ರೈಲಿನ ಹುಟ್ಟುಹಬ್ಬ; ಖುಷಿಪಟ್ಟ ಪ್ರಯಾಣಿಕರು

7
ತುಮಕೂರು– ಬೆಂಗಳೂರು ಫಾಸ್ಟ್ ಪ್ಯಾಸೆಂಜರ್ ರೈಲಿಗೆ 5 ವರ್ಷ, ರೈಲ್ವೆ ನಿಲ್ದಾಣದಲ್ಲಿ ಬೆಳ್ಳಂ ಬೆಳಿಗ್ಗೆ ಹಬ್ಬದ ಸಡಗರ

ರೈಲಿನ ಹುಟ್ಟುಹಬ್ಬ; ಖುಷಿಪಟ್ಟ ಪ್ರಯಾಣಿಕರು

Published:
Updated:
Deccan Herald

ತುಮಕೂರು : ಸದಾ ಗಿಜಿಗಿಡುವ ನಗರದ ರೈಲ್ವೆ ನಿಲ್ದಾಣದಲ್ಲಿ ಶುಕ್ರವಾರ ಬೆಳಿಗ್ಗೆ ಹಬ್ಬದ ವಾತಾವರಣ. ಮಾವಿನ ತಳಿರು, ಬಾಳೆ ಗಿಡ, ಬಲೂನ್, ಹೂವುಗಳಿಂದ ಅಲಂಕಾರ. ಇದೇನಿದು ವಿಶೇಷ. ಈ ದಿನ ಯಾವುದು ಹಬ್ಬ ಇಲ್ಲವಲ್ಲ. ಹೊಸ ರೈಲು ಏನಾದ್ರೂ ಪ್ರಾರಂಭವಾಯಿತೇ? ಹೀಗೆ ಅಂದುಕೊಂಡವರು ಸ್ವಲ್ಪ ಮುಂದೆ ಹೋಗಿ ನೋಡಿದಾಗ ಹುಟ್ಟುಹಬ್ಬದ ಸಂಭ್ರಮ.

ತುಮಕೂರು- ಬೆಂಗಳೂರು ಫಾಸ್ಟ್ ಪ್ಯಾಸೆಂಜರ್ ರೈಲು ಪ್ರಾರಂಭಗೊಂಡು ಅಗಸ್ಟ್ 3ಕ್ಕೆ 5 ವರ್ಷವಾಯಿತು.

ಈ ಪ್ರಯುಕ್ತ ತುಮಕೂರು -ಬೆಂಗಳೂರ ರೈಲ್ವೆ ಪ್ರಯಾಣಿಕರ ವೇದಿಕೆಯು ತುಮಕೂರು- ಬೆಂಗಳೂರು ಫಾಸ್ಟ್ ಪ್ಯಾಸೆಂಜರ್ ರೈಲಿನ ಹುಟ್ಟುಹಬ್ಬವನ್ನು ಪ್ರತಿ ವರ್ಷದಂತೆ ಆಚರಣೆ ಮಾಡಿತು.

ನಿತ್ಯ ನಗರದಿಂದ ಬೆಂಗಳೂರಿಗೆ ಪ್ರಯಾಣಿಸುವ ಪ್ರಯಾಣಿಕರು, ವೇದಿಕೆ ಪದಾಧಿಕಾರಿಗಳು ತಮ್ಮ ಮನೆಯಲ್ಲಿ ಮಗುವಿನ ಹುಟ್ಟು ಹಬ್ಬ ಅಚರಣೆ ಮಾಡಿದಷ್ಟೇ ಸಡಗರದಿಂದ ರೈಲಿನ ಹುಟ್ಟು ಹಬ್ಬ ಅಚರಣೆ ಮಾಡಿದರು.

ಬೆಳಿಗ್ಗೆ 7 ಗಂಟೆಗೆ ಬಂದು ರೈಲಿನ ಪ್ರತಿ ಬೋಗಿಯ ಹೊರ ಭಾಗದಲ್ಲಿ ಅಲಂಕಾರ ಮಾಡಿದರು. ರೈಲು ಹೊರಡುವ ವೇಳೆಗೆ ಕೇಕ್ ಕತ್ತರಿಸಿ ಖುಷಿಪಟ್ಟರು. ನಿಲ್ದಾಣದಲ್ಲಿದ್ದ ಪ್ರಯಾಣಿಕರಿಗೆ, ಅಧಿಕಾರಿಗಳಿಗೆ ಕೇಕ್ ವಿತರಿಸಿದರು.

ವೇದಿಕೆಯ ಗೌರವ ಅಧ್ಯಕ್ಷೆ ಬಾ.ಹ. ರಮಾಕುಮಾರಿ ಮಾತನಾಡಿ, ‘ಹೋರಾಟ ಮಾಡಿ ಈ ರೈಲನ್ನು ಪಡೆದುಕೊಂಡಿದ್ದು, ಏನೊ ಒಂದು ಸಂಭ್ರಮ.
ಸಾವಿರಾರು ಪ್ರಯಾಣಿಕರಿಗೆ ಇದರಿಂದ ಸಾಕಷ್ಟು ಅನುಕೂಲವಾಗಿದೆ. ರೈಲು ಚಾಲಕರಿಂದಲೇ ಕೇಕ್ ಕಟ್ ಮಾಡಿಸಿ ಎಲ್ಲರೂ ಸಿಹಿ ಹಂಚಿಕೊಳ್ಳುವುದು ವಿಶೇಷ. ರೈಲ್ವೆ ಇತಿಹಾಸದಲ್ಲಿಯೇ ಈ ರೀತಿ ಒಂದು ರೈಲಿನ ಹುಟ್ಟು ಹಬ್ಬದ ಆಚರಣೆ ಮಾಡಿಲ್ಲ. ನಾವು ಮಾಡುತ್ತಿದ್ದೇವೆ" ಎಂದರು.

‘ಮೂಲಸೌಕರ್ಯ ಕಲ್ಪಿಸುವುದು ಸೇರಿ ಹಲವು ಬೇಡಿಕೆಗಳ ಈಡೇರಿಕೆಗೆ ಸಂಸದರಿಗೆ, ರೈಲ್ವೆ ಅಧಿಕಾರಿಗಳಿಗೆ ಮನವಿ ಮಾಡಲಾಗಿದೆ'ಎಂದರು.

ವೇದಿಕೆಯ ಪದಾಧಿಕಾರಿ ನಾಗರಾಜ್ ಮಾತನಾಡಿ,' ಐದು ವರ್ಷಗಳ ಹಿಂದೆ ಬೆಳಿಗ್ಗೆ ಬೆಂಗಳೂರಿಗೆ ಹೋಗಲು ರೈಲುಗಳಿರಲಿಲ್ಲ. 8 ಗಂಟೆಗೆ ಈ ನಿಲ್ದಾಣದಿಂದ ಗೋಲಗುಂಬಜ್ ರೈಲು ಹೊರಡುತ್ತಿತ್ತು. ಇದ್ದಕ್ಕಿದ್ದ ಹಾಗೆ ಬೆಳಿಗ್ಗೆ 6.30ಕ್ಕೆ ಸಮಯ ಬದಲಾಯಿಸಲಾಯಿತು. ಇದರಿಂದ ನಿತ್ಯ ಬೆಂಗಳೂರಿಗೆ ಪ್ರಯಾಣಿಸುವ ನೌಕರರು, ವ್ಯಾಪಾರಸ್ಥರು, ವಿದ್ಯಾರ್ಥಿಗಳಿಗೆ ಬಹಳ ತೊಂದರೆಯಾಯಿತು. ಈ ನಿಲ್ದಾಣದಿಂದಲೇ ಬೆಳಿಗ್ಗೆ ಒಂದು ರೈಲು ಒದಗಿಸಬೇಕು ಎಂದು ಆಗಿನ ರೈಲ್ವೆ ಸಚಿವರಾದ ಮಲ್ಲಿಕಾರ್ಜುನ ಖರ್ಗೆ ಅವರಿಗೆ ಮನವಿ ಮಾಡಿದಾಗ ತಕ್ಷಣ ಸ್ಪಂದಿಸಿದರು. ಹೀಗಾಗಿ , ಅಂದಿನಿಂದ ಈ ರೈಲಿನ ಹುಟ್ಟುಹಬ್ಬ ಆಚರಿಸುತ್ತಿದ್ದೇವೆ’ ಎಂದು ವಿವರಿಸಿದರು.

ಪದಾಧಿಕಾರಿಗಳಾದ ಬಾಲಾಜಿ, ನಾಗರಾಜ್, ರಘೋತ್ತಮರಾವ್, ರಾಜಶೇಖರ್, ದಯಾನಂದ್, ಹುಸೇನ್, ಅರ್ಷದ್, ಚಕ್ರವರ್ತಿ, ಸಾಗರ್, ಗಂಗರಾಮಯ್ಯ, ರೈಲು ನಿಲ್ದಾಣ ಅಧಿಕಾರಿ ರಮೇಶ್, ರೈಲ್ವೆ ಪೊಲೀಸ್ ಅಧಿಕಾರಿ ಕುಬೇರಪ್ಪ ಇದ್ದರು.

ಬರಹ ಇಷ್ಟವಾಯಿತೆ?

  • 2

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !