ಬೇಳೆ ದುಬಾರಿ, ಕುಸಿದ ಟೊಮೆಟೊ ಬೆಲೆ

ತೊಗರಿ ಬೇಳೆ, ಉದ್ದಿನ ಬೇಳೆ, ಬಟಾಣಿ, ಕಡಲೆ ಕಾಳು ತಲಾ ಕೆ.ಜಿ.ಗೆ ₹10 ಏರಿಕೆಯಾಗಿದ್ದರೆ, ಕಡಲೆ ಬೇಳೆ, ಕಡಲೆ ಹಿಟ್ಟು ತಲಾ ಕೆ.ಜಿ.ಗೆ ₹5 ಹೆಚ್ಚಳವಾಗಿದೆ. ಅಡುಗೆ ಎಣ್ಣೆಯಂತೂ ಇತರ ಪದಾರ್ಥಗಳಿಗಿಂತ ತುಸು ಹೆಚ್ಚೇ ದುಬಾರಿಯಾಗಿದ್ದು, ಎಲ್ಲಾ ಬ್ರಾಂಡ್‌ಗಳ ಬೆಲೆ ಕೆ.ಜಿ.ಗೆ ತಲಾ ₹20 ಏರಿಕೆಯಾಗಿದೆ. ಮಹಾಲಯ ಅಮಾವಾಸ್ಯೆ ಹಬ್ಬ ಬಂದಿದ್ದೇ ಬೆಲೆ ಜಿಗಿತಕ್ಕೆ ಕಾರಣವಾಗಿದೆ ಎಂದು ಮಾರುಕಟ್ಟೆ ಮೂಲಗಳು ತಿಳಿಸಿವೆ.

ಟೊಮೆಟೊ ಅಗ್ಗ: ಬೀನ್ಸ್ ಬೆಲೆ ಕಡಿಮೆಯಾಗಿಲ್ಲ. ಕೆ.ಜಿ ₹150ರ ಆಸುಪಾಸಿನಲ್ಲಿ ಮಾರಾಟವಾಗುತ್ತಿದ್ದರೆ, ಟೊಮೆಟೊ ಧಾರಣೆ ತೀವ್ರ ಕುಸಿತ ಕಂಡಿದೆ. ಕಳೆದ ವಾರ ಕೆ.ಜಿ ₹40ಕ್ಕೆ ಮಾರಾಟವಾಗಿದ್ದರೆ, ಈ ವಾರ ₹10–12ಕ್ಕೆ ಇಳಿಕೆಯಾಗಿದೆ. ಬದನೆಕಾಯಿ, ಮೂಲಂಗಿ ಬೆಲೆಯೂ ತುಸು ತಗ್ಗಿದೆ. ಉಳಿದಂತೆ ಇತರ ತರಕಾರಿ ಬೆಲೆಯಲ್ಲಿ ಹೆಚ್ಚಿನ ವ್ಯತ್ಯಾಸವಾಗಿಲ್ಲ. ಹಣ್ಣುಗಳ ಧಾರಣೆಯಲ್ಲೂ ಹೆಚ್ಚಿನ ವ್ಯತ್ಯಾಸ ಕಂಡುಬಂದಿಲ್ಲ.

ಕೋಳಿ ದುಬಾರಿ: ಮೊಟ್ಟೆಕೋಳಿ ಧಾರಣೆಯು ಒಮ್ಮೆಲೆ ಕೆ.ಜಿ.ಗೆ ₹110ರಿಂದ 170ಕ್ಕೆ ಜಿಗಿದಿದ್ದು, ಕೆ.ಜಿ.ಗೆ ₹60ರಿಂದ 70ರ ವರೆಗೆ ಏರಿಕೆಯಾಗಿದೆ. ಬ್ರಾಯ್ಲರ್ ಕೋಳಿ ಕೆ.ಜಿ ₹200ರಿಂದ 220ಕ್ಕೆ ಮಾರಾಟವಾಗುತ್ತಿದೆ. ಮೊಟ್ಟೆ ಬೆಲೆ ಸಹ ಹೆಚ್ಚಳವಾಗಿದ್ದು, 1ಕ್ಕೆ ₹ 6ರಂತೆ ಮಾರಲಾಗುತ್ತಿದೆ. ಲಾಕ್‌ಡೌನ್ ಸಮಯದಲ್ಲಿ ಕೋಳಿ ಸಾಕಾಣಿಕೆ ಸ್ಥಗಿತಗೊಂಡಿದ್ದು ಬೆಲೆ ಏರಿಕೆಗೆ ಪ್ರಮುಖ ಕಾರಣವಾಗಿದೆ. ಬ್ರಾಯ್ಲರ್ ಕೋಳಿ ಸಾಕಾಣಿಕೆ ಮಾಡಿದರೆ 2ರಿಂದ 3 ತಿಂಗಳಲ್ಲಿ ಮಾರುಕಟ್ಟೆಗೆ ಬರುತ್ತದೆ. ಆದರೆ ಮೊಟ್ಟೆಕೋಳಿ ಮಾರುಕಟ್ಟೆಗೆ ಬರಲು 10ರಿಂದ 12 ತಿಂಗಳು ಬೇಕಾಗುತ್ತದೆ. ಹಾಗಾಗಿ ಮತ್ತಷ್ಟು ದಿನಗಳ ಕಾಲ ಬೆಲೆ ಕಡಿಮೆಯಾಗುವ ಸೂಚನೆಗಳು ಕಾಣುತ್ತಿಲ್ಲ.

ಮೀನು: ಬಂಗುಡೆ ಕೆ.ಜಿ ₹260–300, ಬೂತಾಯಿ ₹240, ಅಂಜಲ್ ₹630, ಬೊಳಿಂಜಿರ್ ₹260, ಬಿಳಿ ಮಾಂಜಿ ಕೆ.ಜಿ ₹680ಕ್ಕೆ ನಗರದ ಮತ್ಸ ದರ್ಶಿನಿಯಲ್ಲಿ ಮಾರಾಟವಾಗುತ್ತಿದೆ.