ಶಿರಸಿ: ಇಲ್ಲಿನ ಬಿಡ್ಕಿಬೈಲ್ನ ಮಾರಿಕಾಂಬಾ ದೇವಿ ಗದ್ದುಗೆ ಪಕ್ಕದ ಮಳಿಗೆಗಳ ಹರಾಜು ಪ್ರಕ್ರಿಯೆ ಗುರುವಾರ ಆರಂಭಗೊಂಡಿದೆ. ಮೊದಲ ದಿನ 75 ಮಳಿಗೆಗಳು ಹರಾಜಾಗಿದ್ದು ದೇವಸ್ಥಾನಕ್ಕೆ ₹37.25 ಲಕ್ಷ ಆದಾಯ ಸಂಗ್ರಹವಾಯಿತು.
ಗದ್ದುಗೆ ಸಮೀಪದ ಮಳಿಗೆಯೊಂದು ಗರಿಷ್ಠ ₹1.58 ಲಕ್ಷಕ್ಕೆ ಖರೀದಿಯಾಯಿತು. ₹50 ಸಾವಿರದಿಂದ ₹1 ಲಕ್ಷದ ಮೊತ್ತದಲ್ಲಿ ಹಲವು ಮಳಿಗೆಗಳು ಹರಾಜುಗೊಂಡವು. ಒಟ್ಟೂ 232 ಮಳಿಗೆಗಳನ್ನು ದೇವಸ್ಥಾನದವರು ಹರಾಜು ಮೂಲಕ ನೀಡಲಿದ್ದಾರೆ. ಶನಿವಾರದವರೆಗೂ ಈ ಪ್ರಕ್ರಿಯೆ ನಡೆಯಲಿದೆ.
ಕೋಣನಬಿಡ್ಕಿ, ಬಿಡ್ಕಿಬೈಲ್ ಪ್ಲಾಟುಗಳ ಹರಾಜಿನಿಂದ ಈವರೆಗೆ ದೇವಸ್ಥಾನಕ್ಕೆ ಸುಮಾರು ₹98 ಲಕ್ಷ ಆದಾಯ ಸಂಗ್ರಹವಾಗಿದೆ ಎಂದು ಧರ್ಮದರ್ಶಿ ಮಂಡಳಿ ತಿಳಿಸಿದೆ.