ಕಾರ್ಕಡ: ಭತ್ತ ನಾಟಿಕಾರ್ಯ ಚುರುಕು

ಮೇ ಮೊದಲ ವಾರದಲ್ಲಿ ಬಿತ್ತನೆ ಕಾರ್ಯ ನಡೆಸಿದವರಿಗೆ ಜೂನ್ ತಿಂಗಳ ಮುಂಗಾರು ಮಳೆ ವರವಾಗಿ ಪರಿಣಮಿಸಿದೆ. ಬಿತ್ತನೆ ನಡೆಸಿ 20ರಿಂದ 25ದಿನಗಳ ನಂತರ ನಾಟಿಗೆ ಸಿದ್ಧಗೊಳ್ಳುತ್ತದೆ. ಅದರಂತೆ ಕೆಲವೊಂದು ಭಾಗದಲ್ಲಿ ಬೇಗ ಬಿತ್ತನೆ ನಡೆಸಿದವರಿಗೆ ಅನುಕೂಲವಾಗಿದೆ. ಕಳೆದ ಬಾರಿಗೆ ಹೋಲಿಸಿದರೆ ಈ ಬಾರಿ ಚಂಡಮಾರುತದ ಪರಿಣಾಮ ಮಳೆ ಬೇಗನೆ ಆರಂಭವಾಗಿ ಕೃಷಿ ಕಾಯಕಕ್ಕೆ ಅನುಕೂಲ ಮಾಡಿಕೊಟ್ಟಿದೆ.

ಕೂಲಿಯಾಳುಗಳಿಂದ ನಾಟಿ: ಇತ್ತೀಚಿಗಿನ ವರ್ಷಗಳಲ್ಲಿ ಕೂಲಿಯಾಳುಗಳ ಸಮಸ್ಯೆಯಿಂದ ರೈತ ಸಮುದಾಯ ನಾಟಿ ಕಾರ್ಯಕ್ಕೆ ಯಂತ್ರಗಳ ಮೂಲಕ ಮೊರೆ ಹೋಗುತ್ತಿದ್ದರು. ಆದರೆ, ಈ ಬಾರಿ ಲಾಕ್‌ಡೌನ್‌ನಿಂದಾಗಿ ನಾಟಿ ಯಂತ್ರಗಳು ಇನ್ನೂ ಬಂದಿಲ್ಲ. ಹೀಗಾಗಿ ಬಲು ಅಪರೂಪವೆಂಬಂತೆ ಸ್ಥಳೀಯ ಕೂಲಿಯಾಳುಗಳ ನೆರವಿನೊಂದಿಗೆ ಸಾಲಿಗ್ರಾಮ, ಕೋಟ ಪರಿಸರದಲ್ಲಿ ಕೃಷಿ ಕಾರ್ಯ ನಡೆಸಲಾಗುತ್ತಿದೆ.