ಗುರುವಾರ , ಜೂನ್ 24, 2021
25 °C
ಗಿಡ ನೆಡುವ ಅಭಿಯಾನ: 4 ಸಾವಿರ ಬೀಜ ಬಿತ್ತನೆ, ನೂರಾರು ಗಿಡ ನಾಟಿ ಮಾಡಿದ ಯುವಕರು

ಪರಿಸರ ದಿನಕ್ಕೆ ಅರ್ಥಕೊಟ್ಟ ‘ವನಮಹೋತ್ಸವ ಚಾಲೆಂಜ್’

ಗಣಪತಿ ಹೆಗಡೆ Updated:

ಅಕ್ಷರ ಗಾತ್ರ : | |

Prajavani

ಶಿರಸಿ: ಲಾಕ್‍ಡೌನ್ ಅವಧಿಯಲ್ಲಿ ಸಮಯ ಕಳೆಯಲು ಸಾಮಾಜಿಕ ಜಾಲತಾಣಗಳಲ್ಲಿ ‘ಸೀರೆ ಚಾಲೆಂಜ್’ ಆರಂಭಿಸಿದ್ದ ನಾರಿಯರಿಗೆ ಪರಿಸರ ದಿನದಂದು ತಾಲ್ಲೂಕಿನ ಸಾಲ್ಕಣಿ, ಸೋಂದಾ ಭಾಗದ ಯುವಕರು ‘ವನಮಹೋತ್ಸವ ಚಾಲೆಂಜ್’ ಮೂಲಕ ಸೆಡ್ಡು ಹೊಡೆದಿದ್ದಾರೆ.

ಜೂನ್‌ 5ರ ವಿಶ್ವ ಪರಿಸರ ದಿನ ವಾಟ್ಸ್‌ ಆ್ಯಪ್, ಫೇಸ್‍ಬುಕ್‍ನಲ್ಲಿ ವನಮಹೋತ್ಸವ ಚಾಲೆಂಜ್ ಹ್ಯಾಶ್ ಟ್ಯಾಗ್ ಬಳಸಿ ಗಿಡ ನೆಡುವ ಅಭಿಯಾನ ಆರಂಭಿಸಿದ ಸೀಮಿತ ಸಂಖ್ಯೆಯ ಯುವಕರು, ಸಮಾನ ಮನಸ್ಕರ ಗುಂಪಿನ ಪ್ರಯತ್ನಕ್ಕೆ ಉತ್ತಮ ಸ್ಪಂದನೆ ಸಿಕ್ಕಿದೆ.

ನೂರಾರು ಗ್ರಾಮಗಳಲ್ಲಿ ಯುವಕರು, ಯುವತಿಯರು, ಮಕ್ಕಳು ಗಿಡ ನೆಟ್ಟಿದ್ದಾರೆ. ಹ್ಯಾಶ್ ಟ್ಯಾಗ್ ಮೂಲಕ ಪರಸ್ಪರ ಚಾಲೆಂಜ್ ನೀಡುತ್ತ ಹಲಸು, ಮಾವು, ಅಂಟವಾಳ, ಬಿಳಿಮುರುಗಲ, ದಾಲ್ಚಿನ್ನಿ, ಉಪ್ಪಾಗೆ, ಗೇರು ಮುಂತಾದ ಗಿಡಗಳನ್ನು ನೆಟ್ಟಿದ್ದಾರೆ. ಮನೆ ಅಂಗಳ, ತೋಟದ ಅಂಚು, ಬೆಟ್ಟ, ರಸ್ತೆ ಬದಿಗಳಲ್ಲಿ ಹಣ್ಣಿನ ಬೀಜಗಳನ್ನೂ ಬಿತ್ತಿದ್ದಾರೆ.

‘ಕೇವಲ ಫೋಟೊಗಾಗಿ ಗಿಡ ನೆಟ್ಟಿಲ್ಲ. ಮರವಾಗಿ ಬೆಳೆಯುವವರೆಗೂ ಪೋಷಿಸುವ ಸಂಕಲ್ಪ ಮಾಡಿದ್ದೇವೆ’ ಎನ್ನುತ್ತಾರೆ ಅಭಿಯಾನ ಆರಂಭಿಸಿದ ಹುಳಸೆಮಕ್ಕಿಯ ಚಿನ್ಮಯ ಭಟ್ಟ.

‘ಲಾಕ್‍ಡೌನ್ ಕಾರಣದಿಂದ ಬಹುತೇಕ ಮಂದಿ ಮನೆಯಲ್ಲಿದ್ದಾರೆ. ಉದ್ಯೋಗದಲ್ಲಿದ್ದವರೂ ಊರಿಗೆ ಮರಳಿದ್ದಾರೆ. ಈಚೆಗೆ ಜಾಲತಾಣಗಳಲ್ಲಿ ಮಹಿಳೆಯರು ಸೀರೆ ತೊಟ್ಟ ಫೋಟೊ ಹರಿಬಿಡುವ ಸೀರೆ ಚಾಲೆಂಜ್ ಟ್ರೆಂಡ್ ಆಗಿತ್ತು. ಇದೇ ಮಾದರಿಯಲ್ಲಿ ಪರಿಸರಕ್ಕೆ ಒಳಿತಾಗುವಂತೆ ಟ್ರೆಂಡ್ ಸೃಷ್ಟಿಸಲು ಪಣತೊಟ್ಟಿದ್ದು ವಿಶಿಷ್ಟ ರೀತಿಯಲ್ಲಿ ವನಮಹೋತ್ಸವ ಆಚರಣೆಗೆ ಕಾರಣವಾಯಿತು’ ಎಂದರು.

‘ನಮ್ಮದೆ ಗ್ರಾಮದ ಶಶಾಂಕ ಬೆಳ್ಳಿಮನೆ ಎಂಬುವವರು ಮೂರು ವರ್ಷದಿಂದ ರಸ್ತೆ ಬದಿಯಲ್ಲಿ ದಿನವೂ ಹಣ್ಣಿ ಬೀಜ ಬಿತ್ತಿ ಗಿಡ ಬೆಳೆಸಲು ಕಾರಣರಾಗಿದ್ದಾರೆ. ಅವರನ್ನೇ ಸ್ಪೂರ್ತಿಯಾಗಿಟ್ಟುಕೊಂಡು ಅಭಿಯಾನ ಏರ್ಪಡಿಸಲಾಗಿತ್ತು. ಹೀಗಾಗಿ ಯುವಜನತೆಯನ್ನು ಸೆಳೆಯುವುದು ಸುಲಭವಾಯಿತು’ ಎಂದು ಹೇಳಿದರು.

ಫಲಿತಾಂಶ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು