ಮದುವಣಗಿತ್ತಿಯಂತೆ ಸಿಂಗಾರಗೊಂಡಿದ್ದ ನಿರಾಶ್ರಿತರ ನೆಲೆಯಲ್ಲಿ ಉತ್ಸಾಹ ಚಿಮ್ಮುತ್ತಿತ್ತು. ಬೆಳಿಗ್ಗೆಯಿಂದ ರಸ್ತೆಯ ಇಕ್ಕೆಲಗಳಲ್ಲಿ ಗುಂಪು ಗುಂಪಾಗಿ ಕುಳಿತಿದ್ದ ಬಿಕ್ಕುಗಳ ಮೊಗದಲ್ಲಿ ಮಂದಹಾಸ ಮೂಡಿತ್ತು. ಪಟ್ಟಣದ ಅಮ್ಮಾಜಿ ಕೆರೆಯಿಂದ ಲಾಮಾ ಕ್ಯಾಂಪ್ ನಂ.6ರವರೆಗೆ ನಿಂತಿದ್ದ, ಹಳದಿ, ಕಡುಗೆಂಪು ಬಣ್ಣದ ನಿಲುವಂಗಿಯ ಬಿಕ್ಷು, ಬಿಕ್ಷುಣಿಯರಲ್ಲಿ ಗುರುವಿಗಾಗಿ ಕಾಯುವ ಕುತೂಹಲ ಮನೆ ಮಾಡಿತ್ತು. ಟಿಬೆಟನ್ ಸಂಪ್ರದಾಯದಂತೆ ವೇಷಭೂಷಣ ತೊಟ್ಟಿದ್ದ ಮಹಿಳೆಯರು, ಪುರುಷರು ಹಾಗೂ ಪಾಶ್ಚಿಮಾತ್ಯ ಉಡುಗೆ ಧರಿಸಿದ್ದ ಯುವಸಮೂಹ ಬೌದ್ಧ ಗುರುವಿನ ಸ್ವಾಗತಕ್ಕಾಗಿ ಸರದಿಯಲ್ಲಿ ನಿಂತಿದ್ದರು.