ಬುಧವಾರ ಸಂಜೆ ನಗರದ ವಿವಿಧ ಬಡಾವಣೆಗಳಿಂದ ಪುನೀತ್ ಅಭಿಮಾನಿಗಳು ಅವರ ಫ್ಲೆಕ್ಸ್ ನೊಂದಿಗೆ ನಗರದಲ್ಲಿ ಮೆರವಣಿಗೆ ನಡೆಸಿದರು. ಬಳಿಕ ಚಿತ್ರಮಂದಿರಗಳತ್ತ ತೆರಳಿ ಅಲ್ಲಿ ಫ್ಲೆಕ್ಸ್ ಕಟ್ಟಿದರು. ಮಧ್ಯರಾತ್ರಿ ಕೇಕ್ ಕತ್ತರಿಸಿ, ಪುನೀತ್ ಅಮರವಾಗಲಿ ಎಂದು ಘೋಷಣೆ ಕೂಗಿದರು. ಪಟಾಕಿ ಸಿಡಿಸಿದರು. ನಸುಕಿನ ಜಾವದ ವರೆಗೂ ಚಿತ್ರಮಂದಿರದ ಬಳಿ ಹಲವರು ಜಾಗರಣೆ ಮಾಡಿದರು. ಕೆಲವರು ನಿದ್ರೆಗೆ ಜಾರಿದ್ದರು. ಟಿಕೆಟ್ ಕೌಂಟರ್ ಆರಂಭವಾಗುತ್ತಿದ್ದಂತೆ ಶಿಳ್ಳೆ, ಕೇಕೆ ಹೊಡೆದರು. ನೂಕು ನುಗ್ಗಲಿನಲ್ಲಿ ಹರಸಾಹಸ ಮಾಡಿ ಟಿಕೆಟ್ ಪಡೆದರು. ಎಲ್ಲ ಚಿತ್ರಮಂದಿರಗಳ ಬಳಿ ಬಿಗಿ ಪೊಲೀಸ್ ಬಂದೋಬಸ್ತ್ ಮಾಡಲಾಗಿತ್ತು.
