘ಯಮಹಾ’ ದ್ವಿಚಕ್ರವಾಹನದಲ್ಲಿ ಮಹಾನಗರ ಪಾಲಿಕೆ ಕಚೇರಿಗೆ ಬಂದರು.

ಪಾಲಿಕೆ ಆವರಣದಲ್ಲಿ ವಾಹನ ನಿಲುಗಡೆ ಮಾಡಿ ಕಚೇರಿಯ ಒಳಗಡೆ ತೆರಳಿದರು. ಮೇಯರ್ ಕಚೇರಿ ಚುನಾವಣಾಧಿಕಾರಿ, ಸಹಾಯಕ ಚುನಾವಣಾಧಿಕಾರಿ ಕಚೇರಿಗಳಾಗಿ ಪರಿವರ್ತನೆಗೊಂಡಿದ್ದರಿಂದ ಕುಳಿತುಕೊಳ್ಳಲು ಹೋಗಲಿಲ್ಲ. ಕಚೇರಿಯ ಅಧಿಕಾರಿಗಳೊಂದಿಗೆ ಮಾತನಾಡಿ ಹಿಂದಿರುಗಿದರು.

ಟಿಕೆಟ್‌ಗೆ ತುರುಸು: ವಿವಿಧ ಪಕ್ಷಗಳ ಟಿಕೆಟ್‌ ಗಿಟ್ಟಿಸಲು ತುರುಸಿನ ಚಟುವಟಿಕೆಗಳು ಶುರುವಾಗಿವೆ. ಗುರುವಾರ ರಾತ್ರಿಯೇ ನಗರದ ಹೊರವಲಯದ, ನಗರದೊಳಗಿನ ಹೊಟೇಲ್‌ಗಳು ವಿವಿಧ ವಾರ್ಡ್‌ಗಳಿಗೆ ಸ್ಪರ್ಧಿಸಲು ಬಯಸಿದ ಆಕಾಂಕ್ಷಿಗಳು ಮತ್ತವರ ಬೆಂಬಲಿಗರಿಂದ ತುಂಬಿದ್ದವು.

ಆ ಪಕ್ಷದಿಂದ ಟಿಕೆಟ್ ಸಿಗದಿದ್ದರೆ ಏನು ಮಾಡಬೇಕು. ಈ ಪಕ್ಷದಿಂದ ಟಿಕೆಟ್ ಹೇಗೆ ಪಡೆಯಬೇಕು? ಟಿಕೆಟ್ ಸಿಕ್ಕ ಬಳಿಕ ಗೆಲ್ಲಲು ಏನೇನು ಮಾಡಬೇಕು ಎಂಬುದರ ಬಗ್ಗೆ ಗಂಟೆಗಟ್ಟಲೆ ಚರ್ಚೆಯಲ್ಲಿ ಮುಳುಗಿದ್ದುದು ಕಂಡು ಬಂದಿದೆ.

ಮತದಾನಕ್ಕೆ ಇವಿಎಂ ಬಳಕೆ

ಪಾಲಿಕೆ ಚುನಾವಣೆಗೆ ವಿದ್ಯುನ್ಮಾನ ಮತಯಂತ್ರ ಬಳಕೆ ಮಾಡಲಾಗುತ್ತಿದೆ. ಅಭ್ಯರ್ಥಿಗಳ ಹೆಸರಿನ ಮುಂದೆ ಭಾವಚಿತ್ರ ಇರಲಿದ್ದು, ಮತದಾರರಿಗೂ ಭಾವಚಿತ್ರ ಇರುವ ಮತದಾರರ ಚೀಟಿ ನೀಡಲಾಗುತ್ತಿದೆ. ಮತದಾನ ಪ್ರಕ್ರಿಯೆಯಲ್ಲಿ ಮತದಾರರು ನೋಟಾ (ಯಾರಿಗೂ ಮತ ಇಲ್ಲ) ಕೂಡಾ ಬಳಸಬಹುದು ಎಂದು ಚುನಾವಣಾಧಿಕಾರಿ ಕಚೇರಿ ಮೂಲಗಳು ತಿಳಿಸಿವೆ.

ಎಡಗೈ ಉಂಗುರು ಬೆರಳಿಗೆ ಶಾಯಿ

ಈ ಬಾರಿ ಚುನಾವಣೆಯ ಮತ್ತೊಂದು ವಿಶೇಷವೆಂದರೆ ಮತದಾರರ ಎಡಗೈ ಉಂಗುರು ಬೆರಳಿಗೆ ಅಳಿಸಲಾಗದ ‘ಕಪ್ಪು ಶಾಯಿ’ಯನ್ನು ಹಾಕಲಾಗುತ್ತದೆ ಎಂದು ತಿಳಿಸಲಾಗಿದೆ.

ಅಂಕಿ ಅಂಶಗಳು

35 - ಪಾಲಿಕೆಯ ವಾರ್ಡ್‌ಗಳ ಸಂಖ್ಯೆ
271 - ಮತಗಟ್ಟೆಗಳು
1,28,882 - ಪುರುಷ ಮತದಾರರು
1,30,597 - ಮಹಿಳಾ ಮತದಾರರು
34 - ಇತರೆ ಮತದಾರರು
2,59,513 - ಒಟ್ಟು ಮತದಾರರು

 

Tags: 

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !