ಉದ್ಯೋಗದಾತರಾಗುವ ಗುರಿ ಇರಲಿ

7
ತುಮಕೂರಿನ ಸಿದ್ಧಗಂಗಾ ತಾಂತ್ರಿಕ ಶಿಕ್ಷಣ ಸಂಸ್ಥೆಯ 9ನೇ ಪದವಿ ಪ್ರದಾನ ಸಮಾರಂಭದಲ್ಲಿ ದೆಹಲಿ ಐಐಟಿ ನಿರ್ದೇಶಕ ಪ್ರೊ.ವಿ.ರಾಮಗೋಪಾಲ್ ಸಲಹೆ

ಉದ್ಯೋಗದಾತರಾಗುವ ಗುರಿ ಇರಲಿ

Published:
Updated:
Deccan Herald

ತುಮಕೂರು: ‘ಎಂಜಿನಿಯರಿಂಗ್ ಪದವಿ ಪಡೆದ ಬಳಿಕ ಉದ್ಯೋಗ ಅರಸುವ ಬದಲು ನೀವೇ ಉದ್ಯೋಗದಾತರಾಗಿ ಹೊರಹೊಮ್ಮಿ’ ಎಂದು ದೆಹಲಿಯ ಭಾರತೀಯ ತಂತ್ರಜ್ಞಾನ ಸಂಸ್ಥೆ(ಐಐಟಿ) ನಿರ್ದೇಶಕ ಪ್ರೊ.ವಿ.ರಾಮಗೋಪಾಲ್‌ರಾವ್ ಹೇಳಿದರು.

ನಗರದ ಸಿದ್ಧಗಂಗಾ ತಾಂತ್ರಿಕ ಶಿಕ್ಷಣ ಸಂಸ್ಥೆಯ(ಎಸ್‌ಐಟಿ) 9ನೇ ಪದವಿ ಪ್ರದಾನ ಕಾರ್ಯಕ್ರಮದಲ್ಲಿ ಚಿನ್ನದ ಪದಕ ಮತ್ತು ಪ್ರಶಸ್ತಿ ಪ್ರದಾನ ಮಾಡಿ ಮಾತನಾಡಿದರು.

ದೆಹಲಿಯ ಐಐಟಿಯಲ್ಲಿ ಈ ವರ್ಷ ಪದವಿ ಪೂರೈಸಿದ ವಿದ್ಯಾರ್ಥಿಗಳಲ್ಲಿ 100 ಮಂದಿ ತಾವು ಉದ್ಯೋಗಿಗಳಾಗ ಬಯಸುವುದಿಲ್ಲ.  ಸ್ವಂತ ಕಂಪನಿ ಪ್ರಾರಂಭಿಸಿ ಉದ್ಯಮಿಗಳಾಗಿ ಉದ್ಯೋಗದಾತರಾವುದಾಗಿ ಘೋಷಣೆ ಮಾಡಿದ್ದಾರೆ. ಈ ದಿಶೆಯಲ್ಲಿ ನೀವೂ ಹೆಜ್ಜೆ ಇರಿಸಿ ಎಂದು ವಿದ್ಯಾರ್ಥಿಗಳಿಗೆ ಸಲಹೆ ನೀಡಿದರು.

ಶಿಕ್ಷಣ ಸಂಸ್ಥೆಗಳೂ ವಿದ್ಯಾರ್ಥಿಗಳಲ್ಲಿ ಕೇವಲ ಉದ್ಯೋಗ ಅರಸುವ ಮನೋಭಾವ ಸೃಷ್ಡಿಸುವಲ್ಲಿ ಯಶಸ್ವಿಯಾಗಿವೆ. ಇದರ ಬದಲಾಗಿ ನೀವೇ ಉದ್ಯೋಗದಾತರಾಗಿ ಎಂಬ ಮನೋಭಾವ ಬೆಳೆಸಬೇಕಾಗಿದೆ. ವಿದ್ಯಾರ್ಥಿಗಳಿಗೆ ಪ್ರಾಧ್ಯಾಪಕರು ಉತ್ತಮ ಮೂಲ ತತ್ವಗಳನ್ನು ಬೋಧಿಸಬೇಕು. ಅವರಿಗೆ ಕಲಿಯುವುದು ಹೇಗೆ ಎಂದು ಹೇಳಿಕೊಡಬೇಕು. ತಮ್ಮ ಭವಿಷ್ಯ ರೂಪಿಸಿಕೊಂಡು ಇತರರ ಭವಿಷ್ಯಕ್ಕೆ ಆಧಾರವಾಗುವಂತಹ ಪ್ರತಿಭೆಗಳನ್ನು ಸೃಷ್ಟಿಸಬೇಕು ಎಂದು ಆಶಯ ವ್ಯಕ್ತಪಡಿಸಿದರು.

’ಜೀವನದಲ್ಲಿ ಕೊನೆಯ ಕ್ಷಣದವರೆಗೂ ವಿದ್ಯಾರ್ಥಿಯಾಗಿರಿ. ಕಲಿಕೆ ಕೊನೆಯಾದರೆ ಜೀವನದ ಪಥವೂ ಕೊನೆಯಾದಂತೆಯೇ. ಕಲಿಯುವಿಕೆಯಲ್ಲಿನ ಕುತೂಹಲವು ಕೊನೆಯವರೆಗೂ ಇರಬೇಕು. ಕಲಿಕೆಯು ಹೊಸ ಅವಕಾಶಗಳಿಗೆ ನಿಮ್ಮನ್ನು ನೀವು ತೆರೆದುಕೊಳ್ಳುವಂತೆ ಮಾಡುತ್ತದೆ’ ಎಂದರು.

‘ಯಾರೂ ಕೂಡಾ ಭವಿಷ್ಯವನ್ಮು ನಿರ್ಧರಿಸಿ ಅದಕ್ಕೆ ತಕ್ಕ ಹಾಗೆ ಶಿಕ್ಷಣವನ್ನು ಕೊಡಲು ಸಾಧ್ಯವಿಲ್ಲ. ಈಗ ಹತ್ತು ವರ್ಷದ ಹಿಂದೆ ಗೂಗಲ್ ಕಂಪನಿಯು ಬಿ.ಎಂ.ಡಬ್ಲ್ಯು ಹಾಗೂ ಮರ್ಸಿಡೆಸ್ ನಂತಹ ದೈತ್ಯ ಸಂಸ್ಥೆಗಳೊಂದಿಗೆ ಸ್ಪರ್ಧಿಸುತ್ತದೆ ಎಂದು ಯಾರು ಊಹಿಸಿರಲಿಲ್ಲ. ಹಾಗೆಯೇ ಅ್ಯಪಲ್ ಕಂಪನಿಯು ಸಾಂಪ್ರದಾಯಿಕ ಕೈಗಡಿಯಾರ ತಯಾರಿಕೆ ಮಹಾ ಸಂಸ್ಥೆ ರೊಲೆಕ್ಸ್ ನ್ನು ಎದುರಿಸಲು ಶಕ್ತಿಯುತವಾಗುತ್ತದೆ ಎಂದು ಯಾರೂ ಅಂದುಕೊಂಡಿರಲಿಲ್ಲ. ನಿರಂತರ ಕಲಿಕೆ, ಸಾಧನೆ ಮಾಡುವ ಪ್ರವೃತ್ತಿಯ ಕುಶಲ ವ್ಯಕ್ತಿಗಳ ಸಂಘಟಿತ ಪ್ರಯತ್ನದಿಂದ ಇದು ಸಾಧ್ಯವಾಗಿದೆ’ ಎಂದರು.

ಸಾನ್ನಿಧ್ಯವಹಿಸಿದ್ದ ಸಿದ್ಧಗಂಗಮಠದ ಅಧ್ಯಕ್ಷರಾದ ಡಾ.ಸಿದ್ದಲಿಂಗ ಸ್ವಾಮೀಜಿ, ‘ಎಸ್‌ಐಟಿಯಲ್ಲಿ ಶಿಕ್ಷಣ ಪಡೆದ ವಿದ್ಯಾರ್ಥಿಗಳು ಭವಿಷ್ಯದಲ್ಲಿ ಎಲ್ಲಿಯೇ ಇದ್ದರೂ ಅವರು ಎಸ್‌ಐಟಿ ರಾಯಭಾರಿಗಳೇ ಆಗಿರುತ್ತಾರೆ’ ಎಂದರು.

‘876 ಎಂಜಿನಿಯರಿಂಗ್ ಪದವಿ ವಿದ್ಯಾರ್ಥಿಗಳಲ್ಲಿ 701 ಜನರು ಈಗಾಗಲೇ ಕ್ಯಾಂಪಸ್‌ ನೇಮಕಾತಿ ಪ್ರಕ್ರಿಯೆಯಲ್ಲಿಯೇ ಉದ್ಯೋಗ ಪಡೆದಿರುವುದು ಸಂತೋಷ. ಈ ಸಾಧನೆಗೆ ಕಾರಣರಾದ ಪ್ರಾಧ್ಯಾಪಕರು, ಸಿಬ್ಬಂದಿ ಕಾರ್ಯ ಪ್ರಶಂಸನೀಯ’ ಎಂದು ನುಡಿದರು.

ಕಾಲೇಜಿಗೆ 9.65 ಅಂಕ ಮತ್ತು ಡಾ.ಶಿವಕುಮಾರಸ್ವಾಮಿ ಚಿನ್ನದ ಪದಕ ಸೇರಿ 4 ಚಿನ್ನದ ಪದಕ ಪಡೆದ ಬಿಇ ಎಲೆಕ್ಟ್ರಾನಿಕ್ಸ್ ಆ್ಯಂಡ್ ಕಮ್ಯೂನಿಕೇಷನ್ ವಿಭಾಗದ ನಮಿತಾ ಎನ್.ಭಾರದ್ವಾಜ್,  9.63 ಅಂಕ ಗಳಿಸಿ 6 ಚಿನ್ನದ ಪಡೆದ ದಿವ್ಯಾ ರೆಡ್ಡಿ ಅವರು ಕ್ರಮವಾಗಿ ಗರಿಷ್ಠ ಅಂಕ ಗಳಿಸಿದ ವಿದ್ಯಾರ್ಥಿಗಳಾಗಿ ಹೊರಹೊಮ್ಮಿದರು.

ಸಂಸ್ಥೆಯ ನಿರ್ದೇಶಕರಾದ ಡಾ.ಎಂ.ಎನ್.ಚನ್ನಬಸಪ್ಪ ಪ್ರಮಾಣ ಬೋಧಿಸಿದರು. ಕಾಲೇಜಿನ ಆಡಳಿತ ಮಂಡಳಿತ ಚೇರಮನ್ ಡಾ.ಕೆ.ಸಿದ್ಧಪ್ಪ ಅಧ್ಯಕ್ಷತೆ ವಹಿಸಿದ್ದರು. ಪ್ರಾಂಶುಪಾಲರಾದ ಡಾ.ಶಿವಕುಮಾರಯ್ಯ, ಎಂಜಿನಿಯರಿಂಗ್ ಕಾಲೇಜಿನ ವಿವಿಧ ವಿಭಾಗಗಳ ಮುಖ್ಯಸ್ಥರು ವೇದಿಕೆಯಲ್ಲಿದ್ದರು.

 

Tags: 

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !