ಅಂಬಾಗಿಲು ಹಾಗೂ ಗುಂಡಿಬೈಲು ರಸ್ತೆಯಲ್ಲಿರುವ ಶಿವಳ್ಳಿ ಪಟೇಲರ ಮನೆಯ ಎದುರಿನ ರಸ್ತೆಯಲ್ಲಿ ದೊಡ್ಡದಾದ ಹೊಂಡ ನಿರ್ಮಾಣವಾಗಿದೆ. ತಿಂಗಳ ಹಿಂದೆ ಸಣ್ಣದಿದ್ದ ಗುಂಡಿ ಈಗ ಹೊಂಡದಂತೆ ಅಗಲವಾಗಿದೆ. ರಾತ್ರಿಯ ಹೊತ್ತು ಹಾಗೂ ಮಳೆ ಬರುತ್ತಿರುವ ಸಂದರ್ಭದಲ್ಲಿ ದ್ವಿಚಕ್ರ ವಾಹನಗಳು ಹೊಂಡದಲ್ಲಿ ಇಳಿದರೆ ಅವಘಡಗಳು ಖಚಿತ. ಸಾರ್ವಜನಿಕರು ಹೊಂಡಕ್ಕೆ ಕಾಲಿಟ್ಟರೆ ಮೂಳೆ ಮುರಿದುಕೊಳ್ಳಬೇಕಾಗುತ್ತದೆ. ರಸ್ತೆಯ ತುಂಬೆಲ್ಲ ಹೊಂಡಬಿದ್ದಿರುವುದು ಸ್ಥಳೀಯ ಜನಪ್ರತಿನಿಧಿಗೆ ತಿಳಿದಿದ್ದರೂ ಮುಚ್ಚಿಸುವ ಕರ್ತವ್ಯ ಮಾಡಿಲ್ಲ. ಹೀಗಿರುವ ಹೊಂಡ ಮತ್ತಷ್ಟು ದೊಡ್ಡದಾಗಿ ಹಲವರು ಬಿದ್ದು ಅನಾಹುತಗಳಾಗುವ ಮುನ್ನ ಸಂಬಂಧಪಟ್ಟವರು ಎಚ್ಚೆತ್ತುಕೊಂಡು ಗುಂಡಿ ಮುಚ್ಚಿಸಬೇಕು.