ಸಾಹಿತ್ತಿಕ ಚಳವಳಿ ಇಲ್ಲದ್ದು ದೊಡ್ಡ ಕೊರತೆ: ಕಥೆಗಾರ ಅಮರೇಶ ನುಗಡೋಣಿ

ಹಿರಿಯ ಸಾಹಿತಿ ಮೃತ್ಯುಂಜಯ ರುಮಾಲೆ ಮಾತನಾಡಿ, ಡಾ.ಮೃತ್ಯುಂಜಯ ರುಮಾಲೆ, ಇಂದಿನ ಯುವ ಪೀಳಿಗೆ ಸಾಹಿತ್ಯ ರಚನೆಗೆ ಅವಸರ ಪಡಬಾರದು. ನವ ಮಾಸದ ಬಳಿಕ ಹೆರಿಗೆ ಆರೋಗ್ಯಕರ ಹಾಗೆ ತಾನಾಗಿ ಮಾಗುವ ಹಣ್ಣೂ ರುಚಿಕರ. ಅಂತೆಯೇ ಕಾರ್ಯಕ್ರಮಗಳ ಹಿನ್ನೆಲೆಯಲ್ಲಿ ಅತ್ಯಂತ ಅವಸರಕ್ಕೆ ಬಿದ್ದು ಕಾವ್ಯ ರಚಿಸುವುದು, ಬಲು ಬೇಗ ಕವಿ-ಕವಯತ್ರಿ ಎನಿಸಿಕೊಳ್ಳಲು ಹಾತೊರೆಯುವುದು ಉತ್ತಮ ಬೆಳವಣಿಗೆಯಲ್ಲ. ಹೆಸರು ವಾಸಿಯಾದ ಬೇಂದ್ರೆ, ಅಡಿಗರು ಒಂದು ಕವಿತೆ ರಚನೆಗೆ ವಾರ, ತಿಂಗಳಗಟ್ಟಲೆ ಸಮಯ ತೆಗೆದುಕೊಂಡಿದ್ದು ಉಂಟು. ಪಂಪ ರಚಿಸಿದ್ದು ಎರಡೇ ಕಾವ್ಯ, ಕುಮಾರವ್ಯಾಸ ಬರೆದದ್ದು ಒಂದೇ ಅಲಂಕಾರ (ಕಾವ್ಯ)ವಾದರೂ ಅವು ಇಂದಿಗೂ ಜನಮಾನಸದಲ್ಲಿವೆ ಮತ್ತು ಚರ್ಚೆ, ಸಂವಾದದ ವಸ್ತುಗಳಾಗಿ ಸಾರ್ವಕಾಲಿಕವಾಗಿವೆ ಎಂದರು.

ಕಾವ್ಯಕ್ಕೆ, ಕವಿಗೆ ವಿಭಿನ್ನ ಶಕ್ತಿ ಇದೆ. ಶಿಶುನಾಳ ಶರೀಫ್ ರ ಒಂದೇ ಒಂದು ತತ್ವ ಪದಕ್ಕೆ ಗೌಡರೊಬ್ಬರು ಹೊಲ, ಮನೆ ಬರೆದುಕೊಡುವುದಾಗಿ ಹೇಳಿದರು. ಅಂದರೆ ಒಂದು ತತ್ವ ಪದದ ಮೌಲ್ಯ ಎಷ್ಟೊಂದು ಎಂಬುದು ಆಶ್ಚರ್ಯ ಎನಿಸಿದರೂ ಸತ್ಯ. ಸತ್ತ ಮೇಲೂ ಕವಿ ಬದುಕಿರುತ್ತಾನೆ ಅಂದರೆ ಆತ ಕೊಟ್ಟ ಕಾವ್ಯ ಆತನ ಹೆಸರನ್ನು ಜೀವಂತ ಇರಿಸಿದೆ ಅಂತಲೇ ಅರ್ಥ. ಕಾವ್ಯದಿಂದ ಕವಿ ಬದುಕಿರುತ್ತಾನೆ ಅಂದರೆ ಸಮಾಜ ಸದಾ ನೆನೆಯುವಂಥ ಕಾವ್ಯ ರಚಿಸುವ ಜವಾಬ್ದಾರಿ ನಮ್ಮೆಲ್ಲರ ಮೇಲಿದೆ ಎಂದರು.

ಕಾಲೇಜಿನ ಪ್ರಾಚಾರ್ಯ ಸಿ. ಶಿವಪ್ಪ ಮಾತನಾಡಿ, ಪ್ರಜಾವಾಣಿ ತನ್ನತನ ಉಳಿಸಿಕೊಂಡು ಸತ್ಯ, ನಿಷ್ಠುರವಾಗಿ ವರದಿಗಳನ್ನು ಬಿತ್ತರಿಸುತ್ತಿದೆ. ಪತ್ರಿಕೆ ಮೂಲಕ ಕವಿಗೋಷ್ಠಿ ಸೇರಿದಂತೆ ಸಮಾಜಮುಖಿ ಕಾರ್ಯ ನಡೆಯುತ್ತಿರುವುದು ಅಭಿನಂದನಾರ್ಹ ಎಂದರು.

