ಕಾರವಾರ: ನಗರದಲ್ಲಿ ಸೋಮವಾರ ಸಾಂಪ್ರದಾಯಿಕ ಪದ್ಧತಿಯಲ್ಲಿ ಮೀನುಗಾರಿಕೆಗೆ ತೆರಳಿದ್ದ ಮೀನಗಾರರ ಬಲೆಗಳಿಗೆ ಭರ್ಜರಿಯಾಗಿ ಮೀನುಗಳು ಬಿದ್ದವು.
ರವೀಂದ್ರನಾಥ ಟ್ಯಾಗೋರ್ ಕಡಲತೀರದಲ್ಲಿ ಏಂಡಿ ಬಲೆಗೆ 19 ಕೆ.ಜಿ ತೂಕದ ಕುರಡೆ ಮೀನು ಸಿಲುಕಿದೆ. ಅದು ಒಟ್ಟು ₹ 8 ಸಾವಿರಕ್ಕೆ ಮಾರಾಟವಾಯಿತು. ಅಲ್ಲೇ ಸಮೀಪದಲ್ಲಿ ಮತ್ತೊಂದು ಬಲೆಗೆ ರಾಶಿ ರಾಶಿ ಸಿಗಡಿ ಮೀನುಗಳು ಬಿದ್ದಿವೆ. ಮೀನುಗಾರರ ಕುಟುಂಬದ ಮಹಿಳೆಯರು ಅವುಗಳನ್ನು ಕಡಲತೀರದಲ್ಲಿ ಹರವಿಟ್ಟು ಸ್ವಚ್ಛಗೊಳಿಸಿ ವ್ಯಾಪಾರಕ್ಕೆ ಅಣಿಗೊಳಿಸಿದರು.
ತಾಲ್ಲೂಕಿನಲ್ಲಿ ಒಂದು ವಾರದಿಂದ ಉತ್ತಮ ಮಳೆಯಾಗುತ್ತಿದೆ. ಸಮುದ್ರವೂ ಪ್ರಕ್ಷುಬ್ಧವಾಗಿದ್ದು, ಆಳೆತ್ತರದ ಅಲೆಗಳು ಏಳುತ್ತಿವೆ. ಇದರಿಂದ ಮೀನುಗಾರಿಕೆ ಸಾಧ್ಯವಾಗದೇ ಮೀನುಗಾರರು ಬೇಸರದಲ್ಲಿದ್ದರು. ಸೋಮವಾರ ಮಳೆ ಸ್ವಲ್ಪ ವಿರಾಮ ನೀಡಿದ್ದ ವೇಳೆಯಲ್ಲೇ ಸಾಂಪ್ರದಾಯಿಕ ಮೀನುಗಾರಿಕೆ ಮಾಡಿ ಸಂಭ್ರಮಿಸಿದರು.
