ತುಮಕೂರು: ಪ್ರಾಥಮಿಕ ಶಾಲಾ ಶಿಕ್ಷಕರ ಸಂಘದ ತಾಲ್ಲೂಕು ಘಟಕದ ನಿರ್ದೇಶಕರ ಆಯ್ಕೆಗೆ ಮಂಗಳವಾರ ನಡೆದ ಚುನಾವಣೆ ಬಿರುಸು ಪಡೆದುಕೊಂಡಿತ್ತು. ಮಧ್ಯರಾತ್ರಿ ಅಥವಾ ಬೆಳಗ್ಗಿನ ಜಾವದ ವೇಳೆಗೆ ಫಲಿತಾಂಶ ಪ್ರಕಟವಾಗಬಹುದು ಎಂದು ನಿರೀಕ್ಷಿಸಲಾಗಿದೆ.
ಸಾಮಾನ್ಯ ಕ್ಷೇತ್ರದ 20 ಸ್ಥಾನಗಳಿಗೆ 47 ಮಂದಿ ಹಾಗೂ ಮಹಿಳಾ ಮೀಸಲು 10 ಸ್ಥಾನಗಳಿಗೆ 20 ಶಿಕ್ಷಕಿಯರು ಸ್ಪರ್ಧಿಸಿದ್ದರು. ನೋಂದಾಯಿತ 1,478 ಶಿಕ್ಷಕರಲ್ಲಿ 1,402 ಮಂದಿ ಮತ ಚಲಾಯಿಸಿದ್ದಾರೆ. ಸಂಜೆ 4 ಗಂಟೆಗೆ ಮತದಾನ ಮುಕ್ತಾಯವಾಗಿದ್ದು, ನಂತರ ಎಣಿಕೆ ಆರಂಭವಾಗಿದೆ.
ಆರ್.ಪರಮೇಶ್ ಹಾಗೂ ತಿಮ್ಮೇಗೌಡ ಬಣದ ನಡುವೆ ಪೈಪೋಟಿ ಏರ್ಪಟ್ಟಿತ್ತು. ಅಧಿಕಾರ ಹಿಡಿಯಲು ಎರಡೂ ಬಣಗಳು ಸೆಣೆಸಾಟ ನಡೆಸಿವೆ. ಬೆಳಿಗ್ಗೆಯಿಂದಲೇ ಸರದಿಯಲ್ಲಿ ನಿಂತ ಶಿಕ್ಷಕರು ಮತ ಚಲಾಯಿಸಿದರು. ಮತದಾನ ನಡೆದ ನಗರದ ಎಲಿಮೆಂಟರಿ ಶಾಲೆ ಆವರಣ ಶಿಕ್ಷಕರಿಂದ ತುಂಬಿ ಹೋಗಿತ್ತು. ಸಾಕಷ್ಟು ಪ್ರತಿಷ್ಠೆ, ಪೈಪೋಟಿಯಿಂದಾಗಿ ಶಿಕ್ಷಕರ ಚುನಾವಣೆಯೂ ಗಮನ ಸೆಳೆದಿದೆ. ಗ್ರಾಮ ಪಂಚಾಯಿತಿ ಚುನಾವಣೆಗೆ ಮುನ್ನ ಶಿಕ್ಷಕರ ಅಂಗಳದಲ್ಲೂ ರಾಜಕೀಯ ಚಟುವಟಿಕೆಗಳು ಬಿರುಸುಪಡೆದುಕೊಂಡಿದ್ದವು.