ಬುಧವಾರ, ಫೆಬ್ರವರಿ 19, 2020
27 °C
ಹೊನ್ನಾವರ: ಕೆರೆಕೋಣದಲ್ಲಿ ನಡೆದ ‘ಸಹಯಾನ ಸಾಹಿತ್ಯೋತ್ಸವ–10’ರಲ್ಲಿ ಸಂವಾದ

‘ಪ್ರೇಕ್ಷಕರ ಅಭಿರುಚಿಗೆ ಮಾನ್ಯತೆ ಅನಿವಾರ್ಯ’

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

Prajavani

ಹೊನ್ನಾವರ: ‘ಸಿನಿಮಾದಲ್ಲಿ ಉಳಿದ ಕಲಾ ಪ್ರಕಾರಗಳಿಗಿಂತ ಪ್ರೇಕ್ಷಕರ ಅಭಿರುಚಿಗೆ ಹೆಚ್ಚಿನ ಮಾನ್ಯತೆ ಕೊಡುವ ಅನಿವಾರ್ಯತೆ ಇದೆ’ ಎಂದು ಹಿರಿಯ ಸಂಸ್ಕೃತಿ ಚಿಂತಕ ಪ್ರೊ.ಕೆ.ಫಣಿರಾಜ ಅಭಿಪ್ರಾಯಪಟ್ಟರು.

ತಾಲ್ಲೂಕಿನ ಕೆರೆಕೋಣದಲ್ಲಿ ಭಾನುವಾರ ಹಮ್ಮಿಕೊಳ್ಳಲಾದ ‘ಸಹಯಾನ ಸಾಹಿತ್ಯೋತ್ಸವ–10 ಸಿನಿಮಾ ಹೊಸ ತಲೆಮಾರು’‌ ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿ ಅವರು ಮಾತನಾಡಿದರು.

‘ಮಲೆಯಾಳಂ ಸಿನಿಮಾ ಹಳ್ಳಿಯನ್ನು ತಲುಪಿದ್ದರಿಂದ ಅಲ್ಲಿ ಹೊಸ ಪ್ರೇಕ್ಷಕ ವರ್ಗ ಸೃಷ್ಟಿಯಾಯಿತು. ಪ್ರೇಕ್ಷಕರೊಂದಿಗೆ ಸಂವಾದಿಸಿ ಅವರಲ್ಲಿ ಅಭಿರುಚಿ ಬೆಳೆಸಬೇಕಿದೆ. ಇದಕ್ಕಾಗಿ ಕನ್ನಡ ಸಿನಿಮಾಗಳಲ್ಲಿ ಅಂಥದೊಂದು ಚಳವಳಿಯ ಅಗತ್ಯವಿದೆ’ ಎಂದು ಅವರು ಪ್ರತಿಪಾದಿಸಿದರು.

ಉಪನ್ಯಾಸಕ ಪ್ರದೀಪ ಕೆಂಚನೂರ ಮಾತನಾಡಿ, ‘ನಿಸರ್ಗದಲ್ಲಿದ್ದಂತೆ ಸಿನಿಮಾಕ್ಕೆ ಮುಗಿಯದ ಹಾಗೂ ಬಹುವಿಧದ ಸಾಧ್ಯತೆಗಳಿವೆ. ಸುತ್ತಲಿನ ಸಾಮಾಜಿಕ ವಾಸ್ತವತೆಗೆ ಸ್ಪಂದಿಸುವ ಸಿನಿಮಾ ಇಂದು ಬೇಕು. ಬೆಂಗಳೂರು, ಮೈಸೂರಿಗೆ ಸೀಮಿತವಾಗಿರುವ ಕನ್ನಡ ಸಿನಿಮಾಗಳು, ನಾಡಿನ ಇತರ ಪ್ರದೇಶಗಳನ್ನು ಪ್ರತಿನಿಧಿಸಲು ವಿಫಲವಾಗಿವೆ. ಇರಾನ್, ಜಪಾನ್ ಮೊದಲಾದ ದೇಶಗಳ ಸಿನಿಮಾಗಳು ಆ ದೇಶಗಳ ಬಗೆಗಿನ ಪೂರ್ವಗ್ರಹ ದೂರಮಾಡುವ ಗುಣಮಟ್ಟ ಹೊಂದಿವೆ. ಕಲಾತ್ಮಕ ಹಾಗೂ ವಾಣಿಜ್ಯ ಸಿನಿಮಾ ಎಂಬ ವರ್ಗೀಕರಣ ಸರಿಯಲ್ಲ’ ಎಂದು ಅಭಿಪ್ರಾಯಪಟ್ಟರು.

ಪತ್ರಕರ್ತ ಅಮ್ಮೆಂಬಳ ಆನಂದ ಮಾತನಾಡಿ, ‘ಹಿಂದಿನದನ್ನು ನೆನಪಿಸಿಕೊಳ್ಳುವವರು ಹಾಗೂ ಭವಿಷ್ಯದ ಮುನ್ನೋಟದೊಂದಿಗೆ ಮುನ್ನಡೆಸುವವರು ಮರೆಯಾಗುತ್ತಿದ್ದಾರೆ.‌ ಪೌರತ್ವ ತಿದ್ದುಪಡಿ ಕಾಯ್ದೆ ಜಾರಿ ಯತ್ನದ ಮೂಲಕ ದೇಶದ ದಿಕ್ಕು ತಪ್ಪಿಸುವ ಕೆಲಸ ನಡೆದಿದೆ. ಕಾಯ್ದೆಯ ವಿರುದ್ಧದ ಪ್ರತಿಭಟನೆಯಲ್ಲಿ ಮುಸ್ಲಿಂ ಸಮುದಾಯದ ಮಹಿಳೆಯರೂ ಸೇರಿದಂತೆ ಅರ್ಧಕ್ಕಿಂತ ಹೆಚ್ಚಿನ ಭಾರತೀಯರು ಭಾಗವಹಿಸಿದ್ದಾರೆ’ ಎಂದರು.

ವಿಮರ್ಶಕ ಡಾ.ಎಂ.ಜಿ.ಹೆಗಡೆ, ಸಾಹಿತಿ ದಿ.ಆರ್.ವಿ.ಭಂಡಾರಿ ಕುರಿತು ಮಾತನಾಡಿದರು. ನಿರ್ದೇಶಕ ಪ್ರಕಾಶ ಬಾಬು ಕಾರ್ಯಕ್ರಮದ ಉದ್ಘಾಟನೆ ನೆರವೇರಿಸಿದರು. ಡಾ.ವಿಠ್ಠಲ ಭಂಡಾರಿ ಸ್ವಾಗತಿಸಿದರು. ಮಾನಸಾ ವಾಸರೆ ಪ್ರಾರ್ಥನಾ ಗೀತೆ ಹಾಡಿದರು. ‘ಚಿಂತನ’ದ ಜಿಲ್ಲಾ ಘಟಕದ ಅಧ್ಯಕ್ಷ ಕಿರಣ ಭಟ್ ವಂದಿಸಿದರು.

ನಾಲ್ಕು ಸಂವಾದಗಳು

ಸಾಹಿತ್ಯೋತ್ಸವದಲ್ಲಿ ಒಟ್ಟು ನಾಲ್ಕು ಸಂವಾದಗಳನ್ನು ಏರ್ಪಡಿಸಲಾಗಿತ್ತು. ‘ಸೌಂದರ್ಯ ಮೀಮಾಂಸೆಯ ಅಭಿವ್ಯಕ್ತಿ’ ಕುರಿತು ನಿರ್ದೇಶಕ ಅಭಯ ಸಿಂಹ ವಿಚಾರ ಮಂಡಿಸಿದರು. ‘ಸಿನಿಮಾ ನೋಡುವ, ವಿಮರ್ಶಿಸುವ ಬಗೆ’ ಕುರಿತು ಗುಂಪು ಸಂವಾದವನ್ನು ಕತೆಗಾರ ಟಿ.ಕೆ.ದಯಾನಂದ ನಡೆಸಿಕೊಟ್ಟರು. ‘ಹೆಣ್ಣಿನ ನೆಲೆಯಲ್ಲಿ ಸಿನಿಮಾ’ ವಿಚಾರದಲ್ಲಿ ನಟಿ, ನಿರ್ದೇಶಕಿ ಅನನ್ಯಾ ಕಾಸರವಳ್ಳಿ ಮಾತನಾಡಿದರು. ‘ಡಿಜಿಟಲ್ ಸಿನಿಮಾ ವೇದಿಕೆಯ ಹೊಸ ಸಾಧ್ಯತೆಗಳು’ ಕುರಿತು ‘ಪ್ರಜಾವಾಣಿ’ಯ ದಾವಣಗೆರೆ ಬ್ಯುರೊ ಮುಖ್ಯಸ್ಥ ವಿಶಾಖ ಮಾತನಾಡಿದರು.

ಸಂವಾದದಲ್ಲಿದಲ್ಲಿ ಮೋಹನ ಹಬ್ಬು, ಹನುಮಂತ ಹಾಲಗೇರಿ, ಕಿರಣ ನಾಯ್ಕ, ಚಿನ್ಮಯ ಹೆಗಡೆ, ಗೋಪಾಲ ಹಳ್ಳೇರ, ಸಂತೋಷ ಸಂಕೊಳ್ಳಿ, ಯೋಗೀಶ ಬಂಕೇಶ್ವರ, ಎಂ.ಎಚ್.ಗಣೇಶ, ಗೋವರ್ಧನ್ ನವಿಲೇಹಾಳ, ಶಂಕರ ಕೆಂಚನೂರು, ಪ್ರಿಯಾಂಕ ಮಾವಿನಕರ, ತಿಮ್ಮಪ್ಪ ಗುಲ್ವಾಡಿ ಭಾಗವಹಿಸಿದ್ದರು. ಸಮಾರೋಪ ಸಮಾರಂಭದಲ್ಲಿ ಕವಯತ್ರಿ ವಿನಯಾ ಒಕ್ಕುಂದ ಪಾಲ್ಗೊಂಡರು.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಪ್ರತಿಕ್ರಿಯಿಸಿ (+)

ಈ ವಿಭಾಗದಿಂದ ಇನ್ನಷ್ಟು