ಮನೆಯಂಗಳದಲ್ಲಿ ಜೇನು ಕೃಷಿ

ಮಂಗಳವಾರ, ಜೂನ್ 25, 2019
26 °C
ರೈತರಿಗೆ ಉಪ ಆದಾಯ; ಬೆಳೆ ಹೆಚ್ಚಳಕ್ಕೆ ಉಪಾಯ

ಮನೆಯಂಗಳದಲ್ಲಿ ಜೇನು ಕೃಷಿ

Published:
Updated:
Prajavani

ಶಿರಸಿ: ಯಲ್ಲಾಪುರ ತಾಲ್ಲೂಕು ಕೋಟೆಮನೆಯಲ್ಲಿ ರಸ್ತೆ ಅಂಚಿನಲ್ಲಿ ಸರ್ಕಾರಿ ಶಾಲೆಯಿದೆ. ಈ ಶಾಲೆಯ ಎದುರು ಸಾಲಾಗಿ ಸಿದ್ದಿಗರ ಮನೆಗಳಿವೆ. ಇಲ್ಲಿ ಒಂದು ಸುತ್ತು ಓಡಾಡಿದರೆ ಜೇನಿನ ಝೇಂಕಾರ ಕಿವಿಗೆ ತಟ್ಟುತ್ತದೆ.

ಕಾಡಿನ ಸಾಂಗತ್ಯದಲ್ಲಿ ಬದುಕುವ ಸಿದ್ದಿ ಸಮುದಾಯದವರಿಗೆ ಜೇನುಗೂಡು, ಜೇನುತುಪ್ಪ ತೆಗೆಯುವ ಕಲೆ ಇವೆಲ್ಲ ರಕ್ತಗತವಾಗಿಯೇ ಬಂದಿರುತ್ತದೆ. ಕೂಲಿ ಕೆಲಸ ಮಾಡಿಕೊಂಡು ಜೀವನ ನಡೆಸುವ ಇವರು ಉಪ ಆದಾಯವಾಗಿ ಮನೆಯಂಗಳದಲ್ಲಿ ಜೇನು ಸಾಕಣೆ ಮಾಡುತ್ತಾರೆ. ಇರುವ 2–3 ಗುಂಟೆ ಜಾಗದಲ್ಲಿ ಮನೆಯ ಸುತ್ತ ಜೇನು ಪೆಟ್ಟಿಗೆಗಳನ್ನು ಇಟ್ಟಿದ್ದಾರೆ.

ಪುಗಡಿ ನೃತ್ಯ ಕಲಾವಿದೆ ಲಕ್ಷ್ಮಿ ಸಿದ್ದಿ ಅವರ ಮನೆ ಎದುರಿನ ಸಣ್ಣ ಜಾಗದಲ್ಲಿ ಎಂಟು ಜೇನು ಪೆಟ್ಟಿಗೆ ಇಟ್ಟಿದ್ದಾರೆ. ಪೆಟ್ಟಿಗೆ ಮುಚ್ಚಳವನ್ನು ತೆಗೆದು ತೋರಿಸಿದ ಅವರು, ಫ್ರೇಮ್ ಅನ್ನು ಕೈಯಲ್ಲಿ ಹಿಡಿದು, ‘ಬನ್ನಿ ನೀವು ಹಿಡಿದುಕೊಳ್ಳಬಹುದು, ಹುಳುಗಳು ಕಚ್ಚುವುದಿಲ್ಲ’ ಎನ್ನುತ್ತ ಜೇನು ಸಾಕಣೆ ಕುರಿತು ಮಾಹಿತಿ ನೀಡಿದರು.

‘ನಾಲ್ಕು ವರ್ಷಗಳ ಹಿಂದೆ ಒಂದು ಪೆಟ್ಟಿಗೆಯಿಂದ ಜೇನು ಸಾಕಣೆ ಶುರು ಮಾಡಿದವು. ಈಗ ಅಂಗಳ ತುಂಬ ಪೆಟ್ಟಿಗೆಗಳಿವೆ. ಸಮೀಪವೇ ಕಾಡು ಇರುವುದಕ್ಕೆ ಜೇನ್ನೊಣಗಳಿಗೆ ಮಕರಂದಕ್ಕೆ ಕೊರತೆಯಾಗುವುದಿಲ್ಲ. ಜೇನು ಮಕರಂದ ಸಂಗ್ರಹಿಸುವಾಗ ಹೂವುಗಳಿಗೆ ಪರಾಗಸ್ಪರ್ಶವನ್ನೂ ಮಾಡುತ್ತದೆ. ಹೀಗಾಗಿ ಜೇನಿದ್ದರೆ, ಕೃಷಿ ಬೆಳೆಯೂ ಅಧಿಕ’ ಎಂದು ಅವರು ಪಾಠ ಮಾಡಿದರು.

‘ಸಂಸಾರ ಕೋಣೆಯಲ್ಲಿ ಸಂಗ್ರಹವಾಗುವ ತುಪ್ಪ ತೆಗೆಯಬಾರದು. ಅದು ಶ್ರಮಪಡುವ ಜೇನಿಗೆ ಮೀಸಲಿಡಬೇಕು. ಮೇಲೆ ಶೇಖರಣೆಯಾಗುವ ತುಪ್ಪ ಮಾತ್ರ ನಮ್ಮ ಬಳಕೆಗೆ ಸಿಗುತ್ತದೆ. ನಾನು ತುಪ್ಪ ತೆಗೆಯುವುದು ಕಡಿಮೆ. ಮಗ ಅನಂತನೇ ಆ ಕೆಲಸ ಮಾಡುತ್ತಾನೆ. ಒಂದು ಪೆಟ್ಟಿಗೆಯಿಂದ ಒಮ್ಮೆ 4–5 ಕೆ.ಜಿ ತುಪ್ಪ ಸಿಗುತ್ತದೆ. ಗಾಳಿ–ಮಳೆಯಿದ್ದರೆ ಹುಳುಗಳು ಕೆಲಸಕ್ಕೆ ಹೋಗುವುದಿಲ್ಲ. ಆಗ ನಾವೇ ಸಕ್ಕರೆ ಪಾಕವಿಟ್ಟು, ಅವಕ್ಕೆ ಆಹಾರ ಕೊಡಬೇಕು’ ಎಂದು ಅವರು ‘ಪ್ರಜಾವಾಣಿ’ಗೆ ತಿಳಿಸಿದರು.

’ನಮ್ಮವರು ಜೇನು ಪರಿಣಿತರು. ಹೀಗಾಗಿ ನಾವು ತೆಗೆಯುವ ತುಪ್ಪಕ್ಕೆ ಬೇಡಿಕೆ ಹೆಚ್ಚು. ಬೆಂಗಳೂರು, ಮಂಗಳೂರಿನಿಂದ ಮನೆ ಬಾಗಿಲಿಗೆ ಬಂದು ಜೇನುತುಪ್ಪ ಒಯ್ಯುತ್ತಾರೆ. ಬೆಂಗಳೂರಿನ ಸ್ವಾಮೀಜಿಯೊಬ್ಬರು ಪ್ರತಿವರ್ಷ ನಮ್ಮ ಮನೆಗೆ ಬಂದು ಜೇನುತುಪ್ಪ ಖರೀದಿಸುತ್ತಾರೆ. ಕೆ.ಜಿ.ಯೊಂದಕ್ಕೆ ₹ 450ರಷ್ಟು ದರವಿದೆ’ ಎಂದು ಅವರು ಬೇಡಿಕೆಯ ಪರಿಯನ್ನು ಬಿಚ್ಚಿಟ್ಟರು.

ವಿರಾಟ್ ಕೊಹ್ಲಿ ನಾಯಕತ್ವದ ಭಾರತ ಕ್ರಿಕೆಟ್‌ ತಂಡ ಕಪ್ ಗೆಲ್ಲುತ್ತಾ? ಐಸಿಸಿ ವಿಶ್ವಕಪ್ 2019 ಯಾರು ಗೆಲ್ಲುತ್ತಾರೆ? ಕೋಟ್ಯಂತರ ಕ್ರಿಕೆಟ್ ಪ್ರೇಮಿಗಳ ನಿರೀಕ್ಷೆಗೆ ಉತ್ತರ ಸಿಗುವ ಕಾಲ ಬಂದಿದೆ. ವಿಶ್ವಕಪ್ ಕ್ರಿಕೆಟ್‌ನ ಸ್ಕೋರ್ ಅಪ್‌ಡೇಟ್ಸ್‌, ಮ್ಯಾಚ್‌ಗಳ ವರದಿ, ವಿಶ್ವಕಪ್ ಕ್ರಿಕೆಟ್ ಹೆಜ್ಜೆ ಗುರುತು, ಆಟಗಾರರ ಸಂದರ್ಶನ, ವೇಳಾಪಟ್ಟಿ ತಿಳಿದುಕೊಳ್ಳಲು www.prajavani.net ಜಾಲತಾಣಕ್ಕೆ ಭೇಟಿ ನೀಡಿ. ಕ್ರೀಡಾಪ್ರೇಮಿಗಳ ನೆಚ್ಚಿನ ಆಯ್ಕೆ ‘ಪ್ರಜಾವಾಣಿ’. ಇದು ಅತ್ಯಂತ ವಿಶ್ವಾಸಾರ್ಹ ಸುದ್ದಿ ಮಾಧ್ಯಮ.

ಬರಹ ಇಷ್ಟವಾಯಿತೆ?

  • 1

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !