ವಿಶ್ವ ಸಾಕ್ಷರತಾ ದಿನಾಚರಣೆ: ಅಕ್ಷರದ ಬೆಳಕಿನತ್ತ ಹೊರಳುತ್ತಿದೆ ಜಿಲ್ಲೆ

7
ಸ್ಥಿರವಾಗಿ ಹೆಚ್ಚುತ್ತಿರುವ ಅಕ್ಷರಸ್ಥರ ಸಂಖ್ಯೆ

ವಿಶ್ವ ಸಾಕ್ಷರತಾ ದಿನಾಚರಣೆ: ಅಕ್ಷರದ ಬೆಳಕಿನತ್ತ ಹೊರಳುತ್ತಿದೆ ಜಿಲ್ಲೆ

Published:
Updated:

ಕಾರವಾರ: ಉತ್ತರ ಕನ್ನಡವು ವಿದ್ಯಾವಂತರೇ ಹೆಚ್ಚಿರುವ ಜಿಲ್ಲೆ ಎಂದೇ ಪ್ರಸಿದ್ಧ. ಅಕ್ಷರಾಭ್ಯಾಸಕ್ಕೆ ಬಾಲ್ಯದಿಂದಲೂ ನೀಡುತ್ತಿರುವ ಪ್ರಾಮುಖ್ಯತೆಯಿಂದಾಗಿ ಈ ಜಿಲ್ಲೆಯಲ್ಲಿ ಅನಕ್ಷರಸ್ಥರ ಸಂಖ್ಯೆ ಕಡಿಮೆಯಾಗಿದೆ. ಜಿಲ್ಲೆಯಲ್ಲಿ ಪ್ರಸ್ತುತ ಶೇ 84ರಷ್ಟು ಮಂದಿ ಅಕ್ಷರಸ್ಥರಿದ್ದಾರೆ.

ಜಿಲ್ಲೆಯಲ್ಲಿ 2011ರ ಜನಸಂಖ್ಯಾ ಗಣತಿಯ ಪ್ರಕಾರ ಪುರುಷರ ಸಾಕ್ಷರತಾ ಪ್ರಮಾಣವು ಮಹಿಳೆಯರಿಗಿಂತ ಅಧಿಕವಾಗಿದೆ. ಶೇ 89.63ರಷ್ಟು ಪುರುಷರು ಅಕ್ಷರ ಜ್ಞಾನ ಹೊಂದಿದ್ದರೆ, ಕೇವಲ ಶೇ 78.39ರಷ್ಟು ಮಹಿಳೆಯರು ಓದು– ಬರಹ ಬಲ್ಲವರಾಗಿದ್ದಾರೆ. 2001ರಲ್ಲಿ ಜಿಲ್ಲೆಯಲ್ಲಿ ಒಟ್ಟು ಶೇ 76.60ರಷ್ಟು ಮಂದಿ ಸಾಕ್ಷರರಿದ್ದರು.

ಈ ಅವಧಿಯಲ್ಲಿ ಸಾಕ್ಷರತಾ ಪ್ರಮಾಣ ಶೇ 8ರಷ್ಟು ಮಾತ್ರ ಏರಿಕೆ ಕಂಡಿದೆ. ಇದರಿಂದ ಎಚ್ಚೆತ್ತುಕೊಂಡ ಜಿಲ್ಲಾಡಳಿತ ಮತ್ತು ಸಾರ್ವಜನಿಕ ಶಿಕ್ಷಣ ಇಲಾಖೆಯು, ಅಕ್ಷರ ಜ್ಞಾನ ಹೊಂದಿದವರ ಸಂಖ್ಯೆಯನ್ನು ಹೆಚ್ಚಿಸಲು ವಿವಿಧ ಕಾರ್ಯಕ್ರಮಗಳನ್ನು ಹಮ್ಮಿಕೊಂಡವು. 2011ರ ನಂತರದ ಏಳು ವರ್ಷಗಳ ಅವಧಿಯಲ್ಲಿ ಜಿಲ್ಲೆಯಲ್ಲಿ ಸಾಕ್ಷರರ ಪ್ರಮಾಣ ಇನ್ನೂ ಜಾಸ್ತಿಯಾಗಿದೆ ಎನ್ನವುದು ಅಧಿಕಾರಿಗಳು ಅನಿಸಿಕೆ.

‘ನಮ್ಮ ಜಿಲ್ಲೆಯಲ್ಲಿ ವಯಸ್ಕರ ಶಿಕ್ಷಣಕ್ಕೂ ಹೆಚ್ಚಿನ ಆದ್ಯತೆ ನೀಡಲಾಗುತ್ತಿದೆ. ಈ ಸಲುವಾಗಿ ಕಳೆದ ವರ್ಷ ಜಿಲ್ಲೆಯ ಎಂಟು ತಾಲ್ಲೂಕುಗಳಲ್ಲಿ 707 ಕಲಿಕಾ ಕೇಂದ್ರಗಳನ್ನು ತೆರೆಯಲಾಗಿತ್ತು’ ಎನ್ನುತ್ತಾರೆ ಜಿಲ್ಲಾ ವಯಸ್ಕರ ಶಿಕ್ಷಣಾಧಿಕಾರಿ ರಾಮಕೃಷ್ಣ ಅವರು.

‘ಡಾ.ನಂಜುಂಡಪ್ಪ ವರದಿಯ ಪ್ರಕಾರ ಜಿಲ್ಲೆಯಲ್ಲಿ ಅತ್ಯಂತ ಕಡಿಮೆ ಸಾಕ್ಷರತೆ ಪ್ರಮಾಣ ಇರುವ ತಾಲ್ಲೂಕುಗಳತ್ತ ವಿಶೇಷ ಗಮನ ಹರಿಸಲಾಗುತ್ತಿದೆ. ಅವುಗಳಲ್ಲಿ ಭಟ್ಕಳ, ಅಂಕೋಲಾ, ಸಿದ್ದಾಪುರ, ಜೊಯಿಡಾ ಕೂಡ ಒಳಗೊಂಡಿವೆ. ಅಲ್ಲಿ ಸಾಕ್ಷರತೆಯ ಬಗ್ಗೆ ಅರಿವು ಮೂಡಿಸುವ ಕಾರ್ಯಕ್ರಮಗಳನ್ನು ಆಯೋಜಿಸಲಾಗಿದೆ. ಈ ವರ್ಷವೂ ಮುಂದುವರಿಸುತ್ತೇವೆ’ ಎಂದು ಅವರು ಹೇಳುತ್ತಾರೆ.

ಜಿಲ್ಲೆಯಲ್ಲಿ ಸಾಕ್ಷರತೆಯ ಪ್ರಮಾಣವನ್ನು ಶೇ 100ಕ್ಕೇರಿಸಲು ಸಂಪೂರ್ಣ ಸಹಕಾರ ನೀಡುವುದಾಗಿ ಜಿಲ್ಲಾ ಪಂಚಾಯ್ತಿ ಮುಖ್ಯ ಕಾರ್ಯ ನಿರ್ವಹಣಾಧಿಕಾರಿ ಮೊಹಮ್ಮದ್ ರೋಶನ್ ಭರವಸೆ ನೀಡಿದ್ದಾರೆ. ಶೇ 16ರಷ್ಟು ಇರುವ ಅಂತರವನ್ನು ಭರ್ತಿ ಮಾಡಲು ಅಗತ್ಯ ಕ್ರಮಗಳ ಬಗ್ಗೆ ಚಿಂತನೆ ನಡೆಸಿ ಎಂದು ಅಧಿಕಾರಿಗಳಿಗೆ ಅವರು ಸೂಚನೆಯನ್ನೂ ನೀಡಿದ್ದಾರೆ.

ಅಂಕಿ – ಅಂಶ

ಸಾಕ್ಷರತೆಯ ಪ್ರಮಾಣ (ಶೇಕಡಾವಾರು. 2011ರ ಜನಸಂಖ್ಯಾ ಗಣತಿ ಪ್ರಕಾರ)

ತಾಲ್ಲೂಕು; ಪುರುಷರು; ಮಹಿಳೆಯರು

ಕಾರವಾರ; 94.90; 84.85

ಅಂಕೋಲಾ; 91.19; 78.69

ಕುಮಟಾ; 91.80; 81.25

ಹೊನ್ನಾವರ; 89.67; 78.75

ಭಟ್ಕಳ; 88.93; 77.82

ಶಿರಸಿ; 91.65; 84.43

ಸಿದ್ದಾಪುರ; 90.62; 79.08

ಮುಂಡಗೋಡ; 85.85; 71.91

ಹಳಿಯಾಳ; 81.06; 65.42

ಯಲ್ಲಾಪುರ; 86.70; 75.86

ಜೊಯಿಡಾ; 84.89; 67.10

 

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !