ಬಿರುಗಾಳಿ: ಮೀನುಗಾರಿಕೆ ತಾತ್ಕಾಲಿಕ ಸ್ಥಗಿತ

7
ಮೀನುಗಾರರನ್ನು ಬೆದರಿಸಿದ ರಭಸದ ಗಾಳಿ, ಆಳೆತ್ತರ ಅಲೆಗಳು: ಬಂದರಿನಲ್ಲಿ ದೋಣಿಗಳ ಲಂಗರು

ಬಿರುಗಾಳಿ: ಮೀನುಗಾರಿಕೆ ತಾತ್ಕಾಲಿಕ ಸ್ಥಗಿತ

Published:
Updated:
Deccan Herald

ಕಾರವಾರ:  ಎರಡು ದಿನಗಳಿಂದ ಸುರಿಯುತ್ತಿರುವ ಮಳೆ ಮತ್ತು ರಭಸದ ಗಾಳಿ, ಜಿಲ್ಲೆಯ ವ್ಯಾಪ್ತಿಯಲ್ಲಿ ಮೀನುಗಾರಿಕೆ ಮೇಲೆ ಪರಿಣಾಮ ಬೀರಿದೆ. ಮುಂಗಾರಿನಲ್ಲಿ ಸದಾ ಮೀನುಗಾರಿಕೆ ದೋಣಿಗಳ ಸಂಚಾರವಿರುವ ಇಲ್ಲಿನ ಬೈತಖೋಲ್ ಬಂದರಿನಲ್ಲಿ ನೂರಾರು ದೋಣಿಗಳು ಲಂಗರು ಹಾಕಿವೆ.

ಸಮುದ್ರದಲ್ಲಿ ವಾಯವ್ಯ ದಿಕ್ಕಿನಿಂದ ವೇಗವಾದ ಗಾಳಿ ಬೀಸುತ್ತಿರುವ ಕಾರಣ ಸಮುದ್ರದಲ್ಲಿ 10ರಿಂದ 15 ಅಡಿಗಳಷ್ಟು ಎತ್ತರದ ಅಲೆಗಳು ಏಳುತ್ತಿವೆ. ಇದರಲ್ಲಿ ದೋಣಿಗಳನ್ನು ಮುನ್ನಡೆಸುವುದು ಕಷ್ಟ ಮತ್ತು ಅಪಾಯಕಾರಿ ಆಗಿರುವ ಕಾರಣ ಮೀನುಗಾರರು ದಡ ಸೇರಿದ್ದಾರೆ.

ಜೂನ್ ಮತ್ತು ಜುಲೈ ತಿಂಗಳಿನಲ್ಲಿ ಮೀನುಗಾರಿಕೆ ನಿಷೇಧದ ಅವಧಿ ಮುಗಿಸಿ ಇದೇ ಒಂದರಂದು ಯಾಂತ್ರೀಕೃತ ದೋಣಿಗಳು ಸಮುದ್ರಕ್ಕೆ ಇಳಿದಿದ್ದವು. ಆರಂಭದಲ್ಲೇ ಉತ್ತಮ ಫಸಲು ಸಿಕ್ಕಿದ್ದರಿಂದ ಮೀನುಗಾರರು ಈ ಬಾರಿ ಹೆಚ್ಚಿನ ಆದಾಯ ನಿರೀಕ್ಷಿಸಿದ್ದರು. ಆದರೆ, ಈಗ ಮತ್ತೆ ಹವಾಮಾನ ವೈಪರೀತ್ಯ ಆಗಿರುವ ಕಾರಣ ಮತ್ಸ್ಯಬೇಟೆ ತಾತ್ಕಾಲಿಕವಾಗಿ ಸ್ಥಗಿತಗೊಂಡಿದೆ. ಇದರಿಂದ ಮೀನುಗಾರರು ನಷ್ಟಕ್ಕೆ ಒಳಗಾಗುವಂತಾಗಿದೆ ಎನ್ನುತ್ತಾರೆ ಮೀನುಗಾರರ ಮುಖಂಡ ವಿನಾಯಕ ಹರಿಕಂತ್ರ.

‘ಮೀನುಗಾರಿಕೆ ಆರಂಭವಾಗಿ ಕೇವಲ ನಾಲ್ಕೇ ದಿನ ಕೆಲಸ ಮಾಡಲು ಸಾಧ್ಯವಾಗಿದೆ. ಐದನೇ ತಾರೀಕಿಗೆ ಸಮುದ್ರದಲ್ಲಿ ಬಿರುಗಾಳಿ ಬೀಸಿದ್ದರಿಂದ ವಾಪಸ್ ಬಂದೆವು. ಈಗ ಮೀನುಗಾರಿಕೆ ಸ್ಥಗಿತವಾಗಿ ಒಂದು ವಾರವಾಯ್ತು. ಉತ್ತಮ ಬೇಟೆಯ ಅವಧಿಯಲ್ಲೇ ಹೀಗಾಗಿರುವುದು ಇದೇ ವೃತ್ತಿಯನ್ನು ನಂಬಿಕೊಂಡವರಿಗೆ ಸಮಸ್ಯೆ ತಂದಿಟ್ಟಿದೆ’ ಎನ್ನುತ್ತಾರೆ ಅವರು.

‘ಒಡಿಶಾ, ಆಂಧ್ರಪ್ರದೇಶದ ಕೆಲಸಗಾರರು ಹೆಚ್ಚಿನ ಸಂಖ್ಯೆಯಲ್ಲಿದ್ದಾರೆ. ಅವರ ಊಟ, ತಿಂಡಿ, ವೇತನದ ಸಲುವಾಗಿ ಪರ್ಸೀನ್ ದೋಣಿಯ ಮಾಲೀಕರು ದಿನವೊಂದಕ್ಕೆ ಕನಿಷ್ಠ ₹ 5 ಸಾವಿರ ಖರ್ಚು ಮಾಡಲೇಬೇಕಿದೆ. ಮೀನುಗಾರಿಕೆ ನಿಂತಿದೆ ಎಂದು ಅವರನ್ನು ನಾವು ಬಿಟ್ಟರೆ ಮತ್ತೆ ಸಿಗುವುದಿಲ್ಲ. ಅವರಿಗೆ ಬೇಡಿಕೆ ಹೆಚ್ಚಿರುವ ಕಾರಣ ನಷ್ಟವಾದರೂ ಸರಿ, ಅನಿವಾರ್ಯವಾಗಿ ಹಣ ವ್ಯಯಿಸಲೇಬೇಕಿದೆ’ ಎಂದು ಸಮಸ್ಯೆಯನ್ನು ವಿವರಿಸುತ್ತಾರೆ.

ಆಶ್ರಯತಾಣ: ಕಾರವಾರದಲ್ಲಿ ನೈಸರ್ಗಿಕ ಮತ್ತು ಸರ್ವಋತು ಬಂದರು ಇರುವ ಕಾರಣ ಗೋವಾ, ಕೇರಳ, ಮಂಗಳೂರು ಭಾಗದ ಮೀನುಗಾರರು ಇಲ್ಲಿ ಆಶ್ರಯ ಪಡೆಯುತ್ತಾರೆ. ಹೀಗಾಗಿ ಪ್ರತಿಬಾರಿ ಹವಾಮಾನ ವೈಪರೀತ್ಯ ಉಂಟಾದಾಗಲೂ ಇಲ್ಲಿ ನೂರಾರು ಮೀನುಗಾರಿಕಾ ದೋಣಿಗಳು ಕಾಣಸಿಗುತ್ತವೆ.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !