ಶಿರಸಿ: ‘ಡಿ.18ರಿಂದ 24ರವರೆಗೆ ರಾಜ್ಯದಾದ್ಯಂತ ಭಗವದ್ಗೀತಾ ಅಭಿಯಾನ ಹಮ್ಮಿಕೊಳ್ಳಲಾಗಿದೆ’ ಎಂದು ಸೋಂದಾ ಸ್ವರ್ಣವಲ್ಲಿ ಮಠದ ಗಂಗಾಧರೇಂದ್ರ ಸರಸ್ವತಿ ಸ್ವಾಮೀಜಿ ಹೇಳಿದರು.
ಮಂಗಳವಾರ ಸುದ್ದಿಗೋಷ್ಠಿಯಲ್ಲಿ ಮಾಹಿತಿ ನೀಡಿದ ಅವರು, ‘ಡಿ.25ರಂದು ಗೀತಾ ಜಯಂತಿ ನಡೆಯಲಿದೆ. ಕೊರೊನಾ ಕಾರಣದಿಂದ ಈ ಬಾರಿ ಆನ್‌ಲೈನ್ ಮೂಲಕವೇ ಅಭಿಯಾನ ನಡೆಸಲು ನಿರ್ಧರಿಸಲಾಗಿದೆ’ ಎಂದರು.
‘ಅಭಿಯಾನದಲ್ಲಿ ಬೆಂಗಳೂರು ನಗರ ಭಾಗದವರು ಮುಂಚೂಣಿಯಲ್ಲಿದ್ದಾರೆ. ಡಿ.25ರಂದು ಏಕಕಾಲಕ್ಕೆ ಒಂದು ಸಾವಿರಕ್ಕೂ ಹೆಚ್ಚು ಜನರು ಮೂರನೆಯ ಅಧ್ಯಾಯ ಪಠಣ ಮಾಡಲಿದ್ದಾರೆ.ಅಪರಾಧ ತಡೆಯಲು ಈ ಅಧ್ಯಾಯ ತಿಳಿವಳಿಕೆ ನೀಡುತ್ತದೆ.ಭಾಷಣ, ಗೀತಾ ಕಂಠಪಾಠ ಸ್ಪರ್ಧೆ ಆಯೋಜಿಸಲಾಗುತ್ತಿದೆ. ಪ್ರತಿದಿನ ಪ್ರವಚನ ನಡೆಯಲಿದೆ’ ಎಂದರು.
ಹೆಚ್ಚಿನ ಮಾಹಿತಿಗೆ ಗಂಗಾಧರ ಬೋಡೆ (ಮೊಬೈಲ್ –98453 71191), ನಾರಾಯಣ ಭಟ್ಟ ಸೂಳಗಾರ (ಮೊಬೈಲ್:94495 68081) ಅವರನ್ನು ಸಂಪರ್ಕಿಸಬಹುದು.
