ಶನಿವಾರ, ಜೂನ್ 6, 2020
27 °C

ಹೆಬ್ರಿ | ಕೊರೊನಾ ಆತಂಕದ ನಡುವೆಯೂ ಕೃಷಿ ಕಾಯಕ ಶುರು.....

ಸುಕುಮಾರ್ ಮುನಿಯಾಲ್ Updated:

ಅಕ್ಷರ ಗಾತ್ರ : | |

Prajavani

ಹೆಬ್ರಿ: ಕೋವಿಡ್‌ ಆತಂಕದ ನಡುವೆಯೂ ಮುಂಗಾರುಪೂರ್ವ ಮಳೆ ಬರುತ್ತಿದ್ದಂತೆಯೇ ಕೃಷಿಕರು ಕೃಷಿ ಕಾರ್ಯ ಶುರು ಮಾಡಿದ್ದಾರೆ.

ಕೊರೊನಾ ಲಾಕ್‌ಡೌನ್‌ನಿಂದ ಉದ್ಯೋಗ ಆರ್ಥಿಕ ಸಮಸ್ಯೆ ಇದ್ದರೂ ಭತ್ತ ಬೇಸಾಯ ಕೃಷಿಯನ್ನು ಮಾಡಲೇಬೇಕು ಎಂಬ ಪಣತೊಟ್ಟ ಬಹುತೇಕ ಮಂದಿ ರೈತರು ಗದ್ದೆಗಿಳಿದಿದ್ದಾರೆ. ಕೊಣ, ಎತ್ತುಗಳು, ಟಿಲ್ಲರ್, ಟ್ರಾಕ್ಟರ್‌ ಬಳಸಿ ಗದ್ದೆಯ ಉಳುಮೆ ಆರಂಭವಾಗಿದೆ. ಜಾನುವಾರು ಗೊಬ್ಬರ, ತರಗಲೆ, ಸೊಪ್ಪು ಹಾಕಿ ಗದ್ದೆಯನ್ನು ಉಳುಮೆ ಮಾಡಿ ಹದಗೊಳಿಸುವುದು, ತರಕಾರಿ ಬೆಳೆ, ಅರಶಿನ ಬೆಳೆ ಸಹಿತ ಉಪಬೆಳೆ ನಾಟಿಗೆ ಸಿದ್ಧತೆ ನಡೆಯುತ್ತಿದೆ.

ಮಳೆಯೂ ವರ: ಜೂನ್ ಮೊದಲ ವಾರದಲ್ಲಿ ಮುಂಗಾರು ಮಳೆ ಬರುವುದು ವಾಡಿಕೆಯಾದರೂ ಮುಂಗಾರುಪೂರ್ವ ಮಳೆ ಈ ಸಲ ಕೃಷಿಕರಿಗೆ ವರದಾನವಾಗಿದೆ. ಕಾರ್ಕಳ ತಾಲ್ಲೂಕಿನ ಶಿರ್ಲಾಲು, ಕೆರ್ವಾಸೆ, ಮಾಳ ಸಹಿತ ಹಲವೆಡೆ ಮೇ ತಿಂಗಳಿನಲ್ಲಿ ಹಲವು ಸಲ ಭಾರಿ ಮಳೆ ಬಂದಿದ್ದು, ಈಗಾಗಲೇ ಗದ್ದೆಯಲ್ಲಿ ನೀರು ಲಭ್ಯ ಇದೆ. ತೇವಾಂಶ ಹೆಚ್ಚಿದೆ. ನದಿ ಹೊಳೆ ಹಳ್ಳಗಳಲ್ಲಿ ನೀರು ತುಂಬಿದೆ. ಬಾವಿಯಲ್ಲೂ ನೀರು ಹೆಚ್ಚಾಗಿದೆ. ಹೆಬ್ರಿ ತಾಲ್ಲೂಕಿನ ಬಹುತೇಕ ಕಡೆಯೂ ಬಯಲು ಗದ್ದೆಯಲ್ಲಿ ನೀರಿನ ಲಭ್ಯತೆ ಇದೆ. ಮುನಿಯಾಲಿನ ಕಾಡುಹೊಳೆಯಲ್ಲಿ ನೀರು ಹರಿಯ ತೊಡಗಿದೆ.

ಮನೆಮಂದಿ ಭಾಗಿ: ಲಾಕ್‌ಡೌನ್‍ನಿಂದಾಗಿ ಮನೆಮಂದಿ ಎಲ್ಲರೂ ಬಹುತೇಕ ಮನೆಯಲ್ಲೇ ಇದ್ದಾರೆ. ಹೆಚ್ಚಿನವರು ಆರ್ಥಿಕ ಮುಗ್ಗಟ್ಟು ಎದುರಿಸುತ್ತಿದ್ದಾರೆ. ಮನೆಯಲ್ಲೇ ಇದ್ದು ಏನು ಮಾಡುವುದು ಎಂದು ಕೃಷಿ ಚಟುವಟಿಕೆಗಳಲ್ಲಿ ತೊಡಗಿಸಿಕೊಂಡಿದ್ದಾರೆ.

ಮಳೆಗಾಲಕ್ಕೆ ಉರುವಲಿಗಾಗಿ ಕಟ್ಟಿಗೆ ಸಂಗ್ರಹ, ಜಾನುವಾರುಗಳ ಹಟ್ಟಿ ಕೊಟ್ಟಿಗೆಗೆ ಹಾಕಲು ತರಗಲೆ ಸಂಗ್ರಹವನ್ನು ಮನೆಮಂದಿಯೇ ಸೇರಿ ಮಾಡಿದ್ದಾರೆ. ‘ನಾವು ಪ್ರತಿವರ್ಷವೂ ಕೂಲಿಯಾಳುಗಳ ಮೂಲಕ ಕೆಲಸ ಮಾಡುತ್ತಿದ್ದೆವು. ಈ ಸಲ ಮನೆಯವರೇ ಸೇರಿ ಮಾಡಿದ್ದೇವೆ. ಸಂಬಳ ನೀಡುವ ಹಣ ಸ್ವಲ್ಪ ಉಳಿತಾಯವಾಗಿ’ದೆ ಎಂದು ಕೃಷಿಕರಾದ ಕಡ್ತಲ ಸಿರಿಬೈಲಿನ ಆನಂದ ಆಚಾರ್ಯ ಹೇಳುತ್ತಾರೆ.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು