ಮಳೆಯಲ್ಲೇ ಗ್ಯಾಸ್ ಕಿಟ್ ವಿತರಣೆ

ನಗರದ ಸೋನಿ ಗ್ಯಾಸ್ ಏಜೆನ್ಸೀಸ್ ಸಹಯೋಗದಲ್ಲಿ ಈ ಕಾರ್ಯಕ್ರಮವನ್ನು ಆಯೋಜನೆ ಮಾಡಲಾಗಿತ್ತು. 80 ಮಂದಿ ಫಲಾನುಭವಿಗಳನ್ನು ಈ ಯೋಜನೆಯಡಿ ಆಯ್ಕೆ ಮಾಡಲಾಗಿತ್ತು. ಉದ್ಘಾಟಕರು ಹಾಗೂ ಕಿಟ್ ವಿತರಕರಾಗಿ ಕೇಂದ್ರ ಕೌಶಲಾಭಿವೃದ್ಧಿ ಹಾಗೂ ಉದ್ಯಮಶೀಲತೆ ರಾಜ್ಯ ಖಾತೆ ಸಚಿವ ಅನಂತಕುಮಾರ ಹೆಗಡೆ ಭಾಗವಹಿಸಿದ್ದರ.

ಕಾರ್ಯಕ್ರಮಕ್ಕೆ ಅವರು ಬರುತ್ತಿದ್ದಂತೆ ಮಳೆ ಸುರಿಯಲಾರಂಭಿಸಿತು. ಇದರಿಂದಾಗಿ ಕುಳಿತಿದ್ದ ಜನರು ಚೆಲ್ಲಾಪಿಲ್ಲಿಯಾದರು. ಹೀಗಾಗಿ, ‘ಪ್ರಾರ್ಥನೆ, ಭಾಷಣಗಳು ಬೇಡ. ಫಲಾನುಭವಿಗಳಿಗೆ ಕಿಟ್ ವಿತರಣೆ ಮಾಡಿ ಬಿಡೋಣ’ ಎಂದು ಸಚಿವರು ಆಯೋಜಕರಿಗೆ ತಿಳಿಸಿದರು. ಅದರಂತೆ, ದೀಪ ಬೆಳಗಿ ಕಾರ್ಯಕ್ರಮ ಉದ್ಘಾಟಿಸಿ ಸುಮಾರು 10 ಮಂದಿ ಫಲಾನುಭವಿಗಳಿಗೆ ಸಾಂಕೇತಿಕವಾಗಿ ಕಿಟ್ ವಿತರಣೆ ಮಾಡಿದರು. ಮಳೆ ಹೆಚ್ಚಾಗಿದ್ದರಿಂದ ಕಾರ್ಯಕ್ರಮವನ್ನು ಅರ್ಧಕ್ಕೆ ಮೊಟಕುಗೊಳಿಸಿ ಅಲ್ಲಿಂದ ತೆರಳಿದರು.

ಎಳೆದಾಟ: ‘ನಮಗೂ ಗ್ಯಾಸ್ ಕೊಡಿ’ ಎಂದು ಮದ್ಯ ಸೇವನೆ ಮಾಡಿದ್ದ ವ್ಯಕ್ತಿಯೊಬ್ಬ ಸಚಿವರು ಹೊರಡುವ ವೇಳೆ ಶಾಸಕಿ ರೂಪಾಲಿ ನಾಯ್ಕ ಅವರನ್ನು ಒತ್ತಾಯಿಸುತ್ತಿದ್ದ. ಆತನನ್ನು ಪಕ್ಷದ ಕಾರ್ಯಕರ್ತರು ಪಕ್ಕಕ್ಕೆ ಎಳೆದುಕೊಳ್ಳುತ್ತಿದ್ದಾಗ ಅಲ್ಲೇ ಸಮೀಪ ಇದ್ದ ವೃದ್ಧರೊಬ್ಬರು ಕೆಳಕ್ಕೆ ಬಿದ್ದರು. ಮದ್ಯ ಸೇವನೆ ಮಾಡಿದಾತನಿಗೆ ಜನರು ಹಾಗೂ ಕಾರ್ಯಕರ್ತರು ಬೈದು, ವೃದ್ಧರಿಗೆ ಕೂರಲು ಕುರ್ಚಿ ಕೊಟ್ಟು ಉಪಚರಿಸಿದರು. ಜನರಿಗೆ ಮಳೆಯಲ್ಲೇ ಚಹಾ ಹಾಗೂ ತಿಂಡಿಯನ್ನು ವಿತರಣೆ ಮಾಡಲಾಯಿತು.

ಬೇಕಾಬಿಟ್ಟಿ ಆಯೋಜನೆ?: ಕಾರ್ಯಕ್ರಮಕ್ಕೆ ಮೈಕ್ ಹಾಗೂ ಜನರೇಟರ್ ಅಳವಡಿಸಿರಲಿಲ್ಲ. ಶಾಮಿಯಾನವನ್ನು ಹಾಕಿ ಎರಡು ಕೂಲರ್‌ಗಳನ್ನು ಇಡಲಾಗಿತ್ತು.

ಒಂದೆಡೆ ಮಳೆ ಸುರಿಯುತ್ತಿದ್ದರಿಂದ ಫಲಾನುಭವಿಗಳ ಹೆಸರನ್ನು ಕೂಗಿದರೂ ಕೇಳುತ್ತಿರಲಿಲ್ಲ. ಹೀಗಾಗಿ ಸಿಡಿಮಿಡಿಗೊಂಡ ಸಚಿವ ಅನಂತಕುಮಾರ್ ಹೆಗಡೆ, ‘ಕಾರ್ಯಕ್ರಮವನ್ನು ಬೇಕಾಬಿಟ್ಟಿ ಆಯೋಜನೆ ಮಾಡಿದ್ದೀರಾ? ಮೈಕ್ ಹಾಗೂ ಜನರೇಟರ್ ಅಳವಡಿಸಬೇಕು ಎನ್ನುವುದು ಗೊತ್ತಿಲ್ಲವೇ?’ ಎಂದು ಅಸಮಾಧಾನ ವ್ಯಕ್ತಪಡಿಸಿದರು.

‘ಶಾಮಿಯಾನದವರಿಗೆ ಹೇಳಿದ್ದೆವು. ಆದರೆ, ಅವರು ತಂದಿಲ್ಲ’ ಎಂದು ಆಯೋಜಕರು ಸ್ಪಷ್ಟನೆ ನೀಡಿದರು. ಕಾರ್ಯಕ್ರಮ ಮುಗಿದು ಸಚಿವರು ಹೊರಟ ಬಳಿಕ ಶಾಮಿಯಾನದವರು ಮೈಕ್ ಹಾಗೂ ಜನರೇಟರ್ ಅನ್ನು ತಂದಿದ್ದರು.