ಗುರುವಾರ , ಫೆಬ್ರವರಿ 27, 2020
19 °C
ಕೇರಳದ ಕಣ್ಣೂರು ಬದಲು ಬೆಂಗಳೂರು ವಿಮಾನ ನಿಲ್ದಾಣದಿಂದ ಪ್ರಯಾಣ

ಬೌದ್ಧ ಮುಖಂಡರಿಂದ ‘ಕೊರೊನಾ’ ಜಾಗೃತಿ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

Prajavani

ಮುಂಡಗೋಡ: ಕೇರಳದಲ್ಲಿ ಕೊರೊನಾ ವೈರಾಣು ಸೋಂಕು ಪ್ರಕರಣ ವರದಿಯಾದ ಕಾರಣ, ಮುಂಡಗೋಡದ ಟಿಬೆಟನ್ ನಿರಾಶ್ರಿತರ ಶಿಬಿರಕ್ಕೆ ಬರುವವರೂ ದಾರಿ ಬದಲಿಸಿದ್ದಾರೆ. ಕಣ್ಣೂರು ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದ ಬದಲು ಬೆಂಗಳೂರು ಹಾಗೂ ಹುಬ್ಬಳ್ಳಿ ವಿಮಾನ ನಿಲ್ದಾಣವನ್ನು ಆಯ್ಕೆ ಮಾಡಿಕೊಳ್ಳುತ್ತಿದ್ದಾರೆ.

ಕೇರಳದಲ್ಲಿ ವೈರಾಣು ಸೋಂಕಿನ ಪ್ರಕರಣಗಳು ಕಂಡುಬರುವ ಮೊದಲು ಟಿಬೆಟನ್ನರು, ದೆಹಲಿಯಿಂದ ಕಣ್ಣೂರಿಗೆ ಬರುತ್ತಿದ್ದರು. ಅಲ್ಲಿಂದ ಬೆಂಗಳೂರು ವಿಮಾನ ನಿಲ್ದಾಣಕ್ಕೆ ಬಂದು ಹುಬ್ಬಳ್ಳಿಗೆ ಪ್ರಯಾಣಿಸುತ್ತಿದ್ದರು. ಅಮೆರಿಕಕ್ಕೆ ಪ್ರಯಾಣಿಸುವ ಸಂದರ್ಭದಲ್ಲಿ ಬೀಜಿಂಗ್ ಮೂಲಕ ಹೋಗುತ್ತಿದ್ದರು. ಆದರೆ, ಈ ಬೇರೆ ಊರುಗಳಿಗೆ ಪ್ರಯಾಣಿಸದಂತೆ ಇಲ್ಲಿನ ಶಿಬಿರಗಳ ನಿವಾಸಿಗಳಿಗೆ ಬೌದ್ಧ ಮುಖಂಡರು ಸೂಚಿಸಿದ್ದಾರೆ. ಅಲ್ಲದೇ ಹೆಚ್ಚಿನ ಟಿಬೆಟನ್‌ರು ಮುಖಗವಸು ಧರಿಸುತ್ತಿದ್ದಾರೆ.

ಕೊರೊನಾ ವೈರಾಣು ಟಿಬೆಟ್‌ಗೂ ವ್ಯಾಪಿಸದಂತೆ ಶಿಬಿರದಲ್ಲಿರುವ ಬಿಕ್ಕುಗಳು ನಿತ್ಯವೂ ಪೂಜೆಯಲ್ಲಿ ತೊಡಗಿದ್ದಾರೆ. ಇನ್ನೊಂದೆಡೆ ರೋಗನಿರೋಧಕ ಶಕ್ತಿ ಹೆಚ್ಚಿಸಬಲ್ಲದು ಎನ್ನಲಾಗಿರುವ ಕಪ್ಪುಗೋಲಿಯ (ಟಿಬೆಟನ್ ಔಷಧಿ) ವಾಸನೆಯನ್ನು ದಿನಕ್ಕೆ 4–6 ಬಾರಿ ಸ್ರವಿಸುತ್ತಿದ್ದಾರೆ. ಜೊತೆಗೇ ಟಿಬೆಟನ್‌ ವೈದ್ಯರು ಕೊರೊನಾ ಬಗ್ಗೆ ಅರಿವು ಮೂಡಿಸುತ್ತಿದ್ದಾರೆ.

‘ಕೊರೊನಾ ವೈರಸ್ ಬಗ್ಗೆ ಪ್ರತಿ ಟಿಬೆಟನ್‌ರಿಗೂ ತಿಳಿವಳಿಕೆ ನೀಡಲು, ಟಿಬೆಟ್‌ ಹಾಗೂ ಇಂಗ್ಲಿಷ್ ಭಾಷೆಯಲ್ಲಿ ಮುದ್ರಿತ ಭಿತ್ತಿಪತ್ರಗಳನ್ನು ಹಂಚಲಾಗುತ್ತಿದೆ. ಕೈ, ಬಾಯಿ ಸ್ವಚ್ಛ ಇಟ್ಟುಕೊಳ್ಳುವಂತೆ, ಮುಖಗವಸು ಧರಿಸಿಯೇ ಕೆಲಸ ಮಾಡುವಂತೆ ಸೂಚಿಸಲಾಗಿದೆ. 360 ಮಾಸ್ಕ್‌ಗಳನ್ನು ಉಚಿತವಾಗಿ ನೀಡಲಾಗಿದೆ’ ಎನ್ನುತ್ತಾರೆ ಟಿಬೆಟನ್‌ ಡಿ.ಟಿ.ಆರ್ ಆಸ್ಪತ್ರೆಯ ಆಡಳಿತಾಧಿಕಾರಿ ನವಾಂಗ್ ತುಪ್ಟೆನ್.

‘ಗೋಮಾಂಗ್ ಬೌದ್ಧಮಂದಿರಕ್ಕೆ ನಾಲ್ವರು ಮಂಗೋಲಿಯಾ ಹಾಗೂ ಒಬ್ಬರು ರಷ್ಯಾ ದೇಶದಿಂದ ಬಂದು ಹೋಗಿದ್ದರ ಮಾಹಿತಿ ಸಿಕ್ಕಿದೆ. ಉಳಿದ ಮೂರು ಬೌದ್ಧ ಮಂದಿರಗಳ ಮಾಹಿತಿ ಬರಬೇಕಾಗಿದೆ. ಆಸ್ಪತ್ರೆಗೆ ಬರುವ ರೋಗಿಯನ್ನು ಮುಖಗವಸು ಹಾಕಿಯೇ ತಪಾಸಣೆ ಮಾಡಲಾಗುತ್ತಿದೆ’ ಎಂದರು.

ವೈರಾಣು ಕುರಿತು ಸಭೆ: ‘ತಾಲ್ಲೂಕು ಆರೋಗ್ಯ ಇಲಾಖೆ ಹಾಗೂ ಡಿ.ಟಿ.ಆರ್ ಆಸ್ಪತ್ರೆಯ ಸಹಯೋಗದಲ್ಲಿ ಇಲ್ಲಿನ ಕಮ್ಯುನಿಟಿ ಹಾಲ್‌ನಲ್ಲಿ, ಕೊರೊನಾ ವೈರಾಣು ಕುರಿತು ಸೋಮವಾರ ಸಭೆ ನಡೆಸಲಾಗಿದೆ. 10 ಕ್ಯಾಂಪ್‌ಗಳ ಒಂಬತ್ತು ಬೌದ್ಧ ಮಂದಿರಗಳ ಮುಖಂಡರು, ಟಿಬೆಟನ್ ಯುವ ಮೋರ್ಚಾ ಹಾಗೂ ಮಹಿಳಾ ಮೋರ್ಚಾದ ಪದಾಧಿಕಾರಿಗಳು, ಶಿಕ್ಷಕ, ಪಾಲಕ ಸಂಘದ ಪದಾಧಿಕಾರಿಗಳು ಸೇರಿದಂತೆ ಹಲವರು ಭಾಗಿಯಾಗಿದ್ದರು’ ಎಂದು ಸ್ಥಳೀಯ ಕೇಂದ್ರೀಯ ಟಿಬೆಟನ್ ಆಡಳಿತದ ಅಧ್ಯಕ್ಷ ಲಾಖ್ಪಾ ಸಿರಿಂಗ್ ಹೇಳಿದರು.

‘ಚೀನಾ ಸೇರಿದಂತೆ ಬೇರೆ ಯಾವುದೇ ದೇಶ ಹಾಗೂ ರಾಜ್ಯಗಳಿಂದ ಬಂದು ಹೋದವರ ಮಾಹಿತಿ ನೀಡಲು ಬೌದ್ಧ ಮಂದಿರಗಳ ಮುಖಂಡರಿಗೆ ಸೂಚಿಸಲಾಗಿದೆ. ವೈರಾಣು ಕಂಡುಬಂದಿರುವ ಪ್ರದೇಶಗಳಿಗೆ ಪ್ರಯಾಣಿಸದಂತೆ ಸೂಚಿಸಲಾಗಿದೆ’ ಎಂದರು.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಪ್ರತಿಕ್ರಿಯಿಸಿ (+)

ಈ ವಿಭಾಗದಿಂದ ಇನ್ನಷ್ಟು