61 ದಿನ ಯಾಂತ್ರೀಕೃತ ಮೀನುಗಾರಿಕೆ ನಿಷೇಧ; ನಾಡದೋಣಿಗೆ ಉತ್ತಮ ಶಿಕಾರಿಯ ನಿರೀಕ್ಷೆ

ಮಂಗಳವಾರ, ಜೂನ್ 18, 2019
25 °C
ವಿಳಂಬವಾದ ಮುಂಗಾರು ಮಳೆ

61 ದಿನ ಯಾಂತ್ರೀಕೃತ ಮೀನುಗಾರಿಕೆ ನಿಷೇಧ; ನಾಡದೋಣಿಗೆ ಉತ್ತಮ ಶಿಕಾರಿಯ ನಿರೀಕ್ಷೆ

Published:
Updated:
Prajavani

ಕಾರವಾರ: ಪ್ರತಿ ವರ್ಷದಂತೆ ಈ ಬಾರಿಯೂ ಜೂನ್ 1ರಿಂದ ಯಾಂತ್ರೀಕೃತ ಮೀನುಗಾರಿಕೆಗೆ ಸರ್ಕಾರ ನಿಷೇಧ ಹೇರಿದೆ. ಜುಲೈ 31ರವರೆಗೆ ಒಟ್ಟು 61 ದಿನ ಸಾಂಪ್ರದಾಯಿಕ ದೋಣಿಗಳು ಮಾತ್ರ ಕಡಲಿಗೆ ಇಳಿಯಲು ಅವಕಾಶವಿದೆ. ಈ ಬಾರಿ ಮುಂಗಾರು ಮಾರುತಗಳು ವಿಳಂಬವಾಗಿರುವ ಕಾರಣ ಉತ್ತಮ ಶಿಕಾರಿಯ ನಿರೀಕ್ಷೆ ಮೀನುಗಾರರದ್ದಾಗಿದೆ. 

ಸಮುದ್ರದಲ್ಲಿ ಪ್ರಕ್ಷುಬ್ಧ ವಾತಾವರಣ ಇಲ್ಲದ್ದಿದ್ದರೆ ನಾಡದೋಣಿಗಳು ಮೀನುಗಾರಿಕೆಗೆ ಹೋಗಲು ಸುಲಭವಾಗುತ್ತದೆ. ಅಲೆಗಳ ಬಲವಾದ ಹೊಡೆತ ಇಲ್ಲದಿರುವ ಕಾರಣ ಮೀನುಗಾರರು ಆತಂಕ ರಹಿತರಾಗಿ ಕೆಲಸ ಮಾಡಬಹುದು. ಯಾಂತ್ರೀಕೃತ ಮೀನುಗಾರಿಕೆಗೆ ನಿಷೇಧವಿರುವ ಕಾರಣ ತಮ್ಮ ಬಲೆಗೆ ಹೆಚ್ಚು ಮೀನುಗಳು ಬೀಳುತ್ತವೆ ಎನ್ನುವುದು ಸಾಂಪ್ರದಾಯಿಕ ಮೀನುಗಾರರ ಅನುಭವವಾಗಿದೆ.

‘ನಾಡದೋಣಿ ಮೀನುಗಾರಿಕೆಗೆ ವರ್ಷದ 12 ತಿಂಗಳೂ ಅವಕಾಶವಿದೆ. ಜೂನ್ ಮತ್ತು ಜುಲೈ ಎರಡು ತಿಂಗಳಲ್ಲಿ ನಾಡದೋಣಿಯವರಿಗೆ ಏನಾದರೂ ಸಂಪಾದನೆ ಆಗಬೇಕು. ನಂತರ ಯಾಂತ್ರೀಕೃತ ದೋಣಿಗಳು ಸಮುದ್ರಕ್ಕಿಳಿದರೆ ಏನೂ ಸಿಗುವುದಿಲ್ಲ. ಅವೈಜ್ಞಾನಿಕ ಮೀನುಗಾರಿಕೆಯ ವಿರುದ್ಧ ಹೋರಾಟ ಮಾಡಿದ್ದರ ಫಲವಾಗಿ ನಾಡದೋಣಿ ಮೀನುಗಾರರ ಅರ್ಧ ಶ್ವಾಸ ಉಳಿದುಕೊಂಡಿದೆ’ ಎನ್ನುತ್ತಾರೆ ಜಿಲ್ಲಾ ನಾಡದೋಣಿ ಮತ್ತು ಸಾಂಪ್ರದಾಯಿಕ ಮೀನುಗಾರರ ಒಕ್ಕೂಟದ ಅಧ್ಯಕ್ಷ ಸದಾನಂದ ಹರಿಕಂತ್ರ.

‘ಜೂನ್ ಮತ್ತು ಜುಲೈ ತಿಂಗಳಲ್ಲಿ ಚಂಡಮಾರುತ ಬೀಸಿದರೆ ಸಮುದ್ರಕ್ಕೆ ಹೋಗುವಂತೆಯೇ ಇಲ್ಲ. ಪ್ರಕ್ಷುಬ್ಧ ಸಮುದ್ರ ಅಲ್ಲಲ್ಲಿ ಶಾಂತತೆ ಕಾಯ್ದುಕೊಂಡರೆ ಮೀನುಗಾರಿಕೆ ಅನುಕೂಲವಾಗುತ್ತದೆ. ಆಗ ನಾವು ಒಂದಷ್ಟು ಆದಾಯ ಗಳಿಸಲು ಅವಕಾಶವಾಗುತ್ತದೆ. ಇದಕ್ಕೆ ಸಮುದ್ರ ಸರಿಯಾಗಿ ಅವಕಾಶ ಕೊಡಬೇಕು’ ಎನ್ನುತ್ತಾರೆ ಅವರು.

‘ಈ ಬಾರಿ ಮಳೆ ತಡವಾಗಿರುವ ಕಾರಣ ನಾಡದೋಣಿ ಮೀನುಗಾರಿಕೆಗೆ ಪ್ರಯೋಜನವಾಗಬಹುದು ಎಂಬ ಲೆಕ್ಕಾಚಾರವೂ ಇದೆ. ಮೊದಲೆಲ್ಲೆ ಮೇ 15ರ ನಂತರ ಸಮುದ್ರದಲ್ಲಿ ದೊಡ್ಡ ಅಲೆಗಳು, ರಭಸದ ಗಾಳಿ ಬೀಸುತ್ತಿತ್ತು. ಆದರೆ, ಈ ವರ್ಷ ಇನ್ನೂ ಮುಂಗಾರಿನ ಮುನ್ಸೂಚನೆಯೇ ಇಲ್ಲ. ಮಳೆಗಾಲ ಆರಂಭವಾಗಲು ಇನ್ನೂ 15 ದಿನಗಳು ಬೇಕಾಗಬಹುದು. ಚಂಡಮಾರುತ ಬಂದರೆ ಸಮುದ್ರದಲ್ಲಿ ಹೊಸದಾದ ವಾತಾವರಣ ಉಂಟಾಗುತ್ತದೆ. ಆಗ ಎಲ್ಲ ರೀತಿಯ ಮೀನುಗಾರರಿಗೂ ಅನುಕೂಲವಾಗುತ್ತದೆ’ ಎಂದು ಅವರು ಹೇಳುತ್ತಾರೆ.

‌ಜಿಲ್ಲೆಯಲ್ಲಿ ಅಂದಾಜು 1.03 ಲಕ್ಷ ಮೀನುಗಾರರಿದ್ದಾರೆ. ಅವರ ಪೈಕಿ 70 ಸಾವಿರ ಮಂದಿ ಈ ಉದ್ಯೋಗದಲ್ಲಿ ಸಕ್ರಿಯರಾಗಿದ್ದಾರೆ. ಈವರೆಗೆ 1,560 ನಾಡದೋಣಿಗಳಿಗೆ ಮೀನುಗಾರಿಕಾ ಇಲಾಖೆಯಿಂದ ಪರವಾನಗಿ ಪಡೆದುಕೊಂಡಿವೆ. ಈ ಸಂಖ್ಯೆ ಪ್ರತಿವರ್ಷ 50ರಿಂದ 100ರಷ್ಟು ಹೆಚ್ಚುತ್ತಿದೆ ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.

