ಜಿಎಸ್‌ಟಿ: ಚಿನ್ನಾಭರಣ ಖರೀದಿಗೆ ತಟ್ಟದ ಬಿಸಿ

7
ಹೊಸ ತೆರಿಗೆ ವ್ಯವಸ್ಥೆಗೆ ಹೊಂದಿಕೊಂಡ ಗ್ರಾಹಕರು: ಚಿನ್ನದ ಮೇಲೆ ಕಪ್ಪುಹಣ ಹೂಡಿಕೆಗೆ ಕಡಿವಾಣ

ಜಿಎಸ್‌ಟಿ: ಚಿನ್ನಾಭರಣ ಖರೀದಿಗೆ ತಟ್ಟದ ಬಿಸಿ

Published:
Updated:
Deccan Herald

ಉಡುಪಿ: ‘ಜಿಎಸ್‌ಟಿ ಜಾರಿಗೂ ಮುನ್ನ ಗ್ರಾಹಕರಲ್ಲಿ ಆತಂಕಗಳು ಮನೆಮಾಡಿದ್ದವು. ಚಿನ್ನಾಭರಣಗಳ ಮೇಲೆ ಹೆಚ್ಚಿನ ತೆರಿಗೆ ವಿಧಿಸಲಾಗುತ್ತದೆ ಎಂಬ ಭಯ ನಿರ್ಮಾಣವಾಗಿತ್ತು. ಈಗ ಆತಂಕಗಳೆಲ್ಲ ಹುಸಿಯಾಗಿವೆ’ ಎನ್ನುತ್ತಾರೆ ನಗರದ ಪ್ರಮುಖ ಚಿನ್ನಾಭರಣ ಮಾರಾಟ ಮಳಿಗೆಯ ಮುಖ್ಯಸ್ಥರು.‌

ದೇಶದಲ್ಲಿ ಹೊಸ ತೆರಿಗೆ ವ್ಯವಸ್ಥೆ ಜಾರಿಯಾದಾಗ ಜನರು ತಕ್ಷಣಕ್ಕೆ ಸ್ವೀಕರಿಸುವುದಿಲ್ಲ. ಹಾಗೆಯೇ, ಸರಕು ಮತ್ತು ಸೇವಾ ತೆರಿಗೆ (ಜಿಎಸ್‌ಟಿ) ಜಾರಿಯಾದಾಗಲೂ ಸಾರ್ವಜನಿಕರು ಮೊದಲು ವಿರೋಧ ವ್ಯಕ್ತಪಡಿಸಿದರು. ಬಳಿಕ ನಿಧಾನಗತಿಯಲ್ಲಿ ಹೊಸ ತೆರಿಗೆ ವ್ಯವಸ್ಥೆಗೆ ಹೊಂದಿಕೊಂಡರು ಎನ್ನುತ್ತಾರೆ ಚಿನ್ನದಂಗಡಿ ಮಾಲೀಕರು.

ಹಿಂದೆ, ಚಿನ್ನಾಭರಣಗಳ ಮೇಲೆ ಕೇಂದ್ರ ಸರ್ಕಾರ ಶೇ 1ರಷ್ಟು ಮೌಲ್ಯವರ್ಧಿತ ತೆರಿಗೆ (ವ್ಯಾಟ್‌) ಶೇ 1 ಆಮದು ಸುಂಕ ಹಾಗೂ ಕಣ್ಣಿಗೆ ಕಾಣದಂತಹ ಇತರೆ ತೆರಿಗೆ ವಿಧಿಸುತ್ತಿತ್ತು. ಜಿಎಸ್‌ಟಿ ಬಳಿಕ ದೇಶದಾದ್ಯಂತ ಏಕ ರೂಪದ ತೆರಿಗೆ ವ್ಯವಸ್ಥೆ ಅಸ್ತಿತ್ವಕ್ಕೆ ಬಂದಿದ್ದು, ಚಿನ್ನಾಭರಣಗಳ ಮೇಲೆ ಶೇ 3ರಷ್ಟು ತೆರಿಗೆ ಹಾಕಲಾಗುತ್ತಿದೆ. ಇದರಲ್ಲಿ ಎಸ್‌ಜಿಎಸ್‌ಟಿ ಹಾಗೂ ಸಿಜಿಎಸ್‌ಟಿ ಪಾಲು ತಲಾ ಅರ್ಧದಷ್ಟಿದೆ. ಹಿಂದಿನ ಪದ್ಧತಿಗೆ ಹೋಲಿಸಿದರೆ ಜಿಎಸ್‌ಟಿ ಹೆಚ್ಚು ಪಾರದರ್ಶಕ ಎನ್ನುತ್ತಾರೆ ಉದ್ಯಮಿಗಳು.

ಜಿಎಸ್‌ಟಿಯಲ್ಲಿ ಶೇ 5ರಿಂದ ಶೇ 28ರವರೆಗೂ ತೆರಿಗೆ ವಿಧಿಸುವ ಹಂತಗಳಿದ್ದು, ಈ ವ್ಯಾಪ್ತಿಗೆ ಚಿನ್ನಾಭರಣ ಉದ್ಯಮವನ್ನು ಸೇರಿಸುವ ಆತಂಕ ಇತ್ತು. ಕನಿಷ್ಠ ಶೇ 5ರಷ್ಟು ತೆರಿಗೆ ವಿಧಿಸಿದ್ದರೂ ಗ್ರಾಹಕರ ಮೇಲೆ ಹೆಚ್ಚಿನ ತೆರಿಗೆ ಹೊರೆ ಬೀಳುತ್ತಿತ್ತು. ಉದ್ಯಮವೂ ಅಪಾಯಕ್ಕೆ ಸಿಲುಕುವ ಆತಂಕವಿತ್ತು. ಕೊನೆಗೆ ಶೇ 3ರಷ್ಟು ತೆರಿಗೆ ವಿಧಿಸಿದ್ದರಿಂದ ಆತಂಗಳು ದೂರಾದವು ಎನ್ನುತ್ತಾರೆ ಉದ್ಯಮಿಗಳು.

ಆರಂಭದಲ್ಲಿ ಜಿಎಸ್‌ಟಿ ಹೊರೆ ಹೆಚ್ಚಾಯಿತು ಎಂಬ ಅಸಮಾಧಾನ ಕೇಳಿಬರುತ್ತಿತ್ತು. ಬಳಿಕ ಗ್ರಾಹಕರು ಹೊಸ ವ್ಯವಸ್ಥೆಗೆ ಹೊಂದಿಕೊಳ್ಳಲು ಆರಂಭಿಸಿದರು. ಈಗ ಯಾರೂ ತಕರಾರು ತೆಗೆಯುವುದಿಲ್ಲ. ವ್ಯವಹಾರವೂ ಕುಸಿದಿಲ್ಲ ಎನ್ನುತ್ತಾರೆ ಚಿನ್ನದಂಗಡಿ ಸಿಬ್ಬಂದಿ 

‘ಹಿಂದೆಲ್ಲ, ಚಿನ್ನದ ಮೇಲೆ ಹಾಕಲಾಗುತ್ತಿದ್ದ ತೆರಿಗೆ ಕಣ್ಣಿಗೆ ಕಾಣುತ್ತಿರಲಿಲ್ಲ. ಈಗ ತೆರಿಗೆ ವ್ಯವಸ್ಥೆ ಮುಕ್ತವಾಗಿದೆ. ಜನರು ಕಟ್ಟುತ್ತಿರುವ ತೆರಿಗೆ ಸರ್ಕಾರಕ್ಕೆ ಸಂದಾಯವಾಗುತ್ತಿದೆ ಎಂಬ ಭಾವನೆ ಮೂಡುತ್ತಿದೆ. ಹಾಗಾಗಿ, ಸ್ವಲ್ಪ ಹೊರೆಯಾದರೂ ಸಹಿಸಿಕೊಳ್ಳಬೇಕಿದೆ’ ಎನ್ನುತ್ತಾರೆ ಗ್ರಾಹಕರಾದ ಪವಿತ್ರಾ ಶೆಟ್ಟಿ.

ಜಿಎಸ್‌ಟಿ ಜಾರಿಯಾದ ಬಳಿಕ ಮಧ್ಯಮ ವರ್ಗದವರ ಕೈಗೆ ಸ್ವರ್ಣ ನಿಲುಕುವುದಿಲ್ಲ ಎಂಬ ಭಾವನೆ ಇತ್ತು. ಈಗ ಅಂತಹ ವ್ಯತ್ಯಾಸ ಕಾಣುತ್ತಿಲ್ಲ. ಮದುವೆ, ಮುಂಜಿ, ಶುಭ ಸಮಾರಂಭಗಳಿಗೆ ಚಿನ್ನ ಖರೀದಿಸದೆ ಪರ್ಯಾಯ ದಾರಿಯೂ ಇಲ್ಲ. ಹಾಗಾಗಿ, ಹಿಂದಿನಂತೆಯೇ ಈಗಲೂ ಖರೀದಿ ಮುಂದುವರಿದಿದೆ ಎನ್ನುತ್ತಾರೆ ಶಶಿಕಲಾ ಹೆಗಡೆ.

₹ 2 ಲಕ್ಷ ಮೇಲಿನ ಚಿನ್ನಾಭರಣ ಖರೀದಿಗೆ ಗ್ರಾಹಕರ ಪ್ಯಾನ್‌ ಸಂಖ್ಯೆಯನ್ನು ಕಡ್ಡಾಯವಾಗಿ ಪಡೆಯುವಂತೆ ನಿಯಮ ರೂಪಿಸಲಾಗಿದೆ. ಮದುವೆ, ಇನ್ನಿತರ ಶುಭಕಾರ್ಯಗಳಿಗೆ ಕನಿಷ್ಠ ₹ 3 ಲಕ್ಷ ಮೌಲ್ಯದ ಚಿನ್ನ ಖರೀದಿಸಲೇಬೇಕು. ಈ ಮಿತಿಯನ್ನು ಏರಿಸಿದರೆ ಒಳಿತು ಎನ್ನುತ್ತಾರೆ ಗ್ರಾಹಕರಾದ ಶಾಯಿದ ಬೇಗಂ.

Tags: 

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !