ಉಡುಪಿ: ಜಿಲ್ಲೆಯಲ್ಲಿ ಶನಿವಾರ ನಾಲ್ವರು ಕೋವಿಡ್-19 ಸೋಂಕಿತರು ಮೃತಪಟ್ಟಿದ್ದು, 175 ಮಂದಿಗೆ ಸೋಂಕು ದೃಢಪಟ್ಟಿದೆ.
ಸೋಂಕಿತರಲ್ಲಿ ಉಡುಪಿಯ 106, ಕುಂದಾಪುರದ 34, ಕಾರ್ಕಳದ 31 ಹೊರ ಜಿಲ್ಲೆಗಳ ನಾಲ್ವರು ಸೇರಿದ್ದು, 97 ಪುರುಷರು, 78 ಮಹಿಳೆಯರು ಇದ್ದಾರೆ.
ನಾಲ್ವರು ಸಾವು:ಉಡುಪಿ ತಾಲ್ಲೂಕಿನ 79 ಹಾಗೂ 70 ವರ್ಷದ ವೃದ್ಧೆಯರು, 62 ವರ್ಷದ ವೃದ್ಧ, ಕಾರ್ಕಳ ತಾಲ್ಲೂಕಿನ 68 ವರ್ಷದ ವ್ಯಕ್ತಿ ಚಿಕಿತ್ಸೆಗೆ ಸ್ಪಂದಿಸದೆ ಮೃತಪಟ್ಟಿದ್ದಾರೆ.
ಸೋಂಕಿನ ಲಕ್ಷಣಗಳು ಕಂಡುಬಂದ 1,435 ಶಂಕಿತರ ಗಂಟಲ ದ್ರವದ ಮಾದರಿಯನ್ನು ಪ್ರಯೋಗಾಲಯಕ್ಕೆ ಕಳುಹಿಸಲಾಗಿದೆ. ಶನಿವಾರ 232 ಮಂದಿ ಗುಣಮುಖರಾಗಿದ್ದು, ಜಿಲ್ಲೆಯಲ್ಲಿ ಸೋಂಕಿನಿಂದ ಮುಕ್ತರಾದವರ ಸಂಖ್ಯೆ 10,493ಕ್ಕೇರಿಕೆಯಾಗಿದೆ.
ಸದ್ಯ 1,906 ಸಕ್ರಿಯ ಪ್ರಕರಣಗಳಿದ್ದು, ಒಟ್ಟು ಸೋಂಕಿತ ಪ್ರಕರಣಗಳ ಸಂಖ್ಯೆ 12,511 ಇವೆ. ಮೃತರ ಸಂಖ್ಯೆ 112ಕ್ಕೇರಿಕೆಯಾಗಿದೆ.