ಕಾಳಿ ಸೇತುವೆ ಕುಸಿತ | ನದಿಯಲ್ಲಿ ಬಿದ್ದ ಲಾರಿ ಹೊರತರಲು ವಾರದ ಬಳಿಕ ಕಾರ್ಯಾಚರಣೆ

ಆಗಸ್ಟ್ 7ರ ತಡರಾತ್ರಿ ಸೇತುವೆ ಕುಸಿದಿದ್ದರಿಂದ ಲಾರಿಯು ನದಿ ಪಾಲಾಗಿತ್ತು. ದಡದಿಂದ 120 ಮೀಟರ್ ದೂರದಲ್ಲಿ ಸೇತುವೆಯ ಅವಶೇಷಗಳ ನಡುವೆ ಲಾರಿ ಸಿಲುಕಿದೆ. ಕ್ರೇನ್ ಬಳಸಿ ಲಾರಿ ಎಳೆಯುವ ಪ್ರಯತ್ನ ನಡೆದಿದೆ.

‘ಲಾರಿಯನ್ನು ದಡಕ್ಕೆ ತರುವಂತೆ ಜಿಲ್ಲಾಡಳಿತಕ್ಕೆ ಮನವಿ ಮಾಡಿದ್ದ ಲಾರಿ ಮಾಲೀಕ ತಮಿಳುನಾಡಿನ ಸೆಂಥಿಲ್‌ಕುಮಾರ್, ಅಧಿಕಾರಿಗಳಿಂದ ಸ್ಪಂದನೆ ಸಿಗುತ್ತಿಲ್ಲ ಎಂದು ಮಂಗಳವಾರ ರಾತ್ರಿ ನದಿಗೆ ಜಿಗಿದು ಆತ್ಮಹತ್ಯೆಗೆ ಯತ್ನಿಸಿದ್ದ. ಸೆಂಥಿಲ್‌ಕುಮಾರ್ ಮತ್ತು ಆತ್ಮಹತ್ಯೆಗೆ ಪ್ರಚೋದಿಸಿದ ಆರೋಪದ ಮೇಲೆ ತಮಿಳುನಾಡಿನ ಶಶಿಕುಮಾರ ಮತ್ತು ರಥಿನಂ ವಿರುದ್ಧ ಪ್ರಕರಣ ದಾಖಲಿಸಿಕೊಳ್ಳಲಾಗಿದೆ’ ಎಂದು ಚಿತ್ತಾಕುಲ ಠಾಣೆ ಪೊಲೀಸರು ತಿಳಿಸಿದ್ದಾರೆ.

‘ಸೇತುವೆಯ ಅವಶೇಷಗಳಡಿ ಲಾರಿ ಸಿಲುಕಿದ್ದರಿಂದ ಕಾರ್ಯಾಚರಣೆ ಕಷ್ಟವಾಗಿದೆ’ ಎಂದು ಸಿಬ್ಬಂದಿಯೊಬ್ಬರು ತಿಳಿಸಿದರು. ಸುರಕ್ಷತೆ ದೃಷ್ಟಿಯಿಂದ ಸೇತುವೆಯ ಸಮೀಪ ಮೀನುಗಾರಿಕೆ ನಡೆಸದಂತೆ ನಿರ್ಬಂಧಿಸಲಾಗಿದೆ.