ಶಾಲಾ ವಾಹನ ನಿಯಮ ಉಲ್ಲಂಘನೆ; ಪೊಲೀಸರ ತಪಾಸಣೆ

ಇವು ಮಂಗಳವಾರ ನಗರದಲ್ಲಿ ಶಾಲಾ ಮಕ್ಕಳನ್ನು ಕರೆದುಕೊಂಡು ಹೋಗುವ ಬಸ್‌, ಮಾರುತಿ ಓಮಿನಿ ಕಾರುಗಳು, ಮಿನಿ ವಾಹನಗಳನ್ನು ಸಂಚಾರ ಠಾಣೆಯ ಸಿಪಿಐ ಚಂದ್ರಶೇಖರ್ ನೇತೃತ್ವದಲ್ಲಿ ಸಂಚಾರ ಪೊಲೀಸರು ಪರಿಶೀಲನೆ ನಡೆಸಿದ ವೇಳೆ ಕಂಡು ಬಂದ ನೋಟಗಳು.

ತುರ್ತು ಸಂದರ್ಭದಲ್ಲಿ ವಾಹನದಿಂದ ಇಳಿಯಲು ತುರ್ತು ನಿರ್ಗಮನ ಬಾಗಿಲು ಇಲ್ಲದೇ ಇರುವುದು, ಅಗ್ನಿದುರಂತ, ಇನ್ನಿತರೇ ಅವಘಡಗಳು ಸಂಭವಿಸಿದಲ್ಲಿ ತುರ್ತಾಗಿ ಶಮನಗೊಳಿಸಲು ಅಗ್ನಿಶಾಮಕ ಇಲ್ಲದೇ ಇರುವುದು, ಬಸ್ಸಿನಲ್ಲಿ ಸಿಸಿ ಟಿ.ವಿ ಕ್ಯಾಮರಾ ಇಲ್ಲದಿರುವುದು, ಶಾಲಾ ಮಕ್ಕಳನ್ನು ಹತ್ತಿಸಿಕೊಳ್ಳುವ ಆಯಾಗಳು ಗುರುತಿನ ಚೀಟಿ ಹೊಂದಿಲ್ಲದೇ ಇರುವುದು, ಎಷ್ಟೋ ವಾಹನಗಳ ಮೇಲೆ ಶಾಲೆಯ ಹೆಸರು, ದೂರವಾಣಿ ಸಂಖ್ಯೆ ಇಲ್ಲದೇ ಇರುವುದು, ಶಾಲಾ ವಾಹನಗಳಿಗೆ ನಿಯಮಾವಳಿ ಪ್ರಕಾರ ಹಳದಿ ಬಣ್ಣ ಹೊಂದಿಲ್ಲದಿರುವುದು, ನಿಗದಿತ ಸಂಖ್ಯೆಗಿಂತ ಹೆಚ್ಚಿನ ಮಕ್ಕಳನ್ನು ಸಾಗಿಸುವುದು, ಶಾಲಾ ಬಸ್ಸಿನ ಮೇಲೆ ‘ಆನ್ ಸ್ಕೂಲ್ ಡ್ಯೂಟಿ’ ಎಂದು ಬೋರ್ಡ್ ಹಾಕಿಲ್ಲದೇ ಇರುವ ಲೋಪಗಳು ಕಂಡು ಬಂದವು ಎಂದು ಸಂಚಾರ ಠಾಣೆ ಪೊಲೀಸರು ತಿಳಿಸಿದ್ದಾರೆ.

ಸುಪ್ರೀಂ ಕೋರ್ಟ್ ಆದೇಶದ ಮೇರೆಗೆ ಎಲ್ಲ ಸೂಚನೆಗಳನ್ನು ಶಾಲೆಯ ಆಡಳಿತ ಮಂಡಳಿ ಮತ್ತು ಚಾಲಕರು ಪಾಲಿಸಬೇಕು. ಅದನ್ನು ಪಾಲಿಸದೇ ಇರುವ ಚಾಲಕರಿಗೆ ತಿಳಿವಳಿಕೆಯನ್ನು ಸ್ಥಳದಲ್ಲಿಯೇ ನೀಡಲಾಯಿತು ಎಂದು ತಿಳಿಸಲಾಗಿದೆ.

ನಗರದಲ್ಲಿರುವ ಶಾಲಾ ಕಾಲೇಜುಗಳಿಗೆ ಭೇಟಿ ನೀಡಿ ಪ್ರಾಂಶುಪಾಲರಿಗೆ ಮತ್ತು ಆಡಳಿತ ಮಂಡಳಿಯವರಿಗೆ ನೂನ್ಯತೆಗಳನ್ನು ಸರಿಪಡಿಸಿಕೊಳ್ಳಲು ಲಿಖಿತ ರೂಪದಲ್ಲಿ ನೋಟಿಸ್ ನೀಡಲಾಗಿದೆ. ಪೋಷಕರೂ ಸಹ ಮಕ್ಕಳ ಸುರಕ್ಷತಾ ದೃಷ್ಟಿಯಿಂದ ಸುಪ್ರೀಂ ಕೋರ್ಟ್ ಆದೇಶಗಳನ್ನು ಪಾಲಿಸಬೇಕು ಎಂದು ತಿಳಿಸಲಾಗಿದೆ.