'ಪ್ರಜಾವಾಣಿ' ವಿಜಯನಗರ ಜಿಲ್ಲಾ ಹಿರಿಯ ವರದಿಗಾರ ಶಶಿಕಾಂತ ಎಸ್. ಶೆಂಬೆಳ್ಳಿ, ಪತ್ರಿಕೆ ಸಾಗಿ ಬಂದ ದಾರಿ ಕುರಿತು ಪ್ರಾಸ್ತಾವಿಕ ಮಾತನಾಡಿದರು. ಸಾಹಿತ್ಯ ಪರಿಷತ್ತಿನ ತಾಲ್ಲೂಕು ಅಧ್ಯಕ್ಷ ಹುಲುಗಪ್ಪ ನಾಯಕರ, ಅಂಬೆ ಪ್ರಕಾಶನದ ಅಂಜಲಿ ಬೆಳಗಲ್, ಕಾಲೇಜಿನ ಐಕ್ಯುಎಸಿ ಸಂಚಾಲಕ ಟಿ.ಎಚ್. ಬಸವರಾಜ, ಕನ್ನಡ ವಿಭಾಗದ ಮುಖ್ಯಸ್ಥ ಸಿ. ದೇವಣ್ಣ, ಹಿರಿಯ ಸಾಹಿತಿ ಚಂದ್ರಶೇಖರಯ್ಯ ರೋಣದಮಠ ವೇದಿಕೆ ಮೇಲೆ ಇದ್ದರು. ವೀರಮ್ಮ ಹಿರೇಮಠ ನಿರೂಪಿಸಿದರು. ಜರೀನಾ ಬೇಗಂ ಸ್ವಾಗತಿಸಿದರು. ವಸಂತಕುಮಾರ ಪ್ರಾರ್ಥನಾ ಗೀತೆ ಹಾಡಿದರೆ, ನಾಯಕರ ಹುಲುಗಪ್ಪ ವಂದಿಸಿದರು.

ಪ್ರಜಾವಾಣಿ ಪ್ರಜಾಪ್ರಭುತ್ವದ ದೈವವಾಣಿ
ಪ್ರಜಾವಾಣಿ 75 ವರ್ಷ ಪೂರೈಸಿದ ಹಿನ್ನೆಲೆಯಲ್ಲಿ ಸಾಂಕೇತಿಕವಾಗಿ ಅಷ್ಟೇ ಕವಿಗಳಿಂದ ಕವನ ವಾಚನ ಕಾರ್ಯಕ್ರಮ ಆಯೋಜಿಸಲಾಗಿತ್ತು.

ಪ್ರಾಧ್ಯಾಪಕ ದಯಾನಂದ ಕಿನ್ನಾಳಅವರ 'ಪ್ರಜಾವಾಣಿ ಮತ್ತು ಸಮಾಜ' ಶೀರ್ಷಿಕೆಯಡಿ ಮೊದಲ ಕವಿತೆ ವಾಚನ ಮಾಡಿದರು. 'ಪ್ರಜಾವಾಣಿ ಎಂದೆಂದಿಗೂ ಪ್ರಜಾಪ್ರಭುತ್ವದ ದೈವವಾಣಿ' ಎಂಬ ಸಾಲುಗಳನ್ನು ಹೇಳುತ್ತಿದ್ದಂತೆ ಕರತಾಡನ ಮುಗಿಲು ಮುಟ್ಟಿತ್ತು. ಕವಯತ್ರಿ ಅನುಪಮಾ ಸುಲಾಖೆ, 'ಪ್ರಜಾವಾಣಿ ಹೆಜ್ಜೆಗುರುತು' ಶೀರ್ಷಿಕೆಯ ಕವನ ವಾಚಿಸಿದರು. ಹೀಗೆ ಕೆಲವರು ಪತ್ರಿಕೆ ಕುರಿತು ಕವನ ಓದಿದರೆ, ಕೆಲವರು ಸಮಕಾಲೀನ ಸನ್ನಿವೇಶ, ಪ್ರೇಮಕಾವ್ಯ, ಪ್ರತಿಕೃತಿ ಕುರಿತು ಕವನ ವಾಚಿಸಿದರು.

ನೇರ, ನಿಷ್ಠುರ 'ಪ್ರಜಾವಾಣಿ'
ನೇರ, ನಿಷ್ಠುರ ಧ್ವನಿಯ ಪ್ರಜಾವಾಣಿ ಜನರ ಸಮಸ್ಯೆಗಳಿಗೆ ಸದಾ ಸ್ಪಂದಿಸುತ್ತ ಬಂದಿರುವುದರಿಂದ ಪ್ರಜಾವಾಣಿ ಈಗಲೂ ಜನಮಾನಸದಲ್ಲಿ ಉಳಿದಿದೆ. ಬೆಳಿಗ್ಗೆ ಎದ್ದ‌ ತಕ್ಷಣ ಪ್ರಜಾವಾಣಿ ಓದದಿದ್ದರೆ ದಿನ ಅಪೂರ್ಣವಾಗುತ್ತದೆ ಎಂದು ಕಥೆಗಾರ ಅಮರೇಶ ನುಗಡೋಣಿ ಹೇಳಿದರು.

*
ಮನುಷ್ಯ ಸಮಾಜ ಉಸಿರುಗಟ್ಟುವ ಸಂದರ್ಭದಲ್ಲಿ ಕಾವ್ಯ ಚಳವಳಿ ಮೂಲಕ ಸ್ಪಂದಿಸುತ್ತ ಬಂದಿದೆ. ಕಾವ್ಯವೂ ಚಳವಳಿ ರೂಪದಲ್ಲಿ ಅವತರಿಸಿದೆ.
-ಅಮರೇಶ ನುಗಡೋಣಿ, ಖ್ಯಾತ ಕಥೆಗಾರ