ಕಾರವಾರದಲ್ಲಿ ಸಭೆ: ಮೀನುಗಾರಿಕೆ ನಿಷೇಧ ಜಾರಿ, ಮುಂಗಾರು ಪೂರ್ವ ಸಿದ್ಧತೆ ಹಾಗೂ ಸಾಂಪ್ರದಾಯಿಕ ಮೀನುಗಾರಿಕೆ ಕುರಿತು ಚರ್ಚಿಸಲು ಕಾರವಾರದ ಮೀನುಗಾರಿಕಾ ಇಲಾಖೆ ಕಚೇರಿಯಲ್ಲಿ ಜೂನ್ 3ರಂದು ಮಧ್ಯಾಹ್ನ 2.30ಕ್ಕೆ ಸಭೆ ಕರೆಯಲಾಗಿದೆ.  

9.9 ಎಚ್‌.ಪಿ.ಗಿಂತ ಕಡಿಮೆ ಸಾಮರ್ಥ್ಯದ ಔಟ್‌ಬೋರ್ಡ್ ಎಂಜಿನ್ ಇರುವ ದೋಣಿಗಳ ಬಳಕೆ, ಕಡ್ಡಾಯವಾಗಿ ಲೈಫ್ ಜಾಕೆಟ್ ಮತ್ತು ಪೈಫ್ ಬಾಯ್‌ಗಳನ್ನು ಹೊಂದಿರುವುದು, ಐದು ನಾಟಿಕಲ್ ಮೈಲು ಪ್ರದೇಶದಲ್ಲಿ ಮಾತ್ರ ಮೀನುಗಾರಿಕೆ ಮಾಡುವುದು, ಹವಾಮಾನ ವರದಿ ಆಧರಿಸಿ ಸಮುದ್ರಕ್ಕೆ ತೆರಳುವುದು ಮುಂತಾದ ವಿಚಾರಗಳ ಕುರಿತು ಅಂದು ಚರ್ಚಿಸಲಾಗುವುದು ಎಂದು ಇಲಾಖೆಯ ಉಪ ನಿರ್ದೇಶಕ ಪಿ.ನಾಗರಾಜ ತಿಳಿಸಿದ್ದಾರೆ.

ವಿರಾಟ್ ಕೊಹ್ಲಿ ನಾಯಕತ್ವದ ಭಾರತ ಕ್ರಿಕೆಟ್‌ ತಂಡ ಕಪ್ ಗೆಲ್ಲುತ್ತಾ? ಐಸಿಸಿ ವಿಶ್ವಕಪ್ 2019 ಯಾರು ಗೆಲ್ಲುತ್ತಾರೆ? ಕೋಟ್ಯಂತರ ಕ್ರಿಕೆಟ್ ಪ್ರೇಮಿಗಳ ನಿರೀಕ್ಷೆಗೆ ಉತ್ತರ ಸಿಗುವ ಕಾಲ ಬಂದಿದೆ. ವಿಶ್ವಕಪ್ ಕ್ರಿಕೆಟ್‌ನ ಸ್ಕೋರ್ ಅಪ್‌ಡೇಟ್ಸ್‌, ಮ್ಯಾಚ್‌ಗಳ ವರದಿ, ವಿಶ್ವಕಪ್ ಕ್ರಿಕೆಟ್ ಹೆಜ್ಜೆ ಗುರುತು, ಆಟಗಾರರ ಸಂದರ್ಶನ, ವೇಳಾಪಟ್ಟಿ ತಿಳಿದುಕೊಳ್ಳಲು www.prajavani.net ಜಾಲತಾಣಕ್ಕೆ ಭೇಟಿ ನೀಡಿ. ಕ್ರೀಡಾಪ್ರೇಮಿಗಳ ನೆಚ್ಚಿನ ಆಯ್ಕೆ ‘ಪ್ರಜಾವಾಣಿ’. ಇದು ಅತ್ಯಂತ ವಿಶ್ವಾಸಾರ್ಹ ಸುದ್ದಿ ಮಾಧ್ಯಮ.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !