ಕಾರವಾರ | ‘ಹುತಾತ್ಮ’ನ ನೆನಪು: ಸ್ವಂತ ವೆಚ್ಚದಲ್ಲಿ ಬಸ್ ತಂಗುದಾಣ

ಸುಮಾರು ₹ 1 ಲಕ್ಷ ವೆಚ್ಚದಲ್ಲಿ ನಿರ್ಮಾಣಗೊಂಡ ತಂಗುದಾಣ ಸ್ವಾತಂತ್ರ್ಯೋತ್ಸವದ ದಿನವೇ ಉದ್ಘಾಟನೆಗೊಂಡಿದೆ. ವಿನೋದ್ ನಾಯ್ಕ ನೆನಪಿನಲ್ಲಿ ಅವರ ತಂದೆ ಮಹಾದೇವ ನಾಯ್ಕ ಅವರು ತಂಗುದಾಣ ನಿರ್ಮಿಸಿಕೊಟ್ಟಿದ್ದಾರೆ.

‘ಭಾರತೀಯ ಸೇನೆಯಲ್ಲಿ ಕೆಲಸ ಮಾಡುತ್ತಿದ್ದ ಮಗ 22ರ ಎಳೆ ವಯಸ್ಸಿನಲ್ಲಿಯೇ ದೇಶಕ್ಕಾಗಿ ಪ್ರಾಣ ತ್ಯಾಗ ಮಾಡಿದ. ಅವನು ಹುತಾತ್ಮನಾಗಿ (ಆ. 18ಕ್ಕೆ) ಹದಿನೆಂಟು ವರ್ಷ ಕಳೆಯಿತು. ಆದರೆ ಅವನನ್ನು ಮರೆಯಲು ಸಾಧ್ಯವಿಲ್ಲ. ಅವನ ನೆನಪು ಗ್ರಾಮಸ್ಥರಲ್ಲಿ ಅಚ್ಚಳಿಯದೆ ಉಳಿಯಲಿ ಎಂಬ ಕಾರಣಕ್ಕೆ ಬಸ್ ತಂಗುದಾಣ ಸ್ಥಾಪಿಸಿದೆ’ ಎಂದು ಮಹಾದೇವ ನಾಯ್ಕ ಹೇಳಿದರು.

‘ಮಗ ಹುತಾತ್ಮನಾದ ಕಾರಣಕ್ಕೆ ₹ 15 ಲಕ್ಷದಷ್ಟು ಪರಿಹಾರ ಹಣ ಬಂದಿತ್ತು. ಅದನ್ನು ಸ್ವಂತ ಬಳಕೆಗೆ ವ್ಯಯಿಸಿಲ್ಲ. ಅವನದೇ ನೆನಪಿಗೆ ಮನೆಯ ಅಂಗಳದಲ್ಲೇ ಸ್ಮಾರಕ ನಿರ್ಮಿಸಿದ್ದೇವೆ. ಉಳಿದ ಮೊತ್ತವನ್ನು ಸಮಾಜಕ್ಕೆ ನೆರವಾಗುವ ಕೆಲಸ ಮಾಡಲು ಬಳಕೆ ಮಾಡುತ್ತಿದ್ದು ಅದರ ಭಾಗದಲ್ಲಿಯೇ ತಂಗುದಾಣವೂ ನಿರ್ಮಾಣಗೊಂಡಿದೆ’ ಎಂದರು. 

‘ಗ್ರಾಮದ ಮಹಾದೇವ ದೇವಸ್ಥಾನದ ಬಳಿ ಈ ಮೊದಲು ಬಸ್ ತಂಗುದಾಣವಿತ್ತು. ಕೆಲವು ವರ್ಷಗಳ ಹಿಂದೆ ಅದನ್ನು ಕೆಡವಲಾಗಿತ್ತು. ತಂಗುದಾಣವಿಲ್ಲದೆ ಜನರು ಬಿಸಿಲು, ಮಳೆಯಲ್ಲಿ ನಿಲ್ಲುತ್ತಿದ್ದುದನ್ನು ಕಂಡು ಬೇಸರವಾಗಿತ್ತು. ತಂಗುದಾಣ ನಿರ್ಮಿಸಿಕೊಡುವಂತೆ ಗ್ರಾಮ ಪಂಚಾಯಿತಿಗೆ ಹಲವು ವರ್ಷ ಮೊದಲೇ ಪತ್ರ ಬರೆದಿದ್ದೆ. ಅವರು ನಿರ್ಮಿಸಲು ಮುಂದಾಗದಿದ್ದಾಗ ತಂಗುದಾಣ ನಿರ್ಮಿಸಲು ಮುಂದಾದೆ’ ಎಂದರು.