ಉಡುಪಿ | ಎಪಿಎಂಸಿ ಅವ್ಯವಸ್ಥೆ: ವರ್ತಕರ ಪ್ರತಿಭಟನೆ

ಮಾರುಕಟ್ಟೆಯ ದುರವಸ್ಥೆ ಖಂಡಿಸಿ ಹಲವು ದಿನಗಳಿಂದ ಮಾರಾಟ ಸ್ಥಳದಲ್ಲಿ ಕಪ್ಪು ಬಾವುಟ ಕಟ್ಟಿ ವ್ಯಾಪಾರ ನಡೆಸಿದರೂ ಅಧಿಕಾರಿಗಳು ಸ್ಪಂದಿಸಿಲ್ಲ ಎಂದು ವರ್ತಕರು ಆರೋಪಿಸಿದರು.

ಎಪಿಎಂಸಿಯ ಜಾಗವನ್ನು ಕೆಲವು ವ್ಯಕ್ತಿಗಳಿಗೆ ಮಾರಾಟ ಮಾಡಲಾಗಿದೆ. 20ರಿಂದ 25 ವರ್ಷಗಳ ಕಾಲ ಇಲ್ಲೇ ವ್ಯಾಪಾರ ಮಾಡುತ್ತಿರುವವರಿಗೆ ನೀಡಿಲ್ಲ ಎಂದೂ ಪ್ರತಿಭಟನಕಾರರು ಆರೋಪಿಸಿದರು.

‘ಎಪಿಎಂಸಿಯಲ್ಲಿ ಕುಡಿಯುವ ನೀರಿನ ವ್ಯವಸ್ಥೆ ಇಲ್ಲ. ಪ್ರತಿ ದಿನ ಕಸ ವಿಲೇವರಿ ಮಾಡದೆ ರಾಶಿ ಬಿದ್ದು, ಗಬ್ಬು ನಾರುತ್ತದೆ. ಶೌಚಾಲಯದಲ್ಲಿ ಒಂದು ಹನಿ ನೀರಿಲ್ಲ. ಒಟ್ಟಿನಲ್ಲಿ ಎಪಿಎಂಸಿ ಪ್ರಾಂಗಣ ಅವ್ಯವಸ್ಥೆಗಳ ಆಗರವಾಗಿದೆ’ ಎಂದು ವರ್ತಕ ಫಯಾಸ್‌ ಅಹಮ್ಮದ್‌ ಆರೋಪಿಸಿದರು.

ಕೆಲವು ವರ್ತಕರ ಶೆಡ್‌ಗಳನ್ನು ತೆರವುಗೊಳಿಸಲು ಈಚೆಗೆ ಜೆಸಿಬಿ ಯಂತ್ರ ತರಿಸಲಾಗಿತ್ತು. ನಾವು ರಸ್ತೆಯಲ್ಲಿ ಮಲಗಿ ಪ್ರತಿಭಟನೆ ಮಾಡಿರುವುದರಿಂದ ಅಧಿಕಾರಿಗಳು ಹಿಂದೆ ಸರಿದರು ಎಂದೂ ಹೇಳಿದರು.

ಮಳೆ ಬಂದರೆ ಎಪಿಎಂಸಿ ಆವರಣದಲ್ಲಿ ನೀರು ತುಂಬಿಕೊಳ್ಳುತ್ತದೆ. ಅದರಲ್ಲೇ ವ್ಯಾಪಾರ ಮಾಡುವ ಅನಿವಾರ್ಯತೆ ನಮಗಿದೆ. ವಾರದ ಸಂತೆಯ ದಿನ ಇಲ್ಲಿನ ಅವ್ಯವಸ್ಥೆ ಕಂಡು ಗ್ರಾಹಕರು ನಮ್ಮನ್ನು ಬೈಯುತ್ತಾರೆ ಎಂದು ವರ್ತಕ ಪ್ರಭು ಗೌಡ ತಿಳಿಸಿದರು.

ವರ್ತಕರಾದ ಚಂದಪ್ಪ, ಲಕ್ಷ್ಮಣ್‌, ಓಬಳೇಶ್, ಸಯ್ಯದ್‌ ಮತ್ತಿತರರು ಇದ್ದರು.