ಗೋಕರ್ಣ ಪರ್ತಗಾಳಿ ಮಠ: ವಿದ್ಯಾಧೀಶ ಶ್ರೀಪಾದ ಸ್ವಾಮೀಜಿ ಪೀಠಾರೋಹಣ

ಈ ಸಂದರ್ಭದಲ್ಲಿ ಮಾತನಾಡಿದ ಅವರು, ವೃಂದಾವನಸ್ಥರಾದ ವಿದ್ಯಾಧಿರಾಜ ಶ್ರೀಪಾದ ವಡೇರ ಸ್ವಾಮೀಜಿ ಅವರನ್ನು ಸ್ಮರಿಸಿದರು.

‘ನಮ್ಮ ಗುರುಗಳ ಜ್ಞಾನ ಪ್ರಕಾಶ ಇಲ್ಲಿದೆ. ಅವರು ಶತಾಯುಷಿಗಳಾಗಿ ಇರಬೇಕಿತ್ತು. ಅವರ ಜನಪರವಾದ ಯೋಚನೆ ಮತ್ತು ಯೋಜನೆಗಳಿಂದ ಸಮಾಜಕ್ಕೆ ನೆರವಾಗಿದೆ. ಅಂಥವರು ಗುರುವಾಗಿ ಸಿಕ್ಕಿದ್ದು ಪುಣ್ಯ. ಅವರೊಂದಿಗೆ ಏಳು ವರ್ಷ ಕಳೆದಿದ್ದೇನೆ. ವಯಸ್ಸಿನ ಭೇದವಿಲ್ಲದೇ ಪ್ರತಿ ವಿಚಾರದಲ್ಲೂ ಕಾಳಜಿ ತೋರಿದ್ದಾರೆ. ಅವರು ಕೈಗೊಂಡಿದ್ದ ಸಂಕಲ್ಪಗಳನ್ನು ಪೂರ್ಣಗೊಳಿಸಲು ಕಾರ್ಯ ನಿರ್ವಹಿಸಲಾಗುವುದು. ಅವರ ಮಾರ್ಗದಲ್ಲೇ ಮುಂದುವರಿಯಲು ಪ್ರಯತ್ನಿಸಲಾಗುವುದು’ ಎಂದು ಹೇಳಿದರು.

ಪೀಠಾರೋಹಣ ಮಾಡಿದ ಬಳಿಕ ಮಠದ ಶಾಖಾ ಮಠಗಳಿಂದ ಪಟ್ಟ ಕಾಣಿಕೆ ಸಲ್ಲಿಸಲಾಯಿತು. 23ನೇ ಪೀಠಾಧಿಪತಿಯಾಗಿದ್ದ ವಿದ್ಯಾಧಿರಾಜ ಶ್ರೀಪಾದ ವಡೇರ ಅವರು ಜುಲೈ 19ರಂದು ಹರಿಪಾದ ಸೇರಿದ್ದರು. ವಿದ್ಯಾಧೀಶ ಶ್ರೀಪಾದ ವಡೇರ ಸ್ವಾಮೀಜಿ ಅವರನ್ನು 2017ರಲ್ಲಿ ತಮ್ಮ ಶಿಷ್ಯರನ್ನಾಗಿ ಸ್ವೀಕರಿಸಿದ್ದರು.