ಹೊಸಪೇಟೆ (ವಿಜಯನಗರ): ನಗರದ ಆಶ್ರಯ ಕಾಲೊನಿಯಲ್ಲಿ ನಿರ್ಮಿಸಿರುವ ಆಶ್ರಯ ಮನೆಗಳು ನಕಲಿ ಫಲಾನುಭವಿಗಳ ಪಾಲಾಗಿದ್ದು, ಅರ್ಹರಿಗೆ ವಿತರಿಸಬೇಕೆಂದು ಸ್ಥಳೀಯರು ಆಗ್ರಹಿಸಿದ್ದಾರೆ.
ನಗರಸಭೆಯ 22ನೇ ವಾರ್ಡಿನ ಸರ್ವೇ ನಂಬರ್ 1,2,3 ಮತ್ತು 4ಕ್ಕೆ ಸಂಬಂಧಿಸಿದ ಆಶ್ರಯ ಮನೆಗಳನ್ನು ಹಂಚಿಕೆ ಮಾಡಲಾಗಿದ್ದು ನೈಜ ಫಲಾನುಭವಿಗಳಿಗೆ ಹಕ್ಕು ಪತ್ರ ಸಿಕ್ಕಿಲ್ಲ. ನಕಲಿ ದಾಖಲೆ ಪತ್ರ ಸೃಷ್ಟಿಸಿಕೊಂಡು ಹಲವರು ವಾಮಮಾರ್ಗದಿಂದ ಹಕ್ಕು ಪತ್ರ ಪಡೆದುಕೊಂಡಿದ್ದಾರೆ ಎಂದು ಬುಧವಾರ ಜಿಲ್ಲಾಧಿಕಾರಿಗೆ ಸಲ್ಲಿಸಿರುವ ಮನವಿಯಲ್ಲಿ ಆರೋಪಿಸಿದ್ದಾರೆ.
ಜಿಲ್ಲಾಧಿಕಾರಿಗಳು ಈ ಕುರಿತು ಸಮಗ್ರ ತನಿಖೆ ನಡೆಸಿ, ಅರ್ಹರಿಗೆ ಆದಷ್ಟು ಶೀಘ್ರ ಹಕ್ಕು ಪತ್ರ ಕೊಡಿಸಬೇಕು. ಇಲ್ಲವಾದಲ್ಲಿ ಉಗ್ರ ಹೋರಾಟ ನಡೆಸಲಾಗುವುದು ಎಂದು ಎಚ್ಚರಿಕೆ ನೀಡಿದ್ದಾರೆ. ಎ. ಶರೀಫ್, ಮಂಜುನಾಥ, ಹೊನ್ನೂರಪ್ಪ, ದುರಗಪ್ಪ ಇತರರಿದ್ದರು.